මා වැරදිද ඔබ කියන්න

 

වසර 2013 වප් සිටවූ මස පුන් පොහොය දින අප විහාරයට බොහෝ ශ්‍රධා වන්තයින් පැමිණියා. ඒ අතර ඉංජිනේරු සංස්ථාවේ මහත්වරුන්ද පැමිණියා. නමුත්, ඔහුන් ආපසු යන විට ඔහුන් පැමිණි වාහන කිහිපයක් අමතකවී ගොස් තිබුණා. කිහිප විටක් මේවා රැගෙන යන්න කීයා දැනුම් දුන්නත්, කාර්යබහුල ඔහුන්ට නැවත පැමිණීමේ හැකියාවක් තිබුණේ නෑ. නමුත් එම වාහන නඩත්තු වන්නේ ජනතා මුදලින් වන නිසා, ජනතාවටම පිණ් පිණිස විහාරයේ වැඩවලටත්, රාවණාබල වැඩ වලටත් පාවිච්චි කළා. එය වරදක්ද.?

   උපුටනය-  Lotus bud නෙළුම් පොහොට්ටුව

කොස් කොළ තොප්පි හා ක්‍රෝටන් කොළ මාල





ඉදිරියේ දී රටට මුහුණ දෙන්න වෙන නිය‍ඟෙට මුහුණ දෙන්න කළ යුතු දේවල් හා සම්ප්‍රදායික ආහාර රටාවෙන් අපිට ලබා ගන්න පුලුවන් දේවල් ගැන තිබුණු සම්මන්ත්‍රණයකදී කෘෂිකර්ම අධ්‍යක්ෂ රොහාන් විජේකෝන් උන්නැහේ කිව්ව කතාවක්  අල්ලගෙන ආණ්ඩුවට ගහන්ට බයියොත් , ආණ්ඩුවේ බෙට්ටත් සුවඳයි කියන ටොයියොත් මේ දවස් වල කිපිලා ජාලේ දෙවනත් කරන්නේ  පිස්සු බල්ලෝ වගේ.

 කතාවෙන් එක සුට්ටන් කොටසක් අල්ලගෙන  උන්නැහෙට පුන්නක්කු හා තණ කොළ දෙන්ට දඟලන මේ මන්දබුද්ධික සේනාව කරන විගඩම  නියම ශ්‍රී ලාංකික බූරු කම පෙන්නනවා. බ්ලොග් ලෝකේ කෙරුමෝ කියලා හිතන් ඉන්න එක බ්ලොග් කාරයෙකුත් මේ ගැන මොට්ට කතාවක් ලියලා තිවුණා, තමන්ගේ බුද්ධි ප්‍රමාණයේ දිග පළල පෙන්නන්ට වෙන්ටෑ.

මේ ක්‍රෝටන් කොළ  ප්‍රශ්නය ලංකාවේ කසි කබල් පාදඩ දේශපාලනය මොන වගේ එකක්ද කියලා කියන්න හොඳ උදාහරණයක්. වැලේ වැල් නැතිව ඉන්න විපක්ෂ බූරුවොයි, යහපාලනේ නා ගන්න දිහා  බලන් ඉඳලා කුජීත වෙලා ඉන්න ආණ්ඩුවට කඩේ යන ගොබ්බ සේනලායි දෙකම එකයි. මුන්ගේ කටවල් ඇරියාම මොලේ වැඩ කරන එක නවතිනවා. මේ බත් ගිලින වහන්සේලාට කොළ ටිකක් කවලා මොලේ පාදන්න හැදුව කෘෂිකර්ම අධ්‍යක්ෂ ජනරාල් උන්නැහෙට ත් මේවා හොඳ පාඩම්.

මේ නියඟේට මූණ දෙන්න පහුගිය ජූනි වල ඉඳලා කරගෙන යන වැඩ සටහනේ එක කොටසක් විතරයි  මේ විකල්ප එලවළු හෙවීම. නිය‍ඟෙට ඔරොත්තු දෙන අල බතල, බඬ ඉරිඟු, සෝයා වගේ දේවල් ගැන , වී වගාවට වැඩිය එලවළු වගාව ට අවධානය දෙන්න, හාල් පරිභෝජනය අඩු කරලා එලවලු පලා වැඩි පුර කන්න කියන්න වැඩ සටහන් විශාල ගානක්  කරගෙන යනවා.

එකේ එක කොටසක් වෙච්චි සම්ප්‍රාදයික ආහාර වර්ග මේ සඳහා යොදාගන්නේ කොහොමද කියන එක ගැන සාකච්ඡා කරන සභාවේ දි මතු කරපු ඉතාම කුඩා , ඒ වගේම අනගි අදහසක් ගැන මේ විදියට ගොරවන උන්දැලාට දෙන්ට ඕනෑ කොස් කොළ නෙවේ පිදුරු.

උඹයි විමල් පුතා සමත් !



 

ලක් වැසියන් පොළවෙ හැපී
අහවල් එකෙනුත් වැඳපී
එහෙව් රජ මමත් කාපී...
පුත නුඹටත් කවමි ටොපී

 

ජාතිය රන් තලියක් වේ
ආගම ගිනි ගුලියක් වේ
දෙක විකුණන්නට මෙලොවේ
එකෙක් වෙතොත් පුත නුඹ වේ

 

එහෙව් කේස් ලංකාවේ
දූෂණ දසතින් අහුවේ
ඇදුණොත් හරි කතා ලොවේ
උඹෙත් මගෙත් නම් කියවේ

 

පෙර කළ වාහන හොරකම්
අහු වී ලැබුණත් ගැරහුම්
අඹරණු ගුලි පුළුවන් නම්
උඹයි වීර පුතා උතුම්

 

තමන් ලැබූ ඇමති පොතේ
කොටසක් තම පවුල වෙතේ
නොම ගත්තොත් උඹෙන් පුතේ
පවුලට කිසි පලක් නැතේ

 

ඒකට වැඩ කොට දිගටත්
හරහට ලැබුණ ම ටොපියත්
'රට' ගැන බයිල ම කියතොත්
උඹයි විමල් පුතා සමත්

 

ජනයට හිමි පොදු දේ නම්
බදු බර තව නැති බැරි කම්
එතැනදි ජාතිය විකුණං
කෑම තමයි හොර - විරු කම්

 

රජයෙදි ඉහගෙන කන්නේ
විපසෙ දි 'පලි' මොර දෙන්නේ
විමලුන් බව කියමින්නේ
'වීරයා' ඇතුළට යන්නේ

 

¬ චීන ජාති(ක)වාදී පී. මහේන්ද්‍ර කිංකොං

 

රුවන් නෙලුගේ ෆේස් බුක් පි‍ටුවෙන් හොරකම් කරන ලදි.

සෙනසුරු කක්ෂයෙන් පිට පනියි

 

 



මල කෙලියකි. බයි පුතාලාට දුකද ටොයි පුතාලට සතුට ද ගෙන දෙමින් නාහෙට නාහන සෙනසුරු තම කක්ෂයෙන් පිට පැන තිබේ. මෙසේ කියන්නේ අප නොව පසුගිය ජනාධිපතිවරණයෙන් පසුව කුජීත වී සිටින සිරි ලංකවේ යන්ත්‍ර මන්ත්‍ර ජ්‍යෝතිෂ්‍ය  නක්ෂස්ත්‍ර කාර රොත්තේ එක් හනුමාන් කෙනෙකුන් වන තුවක්කු බට් නාම පලක්ෂිත විජිත් රෝහණ විජේමුණි උන්නැහේය.

එලඹෙන ජනවාරි 27 දා අනිවාර්යෙන්ම මෛත්‍රීපාල සිරිසේන ජනාධිපතිවරයා මිය යන බව කියමින් මහ පොලොව පල්ල දිවුරමින්    රාජපක්ෂවාදින් චූන් කළ විජිත් රෝහණ විජේමුණි   හදිසියේම තම අනාවැකිය වෙනස් කර ජනාධිපතිවරයා මිය යන්නේ ජනවාරි නොව ඔක්‍තෝබර් මාසයේ බව දැන් කියයි.

ඊට හේතුව වන්නේ සෙනසුරා හදිසියේ තම ගමන්  මාර්ගය වෙනස් කිරීමයි. මල කෙලි ඩබලකි. සෙනසුරුට හදිසියේ තම ගමන් මග වෙනස් කිරීමට සිතී ඇත. මේවාට හිනා වෙමින් සිටි අපටද දැන් මේ ගැන බැරෑරුම් ලෙස සිතීමට කාලය එලඹ ඇත.

මක් නිසාද යත් අප දන්නා එකම සෙනසුරා නම් යුරේනස් හා බෘහස්පති අතර සිටිමින් සූර්යා වටේ කැරකෙන සෙනසුරා පමණක් වීම නිසාය. ඉතින් හත්වලාමේ ඌ තමන්ගේ ගමන් මාර්ගය හෙවත් කක්ෂයෙන් පිට පැන්නොත් මරණය ෂුවර්ය. හැබැයි ඒ ජනාධිපතිවරයාට විතරක් නෙවේ. මේ ශ්‍රී පෘතුවියේ සිටින සියලු දෙනාටය.

විජේමුණි උන්නැහේ කියන්නේ ඇත්තනම් අප සියලු දෙනා දැන් කළ යුත්තේ රාජපක්ෂ ආණ්ඩුවක් සැදීමට වලි කෑම නොව සුපර් මෑන්ගේ තාත්තා ජෝර්- එල්  කළා මෙන් තමන්ගේ රොකට්‍ටු හදා ගෙන මේ විනාශ වෙන ග්‍රහ ලෝකයෙන් පැන වෙනත් සෞර ග්‍රහ මණ්ඩලයක් සොයා යෑමය. අපේ මේ සෞර ග්‍රහ මණ්ඩලයට පුලුවන් තරම් ඈතින් පිහිටි මණ්ඩලයක් සොයා ගන්නවා නම් ඇඟට හොඳය.

සටහන- ලෝකයේ  ඇති සියල්ල  විද්‍යාවට විස්තර කළ නොහැකි බවත් , නොපෙනෙන බලවේග ඇති බවත්  කියමින් මා සමග කොකු දමා ගැනීමට කවුරුන් හෝ සිතන්නේ නම් ඔහුට /ඇයට බරපතල ලෙස වැරදිලාය. ඔහේලා නොපෙනෙන බලවේග එක්ක මෙහෙ ඉන්න. මම නම් නතර වෙන්නේ අඩුම තරමෙන් ඇල්ෆා සෙන්චූරි වටේ තියන ග්‍රහ ලෝකයකය.  කමැති නම් එහෙදී හම්බ වෙමු.

මඤ්ඤං දීපයේ අස් රිය ප්‍රශ්නය කෙසේද යත්

 

තවද යටගිය දවස ජම්බුද්වීප  පාද මස්තකයේ වූ  මඤ්ඤං දීප නම් වූ කොදෙව්වේ මැද මූලනි බ්‍රහ්මදත්ත නම් රජ්ජුරු කෙනෙකුන් රාජ්‍ය කරමින් සිටිනා සඳ   හිට්ටාණපාල නම් වූ ඇමැත්තා තෙමේ රා නීලයා නම් වූ  පුරිස සමග කුමන්ත්‍රණ කොට පියා රාජ්‍ය බලය ලබා ගන්නේ අප නම් මැද මූලනියා  මෙන් නොව මහත් වූ යහ පාලනය කරන්නේද, ලිච්ඡවී රජ දරුන් මෙන් සමගියෙන් සිටින්නේ ද ආදි වශයෙන් වහසි බස් දොඩමින් සිටින්නෝය.    

ඉදින් ඒ අතර රා නිලයා ද විසිවසක් කඹුට ලබා ගත් මහමැති කම වෙදැයි කිය කියා අර්ජුනයා නම් වූ පුරිසා කැඳවා භාණ්ඩාගාරය සිස් කරන්නට වන්නෝය.

මඤ්ඤං දීපයේ ජනයා ද පුරුදු ලෙසම මඤ්ඤං කෙලිමින් මහත් සේ උදම් ව කදිමැයි කදිමැයි කියමින් ප්‍රීති ඝෝෂා නගා   වයිපයියක් නොමිලේ ලැබෙන තෙක් උඩ බලාගෙන සිටි සඳ  නොමිලේ ලැබෙන වයිපයිය කෙසේවෙතත් තිබුණු පයියද නැති වී යන බවක් දැක වෙළෙවි වී ගියේ කුම් කරමුදැයි තැන තැන කොඳුරන්නට වන්නේ තැන තැන මහත් වූ ඝෝෂා නගන්නට වන්නෝය.

එසඳ හිට්ටාන පාල රජුරුවෝද , රානිලයාද රාජ සභාව කැඳවා අපි දැන් කුමක් කරමුදැයි විචාරන කල , ආනුර නම් වූ කුමාරයා කියන්නේ " දේවයිනි , තොප ජනයාට කියු ලෙස මැද මූලනියාගේ සොර කම් එලි කරව, එවිට ජනයා මද කලක් සංසුං කර ගත හැකි වෙ දැයි කියා සිටියේය. එකල රානිලයා ද කියන්නේ  " බල කොලුව අප කෙසේ නම් මැද මූලනියා සොර කල් කලැයි කියා සිපිරි ගෙට දක්කන්නේද? උහු අප විසින් අර්ජුනයා ලවා කෙරවූ සොරකම් හෙලි නොකර සිටිත්දැයි විමසා සිටියෝය.

එකල ආනුරයා කියන්නේ " එම්බා රානිලය. තොප නම් මහත් වූ මන්ද බුද්ධිකයෙක් නොවේද? මැදමූලනියා සිපිරි ගෙට දක්කන්නට සදන්නේ තා උමතුවෙන්ද? තොප කළ යුත්තේ මැද මූලනියා සමග ඩීල නම් වූ කථිකාවක් කොට උහු  සිපිරිගෙට දක්වන ව්‍යාජයක් රඟ දැක් වීම පමණක් නොවෙදැයි කියා සිටියහ.

ඔහුගේ මහත් වටනා වූ උවදෙස් ඇසූ හිට්ටානපාල රජ්ජුරු තැනද, මහමැති රානිලයාද මැදමූලනියා හා ඩීල දමා කුඩා කුඩා සොරකම් කළැයි කියමින් මැද මූලනියා ගේ සව්වන් එපසයිඩිය නම් වූ තැනට ගෙන්වන්නේ මදක් ප්‍රශ්න විචාරා , උන් පොහොයකටද දෙපොහොයකටද   ආදි වශයෙන් සිපිරි ගෙට යවා ඉනික්බිති   නැවත නිරුපද්‍රිතව නිවෙස් කරා  යවන්නේය.ඉදින් එම චෞර පුරුෂයෝද මහත් වීරයින් සේ දෑත් ඔසවා යදම් පෙන්වා ජය ඝෝෂා නගමින් සිපිරිගෙටත් ඉක්බිති උහුගේම ගෙටත් යන්නෝය.

මේ ආකාරයෙන් විටෙක භාණ්ඩ මිල උත්පාතනය වන විටද, තෙලබනුවේ පිරිවැය වැඩි වන විටද, ආදි වශයෙන් නොයෙක් විට එක් එක් පුරුෂයින් එපසයිඩියට කැඳවා උන් හා පයුරු පාසනම් කොට මහත් වූ විකාර රඟ දක්වමින් සිටින්නෝය.

ඉදින් මෙසේ කලක් ගත වන විට මඤ්ඤං දීපය මහත් වූ නියඟයකට ගොදුරු වන්නේ ජනයා මහත් වූ පීඩාවට පත් ව හඬ නගන්නට පටන් ගත්‍තෝය. නියඟය නිසාවෙන් ගොවි තැන්  විනාශ වන්නේ සහල් නැලියක්  මිලට ගන්නට කහවනු කරත්තයක් පවා මදි වුනෝය. ඒ අතර විල්පත්තු නම් වූ මහත් වනයක් ඇමත්තෙක් විසින් නසන්නේ යැයි තවත් ජනයා හඬ නගන්නෝය, එසේ ජනයා පීඩාවට පත්ව කුපිතව සිටින සඳ රානිලයා තෙමේ සිතුණු සිතුණු විට විදෙස් ගතවන්නේ තම සව්වන් ප්‍රීති කිරීම සඳහා එකෙකුන්ට කහවණු ලක්ෂය බැගින් දෙන්නෙමො යැයිද, අලංකාර අස් රියක් දෙන්නෙමෝ යැයිද ආදි වශයෙන් කතා කියන්නේ , ජනයා තව තවත් කුපිතව ගියාහුය.

එකල්හි රානිලයාද, ආනුරයාද, හිට්ටන් පාලයද සය කන් මන්ත්‍රණ පවත් වන්නේ දැන් නම් කුඩා කුඩා පුරිසන් සිපිරි ගෙට දක්කා මදිය. මහ එකෙකුන්ම අල්ලා ‍රැඟුමක් දැක්විය යුතු යැයි සිතා මැදමූලනියා බණවා මේ සතුයේ එපසයිඩියට යවන්නේ කවුරුන්ද, මහ එකෙකුන්ම සිටියොත් මනා යැයි ඩීලක් දමන්නෝය.
මැදමූලනියාද සිතන්නේ පචායුද මානවකයා ඊට සුදුසු යැයි ද, උහුගේ මහත් සොරකම්  ගැන නොවිමසා අස් රිය ප්‍රශ්නය පමණක් විමසා සිටිනු මැනැයි දන්වා සිටියේය.

ඉදින් අස් රිය ප්‍රශ්නය කෙසේද යත් , මැදමූලනියා රාජ්‍ය කරන සමයේ  ඇමත්තෙක් ව සිටි පචායුද තෙමේ  තම සකල ඥාති සනුහරයම කැඳවා උන්ට මහත් වූ සැප දෙන්නේ එකාට සිය ගණන් වූ අස් රිය ලබා දෙන්නේ අසුන්ට කොල්ලුද රාජ භාණ්ඩාගාරයෙන්ම ලබා දුන්නේ වෙස්සන්තර රජුන් දාන පාරමිතාව පිරු ලෙස යැයි දැන ගත යුතුය.

මැදමුලනියාද පචායුද මානවකයා කැඳවා " බල කොලුව, අපගේ මිත්‍ර රා නිලයා මහත් වූ අසීරු කලක් ගෙවයි, ඉදින් උහුගේ සිත සුව පතා තා පොහොයකට සිපිරි ගෙට ගොස් සිටිනුව යැයි කියා සිටියහ.
පාචායුද තෙමේ ද කියන්නේ " අවසර , දේවයනි, පොහොයකට නොව දෙපොහොයකටම මා සිපිරිගෙට යවනු  මැනවයි ඉල්ලා සිටියහ.

  පචායුදගේ එබස් ඇසූ මැදමූලනියාද, රා නිලයාද මහත්  සේ අන්ද මන්දව යන්නේ පුත ඒ කිමදැයි විමසා සිටියහ.එකල්හි පචායුද මානවකයා කියන්නේ "   දේවයිනි, අදින් දෙපෝයක් ගෙවන දින අප මහත් වූ උද්ඝෝෂණයක් කරන බව තොපට අමතකද. ඉදින් මා එදිනම නිදහස් කලහොත් නෙල්සන් මැන්ඩෙලාවන් ලෙසට  එම උද්ඝෝෂණ බිමට පැමිණිය හැකි නොවේදැයි විචාලේය.

කදිමයැ, කදිමයැ කියූ මැදමූලනියා , තම ගජ මිතුරු රා නිලයා පසෙකට කැඳවා   " ඕකා පොහොය දෙකක් නොව තුනක්ම සිපිරි ගත කරනු යැයි රහසේ  කියා සිටියහ.

උන්ගේ සතර කන් මන්ත්‍රණයට හොරෙන් කං දුන් පචායුද පුරිස තෙමේ කියන්නේ " බල මිතුරනි, මාගේ සනුහරේ  අඟනන්ගේ ඈත්ව සිටීමට හැකිනම් තුන් පොහොයක නොව සදාකාලෙටම සිපිරි ගෙට දැක් වූවත් කම් නැතැයි කියුහ.

මඤ්ඤං දීපයේ අස් රිය ප්‍රශ්නය  නම් එසේ යැයි සියලු හුදී ජනයා දැන ගත  මනාය.
''

රටට පෑයු අලුත් තරුව- එම්. ඒතුමා

 

 

 



සිරි ලංකාවට අලුත් තරුවක් පායමින් තිබේ. එසේ මෙසේ තරුවක් නෙවේය. මානසික රෝගඥ තරුවක්ය. සමහර විට ලෝකයේ සිටින හොඳම රෝග මානසිකඥයා වීමටද ඉඩ තිබේ.

ඒතුමා අප වැනි දුහුනෙක් නොව ලෝකය දැක , කා වතුර ද බී සිටින උගතෙකි.ඒ තුමා ගේ සුවිශේෂි ලක්ෂණය නම් ඒතුමා හැර ලෝකයේ සිටින අනික් සියලු දෙනා ( සමා වෙන්න- අනිත් සියලු දෙනා කිව්වාට එසේ මත් නොවේ. ඒතුමාගේ මතවලට එහෙයි කියන අය හැර අනිත් සියලු දෙනාය) මානසික රෝගින්ය.

ඒ තුමාගේ ඇති තවත් අති විශේෂ ලක්ෂණයක් නම්   ඒතුමාට සමාජ වාදය පෙන්වන්ඩ බැරි වීමය. හරියටම කිව්වොත් නයාට අඳු කොල වගේය. ඒ නිසා  ජයාට සමාජවාදය වගේ කියා අලුත් කියමනක් හැදිය හැකිය. නමුත්   ඒතුමා  රුසියාවේ ඉගෙන ගෙන ඇති නිසාත්, රුසියන් සමාජ වාදි කාරයෝ ඒ තුමාට පිනට ඉගෙන ගන්න දුන්නු නිසාත් උන්ට වැඩිය බනින්නේ ද නැත. බැරි වෙලාවත් එතුමාට පින් රුසියන් අධ්‍යාපනයක් නොලැබුනානම් එහෙම සමාජවාදි කාරයින්ට දුවන්ඩ පාරවල් නැති වෙන්නේය. ඒ වා එහෙමය.

කාල් මාක්ස්ගේ ඩාස් කැපිටාල් අග සිට මුලට හැට හය වතාවක් ද, මුල සිට  අගට හැත්තෑ තුන් වතාවක් ද කියවා ඇත. ( ඒ තුමා ඒ පොතේ කවරය  එක්දාස් අටසිය හත් වතාවක් කියවා තිබේ). ඒ නිසා ලංකාවේ සිටින ඩාස් කැපිටාල් කවරය විතරක් කියවා ඇති සමාජවාදින්ට වඩා හොඳට ඒ ගැන දන්නේය.

ඒ විතරක් නෙවේය. ලංකාවේ ඉන්න සමාජ වාදියෝ කර ඇත්තේ පංති පහක් පමණක් වුනත් ඒ තුමා පංති 20ක්ම කර තිබේය. ඒ එක පංතියක අවුරුදු දෙක ගානේය. එහෙම ඉගෙන ගත්ත ඒ තුමා ලංකාවේ විස්ස විද්‍යාලයෙක් ඉගෙන ගන්ට බැරි වුනා නොවේය. අකැමති වුනේය. උපාධි ගන්ට රුසියාවට ගියේ ඒ නිසාය.ඉතින් ඒ නිසා  ලෙනින්ට වඩා හොඳට ලෙනිනිස්ම් දන්නේය. එව්වා එහෙම තමාය.

සමාජවාදයට අමතරව ඒතුමා උග්‍ර මානසික රෝගියෙක්ය.  රෝග විශේෂ්ඥයෙක්ය. භූ ගෝලඥයෙක්ය. ඉතිහාසඥයෙක්ය. ගණිතඥයෙක්ය. සමාජ විද්‍යාඥයෙක්ය.  යුද්ධ විශේෂඥයෙක්ය. මානව  විද්‍යාඥයෙක්ය. ඉතින් ඒතුමා පොරක් නොවේද? තරුවක් නොවේද?

සටහන- 1   ඒතුමාට භාර දී ඇති කොන්ත්‍රාත්තුව ගැන වැඩි විස්තර ඇසීමෙන් වලකින්න.

සටහන-2   සිසිර කුමාර මාණික්කාආරච්චි  නම් මහතෙක් ඉස්සර කාලේ හිටියේය. ඔහු අද ඉන්න තැනක් දන්න අයෙක් සිටීද?