Sunday, December 30, 2012

සංගාගේ අස්ථිය හා ඇනිලින්



කුමාර් සංගක්කාර  යනු මෙරට සිටින සුපිරි ක්‍රිකට් ක්‍රීඩකයෙක් බව අවිවාදිත කරුණකි. ටෙස්ට් ලකුණු 10000 ඉක්මවූ ලෝකයේ සිව්වැනි ක්‍රීඩකයා ඔහුය.( ක්‍රිකට් වලදී ඕනෑම දෙයක් ලෝක වාර්තාවක් වන නිසා ඔහු තබා ඇති ලෝක වාර්තා ගණන කොතරම් දැයි කිව නොහැක. උදාහරණ යක් ලෙස තරඟයක 37 වැනි ඕවරයේ තුන්වැනි පන්දුවට හයේ පහරක් එල්ල කල ලෝකයේ ප්‍රථම හෝ එකම ක්‍රීඩකයා වීම)

කුමාර් සංගක්කාර නොහොත් අප කවුරුත් ආදරයට කියන පරිදි සංගා පසුගිය සමයේ ලෝඩ්ස් හිදි  කල දේශනය නිසා  රටම කැලඹී ගිය අතර  සමහරුන් ඔහු දේශදෝහියෙක් ලෙස හැඳින්වූ අතර තවත් සමහරුන් ඔහු පාලක රෙජිමය විසින් විලි ලැජ්ජාවකින් තොරව කරගෙන යනු ලබන ක්‍රීඩාව දේශපාලනීකරණයට එරෙහිව නැගී සිටි වීරයෙක් ලෙස හැඳින්වීය. එසේම ඔහු තමන් හා මහේල ජයවර්ධන එක්ව ආරම්භ කල අවන් හලකට කකුළු අමාත්‍යාංශය යනුවෙන් නම් කර තවත් ආන්දෝලනයක්, ඇති කලේය.

එවන්  සුපිරි හා ආන්දෝලනාත්මක  ක්‍රීඩක සංගක්කාරගේ අතේ පන්දුවක් වැදී අස්ථියක් බිඳී යාම නිසා ඔහුට සති අටක් පමණ  කාලයක් ක්‍රීඩා කිරීමට නොහැකි වනු ඇතැයි පසු ගිය දා වාර්තා විය.

ඔහුගේ අනික් ක්‍රියා මෙන් මෙයද  තරමක් ආන්දෝලනාත්මක පුවතක්  බව අපගේ වැටහීමයි.

මක් නිසාද යත් කුමාර් සංගක්කාර ඔහුගේ ඇඹෙණියද සමග එක්ව  දැන් සෑහෙන කාලයක සිට අස්ථි සවිමත් කරන්නේ යැයි කියනු ලබන ඇනිලින් නැමැති කිරිපිටි වර්ගයක් විකිණීම උදෙසා තමන් විකිණෙමින් සිටින නිසාය.

එම වෙලඳ දැන්වීම් වලදී ඔහු හා ඔහුගේ බිරිය පවසන පරිදි අස්ථි දිරා යාම මැඩීමටත් , අස්ථි සවිමත් කිරීමටත් ඇනිලින් ඉතා අගනේය. ඇනිලින් නොබීවහිත් කල් යාමේදී ඇට දිරා ගොස් මහත් කරදර වලට මුහුණ පෑමට සිදු වනු ඇත. එම නිසා ඔහු හා ඔහුගේ බිරිය නිතරම ඇනිලින් පානය කරයි.එම නිසා ඔවුන්ගේ අස්ථි ඉතා සවිමත්ය.

එසේ දිනපතා ඇනිලින් පානය කරන සංගාගේ අස්ථියක් පන්දුව වැදී බිඳී ගොසිනි.

මේ සිදුවීමෙන් අපට පෙනී යන්නේ එක්කෝ සංගා ඇනිලින් නොබොන බව හෝ ඇනිලින් වලින් අස්ථි සවිමත් කිරීමට නොහැකි බවය.

මේ දෙකෙන් කුමක් ඇත්ත වූවත් සංගා කරන්නේ තමන් ක්‍රිකට් ක්‍රීඩකයෙක් වශයෙන් දිනා ඇති කීර්තිය උපයෝගී කර ගනිමින් වෙලඳ සමාගමක් මගින් ගෙවන රුපියල් කිහිපයක් උදෙසා මෙරට ජනයා ‍රැවටීමය.තමන්ගේ ජනප්‍රියතාව භාවිතා කරමින් තමන්ගේ ක්ෂේත්‍රයට කිසිසේත් අදාල නොවන ක්ෂේත්‍රයක කටයුතු කිරීම කිසිසේත්ම  සදාචාරසම්පන්න දෙයක් නම් නොවේ.

මෙයටත් වඩා වැදගත් කරුණ වන්නේ ඇනිලින් බඳු කිරි වල කැල්සියම් තිබුනත් ඒවා ශරීරයට අවශෝෂණය කර ගැනීමට හැකියාවක් නැති කමය.ඊටත් වඩා වැදගත් කරුණ නම් වැඩිපුර කිරි බීම නිසා ශරීරයේ ඇති කැල්සියම්ද අඩු වෙන බවය.

අපට එදිනෙදා අවශ්‍ය කැල්සියම් ප්‍රමාණය හාල්මැස්සන් කිහිප දෙනෙකුගෙන් ලබා ගත හැකිය. ඒ සඳහා මිල අධික ඇනිලින් පානය කිරීම අවශ්‍ය නොවේ. යමෙකුට යම් රෝගී තත්වයක් මත වැඩි කැල්සියම් ප්‍රමාණයක් අවශ්‍ය නම් වෛද්‍ය උපදෙස් මත ලබා ගැනීමට කැල්සියම් පෙති වෙලඳපොලේ ඇති අතර ඒ සඳහා අවශ්‍ය වන්නේ ශත කිහිපයක් පමණි.ඇනිලින් මත්තේ නැහීමට අවශ්‍ය නැත.

ඇනිලින් පානයේ ඇති හානි පිලිබඳව ඔබට දැන ගැනීමට අවශ්‍ය නම් මේ සබැඳියට යන්න.
http://foodsafety.govt.nz/elibrary/industry/Vitamin_Milk-Science_Research.htm






Thursday, December 27, 2012

ක‍ටුගේ බින්දේ කන් ගැට්ටා තනියමයි , අම්මපා



කෞතුකාගාරයේ සොරකම නියත වශයෙන්ම කර ඇත්තේ කන් ගැට්ටා බවත් එය සියයට තුන්සීයක් විශ්වාස බවත්  ඊයේ පුවත්පත් සාකච්ඡාවකට සහභාගි වෙමින් නියෝජ්‍ය පොලිස්පති අනුර සේනානායක මහතා පැවසූ බව වාර්තා විය.කන් ගැට්ටා එම සොරකම ම කර ඇත්තේ තනියම බවත් ඔහු පසුපස කිසිවෙකු සිට නැති බවත් ඒ මහතා  සහතික වී තිබේ. විය. ඒ මහතා කියන්නටත් කලින් අපි නම් ඒ බව දැන සිටියෙමු.අපට එය සියයට තුන්සීයක් නොව හාරසීයක්ම විශ්වාසය.

අප ඒ බව දැන ගත්තේ අපගේ ගවේෂණශීලි මාධ්‍ය භාවිතාව නිසා කන්ගැට්ටා ගෙන් හරස් ප්‍රශ්න ඇසීමේ සටහන් පිටපතක් අපට ලැබුණු නිසාය. මෙය අපට ලැබුණු විදිය කිසිසේත්ම හෙලිදරව් නොකරන අතර ලංකාවේ සිටින ඉස්තරම්ම ගවේෂණශීලි මාධ්‍යවේදියා වශයෙන් අපට ඒ සඳහා අයිතියක් ඇති බවත් නොතීසී පිට නොතීසී ආවත් එය එසේ වන බවත්  පමණක් සටහන් කරනු කැමත්තෙමි.

එම සටහන සම්පූර්ණයෙන් ම හා සංස්කරණයකින් තොරව පහත දැක්වේ.

මෙහි ක.ගැ යනු කන් ගැට්ටා බවත්  ප්‍ර.නි. යනු ප්‍රශ්න කරන නිලධාරියා බවත් සලකන්න.

ප්‍ර.නි.- ආ එන්න පුතා වාඩි වෙන්න, සුභ උදෑසනක්

ක.ගැ.- ස්තූතියි, අපේ සර්.

ප්‍ර.නි.-අපි මොනවත් බීලම කතා කරමුකෝ. මොනවද ඔබතුමා බොන්න කැමති? ටී, ප්ලේන්ටී, කූල් ඩ්‍රින්ක්, සැර බීමක්,

ක.ගැ-ප්ලේන්ටියක් හොඳා අපේ සර්, වැඩි සීනි

ප්‍ර.නි. -සිග‍රැට් එකක් දෙන්නෙයි?

ක.ගැ- එපා අපේ සර්, මං ඉතිං බීඩි කාරයනේ හි හි, සර්ට කමක් නැත්නම් මං ලඟ පොඩි බඩුවක් තියෙනවා ,ඔතලා ගන්නද?

ප්‍ර.නි- එහෙනම් මටත් එක්කම ඔතහන්කෝ, මස්කට් කෑල්ලකුත් ගෙන්නන්නැයි?

ක.ගැ- අපේ සර්රුත් දන්නවා එහෙනම් ක්‍රමේ.

ප්‍ර.නි. -ආයේ මොකද බං, අපි කියලා, ඒවායින් කමක් නෑ. දැන් කියහන්කෝ උඹ ක‍ටුගේ බින්ද හැටි,උඹ එක්ක තව කවුරුවත් හිටියද බං?.

ක.ගැ- පිස්සුද සර් ඕක මම තනියම දූන්න ගේමක්නේ, ආයේ සර්ට මාව විශ්වාශ නැද්ද?

ප්‍ර.නි. - අනේ නෑ බං , එහෙම එකකට නෙවේ මම නිකමට ඇහුවේ.ආ උඹත් ඇදහන් ඩම් එකක්,

ක.ගැ.- ඒක මිසක්,

ප්‍ර.නි. - හැබෑට උඹ මොනවද බං ඔය කෙහෙම්මල් ක‍ටුගේ බිඳින්න අරං ගිය ආයුද?

ක.ගැ.- බීඩි මිටියක් විතරයි සර්, අපේ සර්රුත් අදින්න උගුරක්

ප්‍ර.නි. - හ්ම්ම්ම්ම්ම්ම්ම්ම්, මොකක් කිව්වා බීඩි මිටියක් විතරයි, කොහොමද බං බීඩි මිටියකින් ක‍ටු ගේ බින්දේ?

ක.ගැ.- මෙහෙමනේ සර්, මම ටිකට් එකක් අරගෙන ඇතුලට ගියා , රෑ වෙනකම් දොර මුල්ලකට වෙලා බීඩි බිබී හිටියා,බීඩි කිව්වට බඩු මිටියකුත් දාලා තමා බිව්වේ. ඒ දුමට මුරකාරයෝ මත් වෙලා නින්ද ගියා ,  රෑ වුනාම ඇඟිලි සලකුණු තුනක් තියලා, මම බඩුයි කඩුයි අරගෙන ආවා, හරිම සිම්පල් පැලෑනක් අපේ සර්,

ප්‍ර.නි-  පැලෑන නම් මරු බං, ඒත් උඹ  ඇඟිලි සලකුණු තුනක් තිව්වේ මොකද ? ඉඳා උගුරක් ඇදලම කියහං

ක.ගැ.- ඇයි සර් මේ වැඩේ කලේ මම විතරක් කියලා පේන්ටනේ සර්,

ප්‍ර.නි.- හොඳා හොඳා කොල්ලෝ දැන් කියපන්කෝ උඹ දොරවල් වහලා තියෙද්දී රෑ ක‍ටු ගෙයින් එලියට ආවේ කොහොමද  කියලා..

ක.ගැ- හි හි .. සර් ඕකත් වැඩක්ද? මම අරන් ගිය බෙඩ් ෂීට් එක උඩ තට්‍ටුවේ ජනේලෙක ගැට ගහලා බිමට බැස්සා.

ප්‍ර.නි.- ඈ බං කොල්ලෝ උඹ අරං ගියේ බීඩි මිටියක් ඉතරයි කිව්වා නේද?කොයින්ද බෙඩ් ෂීට් එකක්

ක.ගැ- මෙහෙමනේ සර්. ඔන්න මම බඩු ටිකත් අරගෙන එලියට එන්න කියලා බලන කොට තමා දැක්කේ ෂීට් එක ගෙදර අමතක වෙලා ඇවිත් කියලා. මම ටක් ගාලා ගෙදර දුවලා ෂීට් එක  අරගෙන ආපහු ඇවිත් ඒක ජනේලේ ගැට ගහලා ඒක දිගේ  එලියට ආවා. අරිනේ අපේ සර්.ඕන් ඒනම් අපි ගියා සලාම් කිව්වා.

 ප්‍ර.නි- රායිට් සනා ,ඒත් මට එක දෙයක් කියපන්කෝ, ඒක ඕෆ් රෙකෝර්ඩ්, මොකද බන් උඹ ඔච්චර වටින දේවල් තියෙද්දී ඔය උස්සන් යන්ටත් අමාරු කඩු අරන් ගියේ?

ක.ගැ- මේකනේ සර්,මේ දවස් වල කඩ්ඩ නැතිව මොකුත් කරන්ට බෑනේ අපේ සර්

Saturday, December 22, 2012

ඩෙංගු හා වංගු




ආයුර්වේද වෛද්‍යවරියක්  විසින්  ඩෙංගු රෝගය සම්පූර්ණයෙන්ම සුව කරන ඖෂධයක් සොයා ගෙන ඇතයි මේ දිනවල ඇතැම් මාධ්‍ය විසින් මහා ඝෝෂාවක් කරනු අප දු‍ටුවෙමු.

එසේම ඇයගේ මෙම සොයාගැනීම පාගා දැමීමට බටහිර ඖෂධ සමාගම් සමග එකතුව බටහිර වෛද්‍යවරුන් කටයුතු කරන්නේ යැයි චෝදනාවක්ද අපගේ ඊනියා දේශප්‍රේමි මහත්වරුන් විසින් කර තිබුනි.

මේ පුවතත් සමග ප්‍රශ්න රාශියක් අප සිතේ මතු විය. මේ ප්‍රශ්න මතු කරන්නේ නොදන්නා කමට අසා දැන ගැනීමට මිස  කිසිවෙකුගේ සිත් රිදවීමටනම් නොවේ. (ඇත්තමයි)

දැන් මේ වෙද තුමිය ඩෙංගු රෝගය සුව කරන්නේ රෝගයේ කුමන අවස්ථාවේදී ප්‍රතිකාර කිරීමෙන්ද?

රෝගයේ ආරම්භක අවස්ථාවේදීද?ඩෙංගු රක්තපාත අවස්ථාවේදීද?

එසේත් නැත්නම් කම්පන තත්වයට පත් වූ පසුද?

ඇය තමන්ගේ ඖෂධයෙන්ම  නිට්ටාවට ඩෙංගු රෝගය සුව වන බව කියන්නේ කෙසේද?

ඩෙංගු රෝගින්ගෙන් 99% ක්ම සුව වන බවත් මිය යන්නේ 1% අඩු ප්‍රතිශතයක් බවත් ඇය දන්නවාද?

එසේ නම් ඇය සුව කරනවා යැයි කියන්නේ මේ මිය යන  1% ක ප්‍රමාණයද?

එසේ මිය යන අය තම ඖෂධයෙන් සුවපත් වන බව ඇය සොයා ගත්තේ කෙසේද?

ඩෙංගු රක්තපාත හෝ කම්පන තත්වයට පත් රෝගීන්ට වෙන කිසිම ඖෂධයක් නොදී ඇගේ ඖෂධ වලින් ප්‍රතිකාර කිරීමෙන්ද?

එවැනි පරීක්ෂණ මට්ටමේ පවතින ඖෂධයක් මිනිස් රෝගීන්ට දෙමින් ඔවුන්ගේ ජීවිත අවදානමේ හෙලන්නට ඇයට අවසර දුන්නේ කවුද?

එසේ කිරීම කොතරම් සදාචාර සම්පන්නද?

නිවැරදි බෙහෙත සොයා ගැනීම සඳහා තමන්  බොහෝ වතාවක් පරීක්ෂන කල බවත් බොහෝ ඖෂධ පරීක්ෂා කල බවත් ඇය පවසා තිබේ. මෙම ඖෂධය සොයා ගැනීමට බොහෝ සේ මහන්සි වී තිබේලු.

එසේ නම් මෙම නිවැරදි ඖෂධය හැර ඇය පරීක්ෂා කල අනික් ඒවා වැරදි බව ඇය දැන ගත්තේ කෙසේද?

ඒවා දුන් ඩෙංගු රෝගීන් මිය ගිය නිසාද?

එසේ මිය ගිය ඩෙංගු රෝගීන් ගණන කීයද?

ඒ ගැන ඇය සෞඛ්‍ය බලධාරින්ට වාර්තා කර තිබේද?

මෙම ඖෂධය නිසා ඇතිවන අතුරු ආබාධ ගැන ඇය සොයා බැලුවේද?

සටහන- මෙම ඖෂධයට අනුමැතිය දුන් ආයුර්වේද බලධාරින් මේවා ගැන සොයා බැලුවේදැයි අප නොදනිමු.මෙම ප්‍රශ්න වලට පිලිතුරු අය සතුව නොමැති බව අප දනිමු. මෙය  මෙරට පවත්නා නූගත් කමත්, මිථ්‍යා විශ්වාසයනුත්, මේ සමයේ විරාජමාන ව සිටින ඊනියා ජාතිකවාදයත් ගැන හොඳ අවබෝධයකින් ජනතාව ගසා කෑමට කරන උත්සාහයක් වීමට හෝ එසේ නැත්නම් යම්කිසි මානසික රෝගයකින් පෙලෙන අයෙකුගේ විකාරයක්  වීමටත්  ඉඩ තිබේ.


Thursday, December 20, 2012

විශේෂ ප්‍රවෘත්තියක් - A Breaking News



රිමෝට් කොන්ට්‍රෝලය සොයා ගත් පුද්ගලයාට මුලු හදින්ම ස්තූතිවන්ත වෙමින් ඊයේ හවස් භාගයේ රූපවාහිනි චැනල් අතර මාරු වෙමින් සිටියදී මහරාජාගේ සිරස නාලිකාවේ රාත්‍රී 7 ප්‍රවෘත්ති ප්‍රකාශනය වෙත අහම්බෙන් මා නෙත ගැ‍ටුනි.

සිරස යනු මා සාමාන්‍යයෙන් බලන නාලිකාවක්  නොවේ. ඇත්තෙන්ම කිවහොත් ප්‍රවෘත්ති  සඳහා මා ලංකාවේ  කිසිම රූපවාහිනි නාලිකාවක් කෙරෙහි විශ්වාසය තබන්නේ නැත. ඒවායේ ඇත්තේ ප්‍රවෘත්ති නොව එම නාලිකාවල හිමිකරුවන් ප්‍රවෘත්ති යැයි කියා ලංකාවේ ජනතාව විශ්වාස කල යුතු යැයි සිතා විකාශනය කරන කුණුහරුප පමණි.

කෙසේ නමුත් ඊයේ සවස සිරස නාලිකාවේ ප්‍රවෘත්ති විකාශය බැලුවෙමි. නිවේදකයා කියමින් සිටියේ කාලගුණ විපර්යාසය නිසා රටේ තැන තැන ඇති වී තිබෙන ආපදා තත්වය පිලිබඳ විස්තරයකි.
ගංවතුරෙන් යට වූ නගර , පස් කඳු වලට යට වූ ගේ දොර , අහිමි වූ ජීවිත ආදිය ගැන විස්තර කියමින් හුන් නිවේදකයා එක්වරම කියා සිටියේ තව ස්වල්ප වේලාවකින් විශේෂ නිවේදනයක් බලාපොරොත්තු වන ලෙසයි.
ඒ සමග රූපවාහිනි තිරයේ පහල තීරුවේ ඇදි ඇදී යන පණිවිඩයකින්ද කියවුනේ විශේෂ ප්‍රවෘත්තියක් තව මොහොතකින් බලාපොරොත්තු වන ලෙසයි.

බ්‍රේකින් නිව්ස්.......

පේරදෙණියේ හෝස් මහාචාර්ය තුමාට තමාගේ පඩි පත දැක වූවා සේ මගේ පපුවද හෝස් ගා ගියේ ඒ වනවිටත් ප්‍රචාරය කරමින් සිටි ඛේදවාචකයටත් වඩා වැදගත් ප්‍රවෘත්තිය මහා විශාල ඛේදවාචකයක්වත්දෝ යි සිතුන නිසාය.ඒ සමග මට සිතුනේ වැදගත් ප්‍රවෘත්ති යනු ඛේදවාචකම නොවන්නට ද ඉඩ ඇති බවය.

මගේ සිත දසත පියඹා ගියේ තම දූ දරුවන් ලෙන තුල නොදු‍ටු සිංහයාගේ පරිදිය. නොයෙක් කල්පනා ,සිතුවිලි ,ඇති වී නැති වී ගියේය.

අගවිනිසුරු වරිය ඉල්ලා අස් වී වත්ද? දෝෂාභියෝගය ඉවත් කරගෙනවත්ද?

රනිල් ඉල්ලා අස් වී යූ ඇන්පියේ නායකත්වය බුද්ධික පතිරණට දුන්නාවත්ද?

ජනාධිපති වරයා ඉල්ලා අස් වීද?මර්වින් සිල්වා මහණ  වෙලාවත්ද?

ඇමෙරිකාව ඉරානයට පහර දුන්නාවත්ද?

එසේත් නැත්නම් මහා විශාල ග්‍රහකයක් පෘථිවිය කරා ඇදී අවුත් හැප්පෙන්නට යනවා වත්ද?

මෙසේ විපරීත සිතුවිලි වල ගිලෙමින් සිටින අතරේ තම ප්‍රවෘත්ති විකාශය නැවත් වූ සිරස රූපවාහිනිය එම විශේෂ පුවත සිංහල  දෙමල ඉංග්‍රීසි භාෂා තුනෙන්ම නිවේදනය කලේය.

" පවත්නා  අයහපත් කාලගුණ තත්වය සැලකිල්ලට ගෙන හෙට දින පැවත්වීමට නියමිතව තිබූ  සිරස කඩමණ්ඩිය වැඩ සටහන නොපැවත්වීමට කැපිටල් මහරාජා සංවිධානය තීරණය කර තිබේ."

Tuesday, December 18, 2012

පිටසක්වල ජීවින් සිටින බවට සාක්ෂි


මේ දිනවල අහසින් එක එක ජාතියේ කෑලි බෑලි වැටෙමින් තිබේ. 

උල්කාපාත, උල්කාෂ්ම, ග්‍රහක පමණක් නොව ග්‍රහලෝක පිටින්ම කඩා වැටේ. මේ කඩා වැටිල්ල කොච්චර භයානක දැයි කිව්වොත් , පසුගිය කාලයේ අගමැටිකමට  ෆයිට් කර  දැන්  පැත්තකට වී විරහ ගී ගයන පොලොන්නරුවේ සිරිසේන ඇමති තුමාගේ සෞඛ්‍ය  අමාත්තියාංසෙත් නිවේදනයක් නිකුත් කර අහසින් කෑල්ලක් කඩා වැ‍ටුනොත් එයාලගේ වෛද්‍ය පර්යේෂණ ආයතනෙට දන්වන්නැයි කීවේය.

පහු ගියදා රතු වැස්සක් කඩා පාත් වූ විට කවුදෝ මනුස්සයෙක් දිය සෙවල බැඳුනු බෝතලයකට එකතු කර ගෙන ආ ජලය පරීක්ෂා කර රතු  වැස්සට හේතුව ජලයේ තිබූ ඇල්ගී වර්ගයක් බව කීවේ මේ  වෛද්‍ය පර්යේෂණ ආයතනයයි. ( මේ ජලයේ කිසිම ජීව කොටසක් නැති බවත් ඇත්තේ ලෝහ වර්ග පමණක් බවත් ඊට පස්සෙ  හෙලි විය)

ඒ කතා මොනවා වුනත්  මේවායෙන් අපි පරිස්සම් විය යුතුය.මක් නිසාද යත් මේවා අපේ ඔලුවට කඩා වැටෙන නිසාය. ඊයේ පෙරේදා දවසක මේ වගේ උල්කාවක් මගේ ඔලුවටම කඩා වැ‍ටුනේය.පිටසක්වල ජීවින් සිට්න අබ්ව මම දැන ගත්තේ මේ මගේ ඔලුවට වැ‍ටුනු උල්කාපාතය නිසාය.

  මේ උල්කාපාත පලහිලව්, ලෝක විනාශ කතා ආදිය නිසා ඔලුව තීන්තු වී සිටින  නිසා මේ දවස් වල  මම එලි පහලියට ගියත් ඉන්නේ හෙල්මට් එකක් දමා ගෙනය. උල්කාපාත  කෑලි වලින් ඔලුව බේරා ගන්නටය.

උල්කාපත කඩා වැ‍ටුනත් යන්නට ඕනෑ ගමනක් තිබූ නිසා පහුගිය සෙනසුරාදා හවස් ජාමේ මගේ තැපැල් නයින්ටි කබලට නැගලා පැට්‍රොල් ෂෙඩ් එකට ගියේ බයිසිකලේට පැට්‍රල් ලීටර් එකක් ගහ ගන්නටය.

මගේ ඔලුවට උල්කාපතයක් කඩා වැ‍ටුනේ හරියටම මම ෂෙඩ් එකට අවුත් ඉන්දන පොම්පේ ලඟ බයිසිකලේ නැවත්වූ  විටය. 

මගේ ඔලුවට හෙණ ගෙඩියක් පාත් වූවාක් මෙන් දැනුනේය. ඔලුව කර්පට් වී මම කුජීත වී ගියෙමි. දෑස නිලංකාර විය. වමනේ යන්නට එනවාක් මෙන් දැනුනේය. ඔලුව කැරකෙන නිසා දෑස පියා ගත්තෙමි.
විනාඩියකට පමණ පසු ඇස් ඇර බැලූ විට මගේ හිසේ වැදුනු උල්කාව විසි වී ගොස් පැට්‍රල් පොම්පයේ වැදී ඇලී තිබෙනු මම දැක්කෙමි.

මමද හොඳින් ලංව  ඒ දිහා බැලුවේ මීට පෙර උල්කාපාතය්ක් දැක නැති නිසාය.පෘතුවියෙන් පිට ජීවින් සිටින බවට මම දැන ගත්තේ ඒ වෙලාවේය. ඒ උල්කා කෑල්ලේ මොනවාදෝ අකුරු වගයක් , තිබුනේය.
මම තවත් හොඳින් බැලුවෙමි.

පැට්‍රල් පොම්පයේ ඇලී තිබුනු  උල්කාපාත කෑල්ලේ මේ අකුරු තිබුනේය.

"පැට්‍රල් ලීටර් 1ක් රු. 159.00"

සටහන- මේ ආකාරයේ උල්කාපාත ,උල්කාෂ්ම  ,ග්‍රහක ආදිය ඉදිරි කාලයේ කඩා වැටීමට ඉඩ ඇති බව තාරකා විද්‍යාඥයෝ කියා සිටින නිසා සකල ජනතාවම ආරක්ෂා කාරි පියවර ගෙන තිබීම උචිත වේ. ඒ ඒ ග්‍රහ වස්තු අනුව ඒවායෙන් ආරක්ෂා වීමට ගත යුතු ක්‍රියාමාර්ග ඉදිරියේදී දැනුම් දීමටද අපි බලාපොරොත්තු වෙමු.
නාසා (ලණු) ආයතනයෙන් දැන ගැනීමට ලැබුණු තොරතුරකට අනුව "පොහොර සහනධාරය කැපීම" නමැති විශාල ග්‍රහකයක් මේ දිනවල පොලව දෙසට ඇදෙමින් පවතින අතර  තම කුඹුරුවල මල පහ කිරීම මගින් එයින් සිදු වන හානිය අවම කර ගත හැකි බව විද්‍යාඥ ආචාර්ය නාත නලින් ද සිල්වා මහතා සොයා ගෙන තිබේ.

Sunday, December 16, 2012

විශේෂ නියෝජිතයා (ලැප්ටොප්)




මේ අතර ජනාධිපතිවරයා හමුවන්නට උදේ වෙනම විශේෂ නියෝජිතයකු ද පැමිණියේය. ඔහුගේ පැමිණීම වැදගත් වන්නේ ඔහු ජනාධිපතිවරයාට ඉතාමත් වටිනා අලුත් ආරංචියක්‌ රැගෙන ආ නිසාය.

පසුගිය දවස්‌වල බටහිර බලවත් රටක්‌ ලංකාව ගැන සමීක්‍ෂණයක්‌ කරලා එහි වාර්තාවක්‌ එරටේ රාජ්‍ය නායකයන් වෙත බාරදුන්නා. එතනදී ඔවුන් හොයා බැලුවේ ජෙනරාල් සරත් ෆොන්සේකා කියන චරිතයට ලංකාවේ බලතුලනය බිඳින්න එරට කිසිදු නායකයකුට නොකළ තරමේ උදව් කරලාත් ජාතිකව හා ජාත්‍යන්තරව විවිධ බලවේග පෙළගස්‌සලාත් ඔහු අසාර්ථක වූයේ ඇයිද කියලයි. එතනදී ඔවුන් එක්‌ නිගමනයකට පැමිණියා. වැදගත්ම දේ තමයි මොන බලවේගය දැම්මත් ඔහු වටා මොන මොන බලවේග පෙළගැස්‌සුවත් මේ රටේ ජනාධිපතිවරයාව ඡන්දයකින් පරද්දන්න බැහැය කියන කාරණාව.

එසේ කිව් නියෝජිතයා ජනාධිපතිවරයාට විශේෂ කාරණාවක්‌ අවධාරණය කළේය.

ඒ කියන්නේ ඔබට විරුද්ධව ලෝකයේ තිබෙන අවදානම පහවෙලා නැහැ කියන එකයි. ඡන්දයකින් වට්‌ටන්න බැරි නම් ඊළඟට ඔවුන් වෙන වෙන ආයුධ පාවිච්චි කරාවි. ඔබ පරිස්‌සම් වෙන්න. ඔහු මෙසේ ජනාධිපතිවරයාට ඊළඟට පැමිණිය හැකි උවදුරු කිsහිපයක්‌ම ගැන අනතුරු හඟවමින් ඉතා වැදගත් අදහස්‌ කිහිපයක්‌ අනාවරණය කළේය.

ඉහත රට මේ රටේ යුද්ධය පැවැති 2007-2008 කාලයේ පටන්ම ලංකාවට විවිධාකාරයෙන් කරදර කළ රටක්‌ බව ජනාධිපතිවරයා ද පෙන්වා දුන්නේය.


උපුටා ගැනීම දිවයින ඉරිදා (ලැප්ටොප්) සංග්‍රහය 2012.12.15



Friday, December 14, 2012

සිංහ කොඩි , පැන්ඩා කොඩි හා චීන්නු (කොන්ඩේ බැඳපු )

 

සිංහ කොඩියේ පැන්ඩෙක් ඇන්දා කියලා ජපනෙක් පොලිස් අත් අඩංගුවට අර ගෙන කියලා නිව්ස් අයිටක් එකක් තිබුනේය.

මේක සම්පූර්ණයෙන්ම වැරදි වැඩක්ය.  ඌ ලංකාවට ගොඩ බැහැලා බලපුවම දකින්න ලැබුන දේ නිසා සිංහ කොඩියට පැන්ඩෙක් දැම්ම එක ගැන ඌට දොස් කියන්න බැරිය.

මම කියන්නේ  මේ වැඩේට වග කියන්න ඕනෑ මිනිහා පැත්තක ඉන්දැත්දී අහිංසක ජපනෙක්  අල්ලා ගෙන කියලාය.

මෙව්ව මෙහෙම සිද්ද වීම ජාතියන්තරව අපිට හොඳ නැත. අපිට ඉන්න හොඳම යාලුවත් තරහ වෙන වැඩක්ය.
ඒක නිසා අපේ පොලෝසියට ආර්ථික විද්‍යාව ත් ජාතියන්තර සබඳතා ගැනත් උගන්වන්ට ඕනෑය. ජපනා  සිංහ කොඩියේ පැන්ඩලා අඳින්නේ ඇයි කියලා එතකොට තේරුම් ගනියිය.


1. සටහන- මම පැන්ඩෙක් ඇන්දේ සිංහ කොඩියක නොවේය, පැන්ඩා කොඩියක කියලා ඔය ජපනා කිවා නම් එහෙම පොලෝසියට කට උත්තර නැති වෙනවාය.

2. සටහන- සිංහ කොඩියට කරපු  මේ හදිය ගැන අපේ දේශප්‍රේමි කට්ටිය සද්ද නැත්තේ මොකද කියලා බැලුවා නම් හොඳය.

3. සටහන- පැන්ඩා වෙනුවට චීන මකරා දැම්මොත් කොහොමට හිටීවිද කියලා මට හිතුනෙමි.


Thursday, December 13, 2012

ලංකාව ශිෂ්ඨ කිරීම


පහුගිය දාක,අවුරුදු අසූ ගනන් වල අග බාගේ ඉන්න ඉතා  මහලු මිනිස්සු තුන්දෙනෙකුට අපූරු අවස්ථාවක් ලැබුණා. ඒ තමා දෙවියන්වහන්සේ හමු වෙලා තමන් කැමති ඕනෑම එක ප්‍රශ්නයක් අහන්න. මතක් කරන්න ඕනෑ , මේ මහල්ලෝ තුන්දෙනා රටවල් තුනක බව . චීනේ, ඇමෙරිකාවෙ, හා ලංකාවේ.

මුලින්ම චාන්ස් එක ලැබුනේ නාකි චීනාට.මිනිහා හරිම  දේශප්‍රේමියෙක්. සමහර විට ලංකාවේ අය ආශ්‍රය කරලා ද දන්නේ නැහැ, මෙච්චර දේශප්‍රේමියෙක් වුනේ. එයා දෙවියන්වහන්සේගෙන් මෙහෙම ඇහුවා

"අනේ දෙවියනි, මගේ රට ඇමෙරිකාවත් පරද්දලා ලෝක බලවතා වෙන්නේ කවද්ද?"

"තව අවුරුදු සීයකින්" දෙවියෝ කිව්වා.

ඒක ඇහුනා විතරයි චීන මහල්ලා ඉකි ගගහා අඬන්න ගත්තා. දෙවියෝ ඇහුවා මේ මොකද අඬන්නේ? අවුරුදු සීයකින් හරි ඔහෙගේ රට ලෝක බලවතා වෙනවනේ කියලා.

එතකොට චීන මහල්ලා ඉකි ගගහා කියනවා "අනේ දෙවියනේ ඒ වාසනාවන්ත දවස දකින්න තරම් කාලයක් මට ජීවත් වෙන්න බැරි නිසයි මම ඇඬුවේ " කියලා.බලන්න දෙශප්‍රේමේ නේද?

ඔන්න ඊ ලඟට ගියේ ඇමෙරිකන් කාරයා .මිනිහාටත් තිබුණේ රට ගැන ප්‍රශ්නයක්.

"දෙවියන්වහන්ස, අපේ රට මේ කරදර වලින් මිදිලා සෞභාග්‍යමත් , සාමකාමි රටක් වෙන්නේ කවදාද" ඇමෙරිකන් මහල්ලා ඇහුවා.

"තව අවුරුදු පනහකින් " දෙවියෝ කිව්වා. මේක ඇහුනාම ඇමෙරිකන් මහල්ලාත් හො‍ටු හූර හූර  අඬන්න ගත්තා. " අනේ ඒ දවස වෙනකම් මට ජීවත් වෙන්න ලැබෙන්නේ නැහැනේ" කිය කියා.

මේ වගේ කතාවල කවදත් සාමාන්‍යයෙන් වෙන විදිහට අන්තිමට චාන්ස් එක ලැබුණේ ලංකාවේ වයසක ලොක්කාට. මිනිහත් නොන්ඩි ඇණ ඇණ දෙවියන්වහන්සේ ලඟට ගිහින් ඇහුවා ප්‍රශ්නයක්.

" අනේ දෙවියන්වහන්ස, මගේ රට ශ්‍රී ලංකාව ශිෂ්ඨ සම්පන්න රටක් වෙන්නේ කවදාද?"

මේ ප්‍රශ්නේ ඇහුණා විතරයි දෙවියන්වහන්සේ ඊරියක් වගේ වැලපෙන්න පටන් ගත්තා.

ලංකාවේ පොරට තාම හිතාගන්න බැරිලු මේ මොකද කියලා.

Monday, December 10, 2012

වෛද්‍ය විද්‍යාවේ හාස්කම්



ඊශ්‍රායලයේ ,රුසියාවේ ,ජර්මනියේ හා ලංකාවේ වෛද්‍යවරු හතර දෙනෙක් කතා කරමින් හිටියා.

" අපේ  රටේ වෛද්‍ය ශාස්ත්‍රය කොච්චර දියුණුද කියනවා නම් මිනිහෙකුට තව කෙනෙකුගේ වකුගඩුවක් බද්ධ කලා , මිනිහා සති හතරකින් සම්පූර්ණයෙන් සනීප වෙලා රතු මුහුද හරහා බෝට්‍ටුවකුත් පැද ගෙන ගියා" ඊශ්‍රායල් දොස්තර කිව්වා.

" හුහ් , ඕක මොකක්ද, අපේ රටේ මිනිහෙකුගේ හෘදය වස්තුවක් අයින් කරලා වෙන එකක් බද්ධ කලා. මිනිහා සති දෙකෙන් බයිකාල් විල හරහා පීනුවා" රුසියන් කාරයා කිව්වා.

"හෙහ්, හෙහ්, අපි මොලේ පිලිකාවක් තිබ්බ මිනිහෙකුට අලුත් මොලයක් හයි කරා. මිනිහා සතියෙන් නැගිටලා අත්ලාන්තික් සාගරය හරහා බෝට්‍ටුවකින් ගියා" දෙවැනි වෙන්න අකැමැති ජර්මන් කාරයාත් කිව්වා.

" ඔව්වත් වැඩද මල්ලි. ඔව්වත් වැඩද? " ලංකාවේ දොස්තර කිව්වා

 " අපි මොලේ කලඳක් නැති මිනිහෙක් ගෙනැත් රටේ ජනධිපති කරා. අවුරුදු හතයි ගියේ. දැන් රටෙන් භාගයක් මිනිස්සු ඕස්ට්‍රේලියාවට යන්න බෝට්‍ටු පදිනවා".

Friday, December 7, 2012

පොරජාතන්තරේ


අනේ සුසානෝ මම කොළඹ යනකොට
බුහ් බුහ් හඬක් ආවා දියවන්නා පැත්තෙන්
මොකැදයි කියා වට පිට බලන කොට
ප්‍රජාතන්තරේ ගිහින් ...............ට
 
(බල්ලාට, විහිලුවංශට, මැරවින්ට)
(ඔබට සිතෙන පරිදි සුදුසු වචනයෙන් හිස් තැන පුරවා ගන්න )

Sunday, December 2, 2012

ජාතික සමගිය ,සංහිදියාව හා තවත් දෑ

බටහිර ගැති , එන් ජී ඕ ඩොලර් වලි න් යැපෙන , ආණ්ඩු විරෝධී, දේශද්‍රෝහින්  මොනවා කීවත් ශ්‍රී ලංකාවේ ආණ්ඩුව යුද්ධයෙන් පීඩාවට පත් දෙමල ජනයාගේ මානව අයිතිවාසිකම් ආරක්ෂා කරමින් , යුදයෙන් බිඳුනු සිත් සුවපත් කරමින් ජාතින් අතර සමගිය හා සංහිදියාව  ගොඩ නැගීම වෙනුවෙන් කොතරම් කැප වෙනවාද යන්න පෙන්වන අපූරු ඡායාරූප පෙලක් පහත දැක්වේ.





උපකුලපතිවරයාගේ සම්ප්‍රදායික අවසරය පවා නොගෙන ,යාපනය සරසවියේ සිසු නේවාසිකාගාරවලට කඩා පැන සිදු කල සෝදිසි මෙහෙයුමට එරෙහිව එහි සිසු සිසුවියන් විසින් පැවැත්වූ සාමකාමි උද්ඝෝෂණයට දරුණු ලෙස පහර දී සිසුන් අත් අඩංගුවට ගැනීමෙන් නොනැවතී , දැන් සිසු නායකයින්ගේ නිවෙස් වලට රාත්‍රියේ කඩා පැන ඔවුන් පැහැරගෙන යාමද අරඹා තිබේ.  මෙවැනි ක්‍රියාවලට  මේ ආශ්චර්යලන්තයේ කියන්නේ යුදෙන් බිඳුනු සිත් සුවපත් කිරීම, ජාතින් අතර සංහිදියාව ගොඩ නැගීම ආදි වශයෙනි.

Thursday, November 22, 2012

සිහින දකින කුමාරයා-CHINA SAT 12


මගේ පාසැල් කාලයේ අපූරු මිත්‍රයෙක් සිටියේය. අපි ඔහුට විහිලුවට කිව්වේ සේතං කියාය. (සේතුං නොවේ). මේ සේතං අමු කපටියෙකු විය. ඔහුට වියදමට ගෙදරින් දෙන මුදල් හෙවත් පොකට් මනි වියදම් නොකර අපට ණයට දෙන්නට ඔහු පුරුදුව සිටියේය. ඉන්පසු ,පාසැලින් කට්ටි පැන චිත්‍රපටි බලන විටද, ගුරුවරුන්ට හොරෙන් විවේක කාලයේ සිගරට් බොන විටද, කඩසෝරු කන විටද අප ඔහුට වියදම් කල යුතුය. මක් නිසාද යත් ඔහුගේ මුදල් සියල්ල අපිට ණයට දී ඇති බැවිනි.

 අපට ණයට දුන් මුදලින්ම කා බී සැනහෙන සේතං ඉන්පසු ණය මුදල් ඉල්ලා කරදර කරන්නට පටන් ගනියි. ඔහු අපට දුන් මුදල් සියල්ල , ඔහුට වියදම් කල ප්‍රමාණයත් ඇතුලත්ව ,ශතයක්වත් අඩු නැතිව අප ආපසු ගෙවිය යුතුය.

මට මේ සේතං මතක් වූයේ ශ්‍රී ලංකාව චීනයේ උදව් ඇතිව  අභ්‍යවකාශ යුගයට  පිවිසෙන්නේ යැයි මේ දිනවල කෙරෙන කසු කුසු නිසාය.

අපගේ හිතමිත්‍ර, මා ඕ සේතුංගේ අනුප්‍රාප්තිකයන් විසින් පාලනය කරනු ලබන ගිනි පොලී කාර , මහජන චීන සමූහාණ්ඩුවට ශ්‍රී ලංකාව ඉහල අහසේ චන්ද්‍රිකාවක් ‍රැඳවීමට අවශ්‍ය විය. 1998 මැයි 30 වනදා චීනය විසින් CHINASAT -5A නමින් චන්ද්‍රිකාවක් කක්ෂගත කර තිබුනේය. එහි ආයු කාලය අවසන් වෙමින් පවතින නිසා අලුතින් CHINA SAT -12 නමින් වෙනත් චන්ද්‍රිකාවක් එම ස්ථාන‍යේ ‍රැඳැවීමට ඔවුන් සැලසුම් කලෝය.

මේ සඳහා අවශ්‍ය බර පැන සොයා ගැනීමට ඔවුන් භාවිතා කලේ මා කලින් කිව් සේතංගේ ආර්ථික න්‍යායයි.
දරුවන්ගෙන් අඩක් මන්දපෝෂණයෙන් පෙලෙන රටක, ජනගහණයෙන් බහුතරයක් දිලිඳු බවේ රේඛාවෙන් පහල දිවි ගෙවන රටක  ජීවත් වන පුත් කුමාරයෙකුගේ සිතේ පහල වූ සිහිනයක් ලෙසින් එය මෙරටට ගොඩ බැස්සවීමට චීනුන් සමත් විය. ඒ සඳහා චීනය  අපට ඩොලර් මිලියන 320ක් ණයට දුන්නේය. එනම් රුපියල් මිලියන 41,600 හෙවත් රුපියල් බිලියන 41 පමණය.  මේ මුදල මෙරට සෞඛ්‍යයට වෙන් කරන වාර්ෂික මුදලින් තුනෙක් එකක් පමණය.

එවන් වූ මේ ව්‍යපෘතිය මෙරට මාධ්‍ය විසින් හඳුන්වන්නේ ,"ශ්‍රී ලංකාව අභ්‍යවකාශ යුගයට පිවිසෙයි, ශ්‍රී ලංකාවේ පළමු චන්ද්‍රිකාව " ආදි වශයෙනි.

මෙම  ශ්‍රී ලංකාවේ ඊනියා  පළමු චන්ද්‍රිකාව එහි සැබෑ නම වන  Zx-12 හෙවත් ChinaSat-12 හෙවත් ZHONGXING-12  වෙනුවට ලංකාවේ ලැප්ටොප් මාධ්‍ය විසින් හඳුවන්නේ Supreme Sat-1  ලෙසයි.

එතරම් විශාල මුදලක් වියදම් කර අද උදේ  ගුවන් ගත වීමට නියමිතව තිබූ චන්ද්‍රිකාව නියමිත වෙලාවට ගුවන් ගත කර ගැනීමටවත් නොහැකි විය. ඒ චීන තාක්ෂණයයි. චීනය ලබා දුන් ණය මුදලකින් , චීන විද්‍යාඥයින් විසින් සැලසුම් කර, චීන ඉංජිනේරුවන් විසින් චීන තාක්ෂණය යොදා ,චීනයේම නිෂ්පාදනය කල "ශ්‍රී ලංකාවේ ප්‍රථම චන්ද්‍රිකාව" චීනයේ ම අභ්‍යවකාශ මධ්‍යස්ථානයක සිට චීන රොකට්‍ටුවක ආධාරයෙන් අද උදේ කක්ෂ ගත කිරීමට නියමිතව තිබූ අතර ඉන් පසු එය  පාලනය කරන්නේද චීන යේ සිට චීන්නු විසින්මය. එය හරහා හුවමාරු වන දත්ත සියල්ල පාලනය කරන්නේ ඔවුන්ය.

අප අභ්‍යවකාශ යුගයට පිවිසෙන්නේ එසේය.  මෙම චන්ද්‍රිකාව හා ශ්‍රී ලංකාවට ඇති එකම සම්බන්ධය නම් ශ්‍රී ලංකාවේ ජාතික කොඩියක් එහි අලවා තිබීම පමණි. සමා වෙන්න තව තිබේ. එම චන්ද්‍රිකාව වෙනුවෙන් අප ලබා ගත් ඩොලර් මිලියන 320 ආපසු ගෙවීමට පොඩි එකාගේ කිරිපැකට්‍ටුවේ සිට බදු ගෙවීමටත් එයට ඇතුලත්ය. තවත් තිබේ .  ඇයි ......පුත් කුමාරවරුන්ගේ හීන ...

Friday, November 16, 2012

හොඳ සූස්තියක් ගසාලා රතු බූන්දියක් හපාලා

 
සැලෙන ලෙලෙන දලුව විලස ‍රැවුල නටෝලා
‍රැවුල නටෝලා,... ‍රැවුල නටෝලා
ඔය හොකර ජකර මුකරි කටෙන් හරුප කියලා
හරුප කියාලා... හරුප කියාලා

හිස් හුලං පිරුණු ඔලුව බෙල්ල උඩින් තියාලා
උඩින් තියාලා...උඩින් තියාලා
මේ සංස්ථාවේ පරණ යකඩ ගුල්ලෝ ගසාලා
ගුල්ලෝ ගසාලා... ගුල්ලෝ ගසාලා
 
එලු ‍රැවුල් පොදක් කට වටේට පෙනෙන්නේ
ජෙල් ගොඩක් ඔබේ කෙස් කලඹේ දිලෙන්නේ
ලොකු ෆෝන් එකක් ගෙනල්ලා, ට්‍රි ට්‍රීං ට්‍රීන් කියාලා
මුගේ කතාවටයි මීහරකුන් නැවෙන්නේ
 
ඇයි විමල් මලේ 13 ටම බනින්නේ
ලෙමන් පෆ් ද බොට හීනෙන් පෙනෙන්නේ
හොඳ සූස්තියක් ගසාලා රතු බූන්දියක් හපාලා
සී ජේ ගේ නඩුත් උඹයි අහන්නේ


Wednesday, November 14, 2012

අධ්‍යාපනයට 6% කටත් වඩා වෙන් කරයි- නිර්මාල්ට කට උත්තරත් නෑ



අධ්‍යාපනය වෙනුවෙන් දල ජාතික නිෂ්පාදිතයෙන් 6% වෙන් කරන ලෙස ඉල්ලමින් සරසවි ඇදුරන් මාස තුනක් තිස්සේ වැඩ වර්ජනයක නිරත වූ අතර ,රජය එයට කදිම පිලිතුරක් දී තිබේ.

අයවැය ඉදිරිපත් කරමින්  මුදල් ඇමති උතුමාණන් පැවසුයේ අපේ රට අධ්‍යාපනයට දල ජාතික නිෂ්පාදිතයෙන් 4.1 % පමණ වියදම් කරන බවයි. ඒතුමා කියන පරිදි, පිටරටවල ඉගෙන ගන්න යන වියදම්, ටියුෂන් ගාස්තු වැනි දේවල් ද එයට අයිතිය.

ඒ අනුව බලන කල  පෙනී යන්නේ ගියේ අධ්‍යාපනයට සරසවි  ඇදුරන් ඉල්ලු 6%ටත් වඩා අප රට වියදම් කරන බවයි. පහතින් දැක්වෙන්නේ ඒ පිලිබඳ විස්තරයයි.

එතුමා කියන පරිදි ටියුෂන්, පිටරට ඉගෙනුම ජාත්‍යන්තර පාසල් ආදි සියලු දේට 4.1 %

මෙන්න එතැන් සිට

පාසල් යාම සඳහා වෑන් වලට - 3%

ටියුෂන් යාම සඳහා බස් ගාස්තු- 2%

ටියුෂන් යන දවස් වල දවල් කෑම - 4%

ටියුෂන් කට් කර චිත්‍රපටි බැලීමට- 2.1%

ටියුෂන් යාම සඳහා ඇඳුම්වලට-2.3%

ටියුෂන් වල ඉන්ටවල් එකේ සිගරට් බීමට- 4.3%

ටියුෂන් එකේ යාලු වෙච්ච කෙල්ලන්ට චොකලට් අරන් දීමට -8.7%

යාලු මිත්‍රයන් සමග එක්ව සතියකට සැරයක් සූස්ති ඇදීමට- 1.8%

විභාග ඉවර වුනු දා අරක්කු බීමට- 1.2%

රෑට පාඩම් කරන විට නයිට් කඩෙන් කොත්තු කෑමට- 3.56%

ලමයින්ගේ පොකට් මනී වලට- 10%

පිටරට අධ්‍යාපනය සඳහා යන විට ශීත ඇඳුම්වලට- 1.67%

එයාර්පෝර්ට් එකේ දී පීසා කෑමට- 4.5%

ටැක්සියකින් නවාතැනට යාමට- 4.2%

එකතුව 53.4%

තව වියදම් බොහෝ තිබෙන නමුත් සරසවි ඇදුරන්ගේ  6% ඉල්ලීම පසු කර බොහෝ දුර ගොස් ඇති  නිසා මෙයින් නවත්වමි. නිර්මාල් දැන් මොකද කියන්නේ. කට උත්තරත් නෑ නේද?

සටහන- මෙවර අයවැයෙන්   අධ්‍යාපනයට රුපියල් බිලියන 154.2 ක් ද, සෞඛ්‍යයට රුපියල් බිලියන 125 ක්ද වෙන් කරද්දී දැයට කිරුළ ප්‍රදර්ශනයට රුපියල් බිලියන 60ක් ම දී තිබේ. 

Sunday, November 11, 2012

කාර් රේස්- Homage to the 2013 Budget

 
රේසින්.... රේසින් රේසින් රේසින්
 
රේස් කාර් පදින පුතේ මගේ පුතේ මගේ පුතේ
 
පානුත් නැති මිනිස්සුන්ට රේස් කාර් ගෙනත් දෙන්න
රේස් කාර් පදින පුතේ මගේ පුතේ මගේ පුතේ
 
කිරිපිටි නැති හිඟන්නන්ට රේස් කාර් ගෙනත් දෙන්න
රේස් කාර් පදින පුතේ මගේ පුතේ මගේ පුතේ
 
පඩි ඉල්ලන ගොරකයින්ට රේස් කාර් ගෙනත් දෙන්න
රේස් කාර් පදින පුතේ මගේ පුතේ මගේ පුතේ
 
රේස් කාර් පදින පුතේ මගේ පුතේ මගේ පුතේ
රේසින්.... රේසින් රේසින්  රේසින්
 
සටහන- මා විසින් හුදී ජන පාන් සංවේගය උදෙසා ලියන ලද මේ ගීතය ඇගේ පරණ තනුවකට ගායනා කිරීම සඳහා ගරු  ඩලස් ඇමතිතුමාගේ ප්‍රියම්බිකාව වන ගරු  ප්‍රදීපා දර්මදාස ගායිකා තුමිය වෙත යැවීම සඳහා ලියවුනකි. 

Thursday, November 8, 2012

ඔබාමා ගැන ලියැවුණු ගී පද


 
කලු ජාතිකයෙක් වන බැරක් ඔබාමා ඇමෙරිකාවේ ජනාධිපති වුනාම ඇමෙරිකානුවන්ටත් වඩා ජොලියක් ගියේ ලංකාවේ හිටි සමහරුන්ටය.
 
දැන් ඉතින්  අපි වාගේ තුන්වැනි ලෝකේ රටවලට ඇමෙරිකන් කාරයා  හොඳට සලකයි කියලා එයාලා හිතු නිසාය. බුෂ්ටත් වඩා හොඳින්  බුෂ් නවත්තපු තැන ඉඳලා එයා වැඩේ කරගෙන ගියා.ඇමෙරිකන් කලු ජාතිකයෙක් නොවේ ඇස්කිමෝවෙක් ජනාධිපති වුනත් ඇමෙරිකාවේ කොල්ලකාරි ප්‍රතිපත්ති වෙනස් කරන්නේ නැති බව එයාලාට දැන් හොඳින් තේරෙනවා ඇති.
 
මේ පහතින් පල වෙන්නේ 2009 කාලයේ ඔබාමා මුල් වරට දිනු කාලේ අපිට ලැබුණු ඊ මේල් එකක්. ඒකේ විදියට මේ පහලින් තියෙන සිංහල ගීත ඔක්කොම  ඔබාමා ගැන ලියවුනු  සිංහල ගීත.
 
Obama  hamuwuna me ira handa yata...... - Divulgane

Obama  thurule gee gayana wele.. - WD Amaradewa

Obama  samaga athinatha ganna dawasa.. - WD Amaradewa

Obama  peluuda nododa handuu sitha.. - Milton Mallawarachchi

Obamage  neth deka wage.. - HR Jothipala

Obamage  nam.. Mama obe nam.. - HR Jothipala

Obamage  Swarnamali.. - HR Jothipala

Mata waasana.. Obamata  waasana ... Obamata  mataoba waasana..... - Priya Sooriyasena

Obamage  num bendi adaren -- Chandrasena Hettiarachchi

Obamata  himi ne obata mema himi ne- Priya Sooriyasena

Obama  Athahera Wenwee yanabawa ,denagannata labuna - Milton mallawarachchi

සිංහල ගායකයෝ මෙච්චරම ඔබාමා ගැන ගී ලියන්නේ එයා අපේ රාවණ පරපුරට සම්බන්ධ ද කියලා හොයලා බලන එක වටිනවා. මම හිතනවා  වර්ගපූර්නිකාව ලියන මීවනපලානේ ජයරත්න ශූරින් මේ ගැන හිතයි කියලා.

Wednesday, November 7, 2012

ආශ්චර්යයේ හිඟ මුදල්


                                                   ආශ්චර්යය කරා වේගයෙන් යාමට ගෙන ආ අශ්වයෙක්

අපේ රට ශ්‍රී ලංකාවය. ඒක තියෙන්නේ ඉන්දියන් සාගරය පතුලේය සාගරයේය. අපේ රට ඉතා ශීඝ්‍රයෙන් ආශ්චාර්ය කරා යන බව අපේ රටේ නායක තුමාලා හැම වෙලාවේම කියන්නෝය. එතුමාලා එකතු වෙලා බොහෝ මහන්සියෙන් රට ආශ්චර්ය කරා ගෙන යන්නේය. අපේ රට ආශ්චාර්ය කරා යන විදිය මේ අවුරුද්දේ අය වැය ඇස්තමේන්තුවලින්ද පේන්නේය.

සිරි ලංකාවේ ආනයන වියදම ඩොලර් බිලියන 22 ක් ය. රුපියල් වලින් නම් බිලියන් 2860 ක්ය. රුපියල් කෝටි දෙලක්ෂ අසූ හය දාහක්ය.  අපනයන ආදායම ඩොලර් බිලියන 11ක්ය. දැන් ඔය ගනුදෙනුවේ හිඟය නොහොත් ගෙවුම් ශේෂය ඩොලර් බිලියන 11ක් නොහොත් රුපියල් කෝටි එක්ලක්ෂ හතලිස්තුන් දාහක්ය.

දැන් මේ වියදම පියවා ගන්නේ කොහොමද? ඉතා ශීග්‍රයෙන් ආසියාවේ ආස්චර්ය බවට පත් වන අපි මේ ඩොලර් බිලියන 11න් හයක් ම පියවා ගන්ට හදන්නේ විදේශගත ශ්‍රමිකයන් එවන මුදල් වලින්ය. පැලෑන ගසා තිබෙන්නේ එහෙමය. මේ විදේශගත ශ්‍රමිකයන් කියන්නේ අරාබියේ වහල් සේවයේ යෙදෙන අපේ අම්මලා , අක්කලා හා නංගීලාය. ( ඊට අමතරව සිටිතොත් බොහෝම සුලු ගනනක්ය).

ලෝකෙට ආශ්චර්ය පෙන්නන්ට හදන්නේ අපේ අම්මලා ,අක්කලා හා නංගිලා අරාබියට විකුණලාය. සම් මස් නහර විද පරාල ඇණ ඇන ගෙන එන්ට අරාබියට විකුණලාය. හාම් පුතුන්ගේ ලිංගික පීඩාවලට ලක් වෙන්ට, අත පය හතර හන්දි කඩා ගෙන  මිනී පෙට්ටි වලින්  එන්ට අපේ සහෝදරියෝ විකුණලාය.


මේ විදියට පැලෑන් ගහන්නේ  අපි කාන්තාවන් මැද පෙරදිග වහල් සේවයට යවන්නේ නැතැයි වේදිකාවල උඩ  පනිමින් කෑ ගහන කට්ටියමය.

 අපේ කට්ටිය මුලු බරම දාලා තියෙන සංචාරක ව්‍යාපාරයෙන් හොයාගන්ට හිතන් ඉන්නේ ඩොලර් බිලියන 1ක් පමණය. රට වටා හෝටල් ගහමින් , කැසිනෝ නීතිගත කරමිනුත් සංචාරක ව්‍යාපාරෙන් හම්බ වෙන්නේ එච්චරය. ඒ වගේ හය ගුණයක් හොයන්ට හිතන් ඉන්නේ රටේ ගෑණු ටික අරාබියට විකුණලාය.

තවත් ඩොලර් බිලියන එකක් හොයන්නේ ආණ්ඩුවේ දේපල බද්දට දී හෝ විකිනීමෙන්ය.ඒ කියන්නේ ඉතුරු ඉඩකඩම් ටිකත් විදේශ  කොම්පැනි කාරයන්ට විකුණලාය.

අපි නෙලුම් පොකුණු, නෙලුම් කුලුනු, අධිවේගී මාර්ග හදාගෙන ආශ්චර්යයට යන්නේ එහෙමය.

සටහන- ඔය ඔක්කොම කලත් ලැබෙන්නේ ඩොලර් බිලියන 8 ක් පමණය. ඉතුරු ඩොලර් බිලියන 3 හොයන්න තමා මේ දවස් වල අන්තර් ජාතික මූල්‍ය අරමුදල පස්සේ යන්නේ . අන්න ඒක තමා  පහුගිය දවස් වල ලිං වලටත්  බදු ගහන්න එහෙම ලෑස්ති වුනේ. ඒක තමා දේශප්‍රේමි නැට්ට දෙපැරන්ද අස්සේ ගහගෙන මූල්‍ය අරමුදල කියන විදියට නටන්නේ. 


Monday, November 5, 2012

වීරවංශ හා වාසුදේව - අයියා මල්ලී වාගේ



 
වීරවංශ ඇමති තුමා 13 වැනි ව්‍යවස්ථා සංශෝධනය ඉවත් කළ යුතු යැයි කීම ගැන තමාට හිනා යන බව වාසුදේව ගරු ඇමති තුමා කියා තිබේ. වාසි දේව වාසුදේව ඇමති තුමා එසේ කියා ඇත්තේ වීරවාංශලා අමුඩේ මල පහ වෙන තෙක්  මොන තරම් තැටමුවත් ආණ්ඩුව නම් කීයටවත් 13 සංශෝදනය අත හරින්නේ නැති බව දන්නා නිසාය.

 අපිත් මේ බව මීට කලින් කියා ඇත්තෙමු. මක් නිසාද යත්  අපේ දේශප්‍රේමි ආන්ඩුවේ ප්‍රතිපත්ති තීරණය කරන්නේ ඉන්දියාව ,චීනය බඳු බලවතුන් නිසාය. කවුරු මොනවා කිව්වත් ඉන්දියාව 13 ආපිට හරවන්ට දෙන්නේ නැත. ඒ ගැන සැකක් තියා ගන්ට ඕනෑ නැත.

එසේ නම් වීරවංශලා මෙසේ මෛක්‍රපෝන කෙල වලින් නාවන්නේ මන්ද?

උත්තරය හරි සරලය. ඔවුන් ඒ ඉ‍ටු කරන්නේ මහානුභාවසම්පන්න මහ රාජෝත්තමයානන් වහන්සේ බලු ගැත්තරයන්ට කරන්ට යැයි පවරා තිබෙන කාරියයි.එනම් සතියකට දෙකකට වතාවක් මොකක් හෝ ජිමික් එකක් පෙන්වා මහජන අවධානය තමන් වෙත හරවා ගැනීමය. ඔවුන්ගේ  දේශප්‍රේමී රස්නය අඩු වන්නට නොදී තබා ගැනීමය. 

එවිට ආණ්ඩුව අධිකරණය අල්ලා කණ පිට ගැසුවත්, බඩු මිල අඟහරු ග්‍රහලෝකෙට ගියත්, වංචාව දූෂණය නීති ගත කරත් ,සුදු වෑන් තමාගෙම ගෙදර එවුන් අල්ලා ගෙන ගියත්, පඩි වැඩි කරනු වෙනුවට අඩු කරත් ,  මහජනයාට කමක් නැත. ඔවුන් වීරවංශලාගේ ජිමික් බලමින් දේශප්‍රේමයෙන් ඔද වැඩී ජාතිකාභිමාන ගී ගයමින් සිටිනු ඇත. ඒ වෙනුවෙන් මේ විහිලුවංශලාට ඇති තරම් හරි හම්බ කරගන්නට ඉඩ දී තිබේ. රට සවාරි ලැබේ . ඊට අමතරව උපවාස කරන විට ලෙමන් පෆ් හා තැඹිලි වතුරද ලැබේ .

අපිට නම් ඒ ගැන හිනා යන්නේ නැත. අපිට ඇති වන්නේ දුකකි. ඒ කලක් මහා විප්ලවවාදින් ලෙස පෙනී සිටි උන් අද වැටී ඇති වන්දිභට්ට තත්වය නිසා නොවේ. මුන්ගේ මේ බොරුවලට තවමත් ‍රැවටෙන උන් මේ රටේ සිටින නිසාය.

අනික් කාරණය නම් වීරවංශ ගැන මෙසේ කියන වාසිදේව  , අති භයානක   ඒකාධිපති පාලනයකට  පාර කපන 18 වැනි සංශෝධනයට , කොහෙවත් නැති විදේශ කුමන්ත්‍රණ ගැන වීරවංශලා කියන බයිලා ගිරවුන් මෙන්  පුනරුච්චාරනය කරමින් අත් දෙකම ඉස්සු අයෙක් වීමය.

ගරුතර වාසිදේව මැතිසඳ, ඔබත් විහිලුවංශ තරම්ම ජෝකරයෙකි. ඔබ දෙදෙනාටම ඇත්තේ එකම  ප්‍රශ්නයකි. එනම් විලි ලැජ්ජාව නැති කමයි.

Friday, November 2, 2012

ස්ටාර්ස්ලා ඕනෑ නැත, එකම ස්ටාර් මම පමණය



අග විනිසුරු ශිරාණි බණ්ඩාරනායකට එරෙහිව ඇයව පත් කල ආණ්ඩුව විසින්ම දෝෂාභියෝගයක් ගෙනවුත් ඇත.

මේ දෝෂාභියෝගය මගින් රාජපක්ෂ රෙජිමය   රටට දෙන පණිවිඩය කුමක්ද?

උඹලා කොතරම් ලොක්කන් වූවත් අපිට එරෙහි වූවොත් වන්නේ මෙයයි. උඹලා සියලු දෙනා ජීවත් විය යුත්තේ අප කියන ලෙසටය. බෙරේ ගසන්නේ අපය . ඒ තාලයට නුඹලා නැටිය යුතුය.

එසේ නොවුනහොත් නුඹලා  අතීතයේ අපට කොපමණ බැල මෙහෙවර කර තිබුනත් අප නුඹලාට කෙලවන්නෙමු.

මෙරටට පොරවල් අවශ්‍ය නැත. අවශ්‍ය අපට අවැසි ලෙස  වැනෙන රූකඩ පමණි. මෙහි සිටිය යුතු එකම පොරවල් වන්නේ අපය . අප පමණය.

පණිවුඩය එයයි.

මේ පණිවුඩය මීට පෙර ඉතා පැහැදිලි ලෙස කීප වතාවක් කියා තිබේ.

ඒ අතරින් ඉතාම ප්‍රසිද්ධ ලෙස එය කියා සිටියේ කලක් රාජපක්ෂලාගේම හමුදාවේ හමුදාපති ජනරාල් සරත් ෆොන්සේකාටය.

තමන් ගැන මහත් අධිතක්සේරුවකින් සිටි හා තවමත් සිටින ජනරාල් ෆොන්සේකා යුද්ධයේ තම භූමිකාව නිසා තමන් සිංහල ජනයා අතර මහත් වීරයෙක් වී ඇතැයිද තාරකාවක් වී ඇතැයිද සිතුවේය. ඒ නිසා ඔහු රාජපක්ෂ රෙජිමයට අභියෝග කලේය.

එහෙත් රාජපක්ෂලාට තමන් හැර වෙනත් තාරකා රටේ සිටීම ප්‍රිය නැත. එසේම තමන්ට අභියෝග කරන උන් කොහොමටත් ප්‍රිය නැත. ඔවුනට අවශ්‍ය නිවට කීකරු නියාලු අතවැසියන් පමණි. තමන්ට අවශ්‍ය පරිදි නැටවෙන වීරවංශලා බඳු රූකඩ පමණි. ඒ නිසා  වීර ෆොන්සේකාගේ වීර චාරිකාව කෙලවර වූයේ වසර දෙකක් සිර ගෙයි තැපීමෙනි.

දැන් අලුත්ම ගොදුර ශිරාණි බණ්ඩාරනායකය.  ඇය කුමන හෝ හේතුවකට ඔවුනට කීකරු නොවී ස්වාධීනව සිටීමට තීරණය කර තිබේ. මේ තරම් පැහැදිලි ලෙස පණිවුඩය දී තිබියදී එය අවබෝධ කර ගන්නට බැරිනම් අහිංසක උතුමාණන් මක් කරන්නද?

දැන් ඇයට පහර දීමට පටන ගෙන තිබේ. සරත් ෆොන්සේකාගේ සිදු වීමේදී  මෙන් නොව මෙහිදී පහර වදින්නේ සමස්ත අධිකරණ පද්ධතියටමය .

මෙම දෝෂාභියෝගයෙන් මෙරට අධිකරණ පද්ධතියට කියා සිටින්නේ අපට අවශ්‍ය පරිදි තීන්දු නොදුනහොත් උඹලාට වන්නේද මෙයයි යන්නයි.

මෙරට ජනයාට ප්‍රජාතන්ත්‍රවාදය පිලිබඳව යම් හෝ බලාපොරොත්තුවක් ඇති කලේ අධිකරණය ස්වාධීන ව කටයුතු කරන්නේ යැයි තිබූ අදහසයි. මෙරට ඊනියා වාමාංශිකයන්ගේද සහය ඇතිව සම්මත කල 18 වැනිසංශෝධනයෙන් මෙරට ප්‍රජාතන්ත්‍ර වාදය  මිනීපෙට්ටියකට දමා වසා තිබේ . එම මිනී පෙට්ටියට ගසන අවසාන ඇණය මෙම දෝෂාභියෝගයයි.

Wednesday, October 31, 2012

"අපි රාජාණ්ඩුවකට කැමති නැහැ" නොහොත් වාමාංශිකයන්ගේ බබා හුකුම්


 
අද ක්‍රි.ව 2017  දෙසැම්බර්  මස 15 වෙනිදා.

වේලාව මධ්‍යහන දොලහයි.

මේ රෝස මල් එෆ්.එම් සේවයේ ප්‍රධාන ප්‍රවෘත්ති ප්‍රකාශයයි.

 ශ්‍රී ලංකාණ්ඩුව  රාජාණ්ඩුවක් බවට පත් කිරීම සඳහා  මේ වසර මුලදී  ගෙන ආ 24 වැනි ව්‍යවස්ථා සංශෝධනයට පක්ෂව චන්දය භාවිතා කිරීමෙන් තමන් මහත් වරදක් කර ඇති බව ශ්‍රිලංකා කොමියුනිස්ට් පක්ෂය, ලංකා සමසමාජ පක්ෂය හා වාසුදේව නානායක්කාර මහතාගේ පක්ෂය ( ඒකේ නම මට මතක නැතිය)  ඇතුලත් වාමංශික එක්සත් පෙරමුණ ඒකාබද්ධ නිවේදනයක් නිකුත් කරමින් කියා සිටී.

කෙසේ නමුත් එම සංශෝධනය ගෙන එන අවස්ථාවේ තිබූ විෂයානුබද්ධ කරුණු සැලකිල්ලට ගෙන මනෝ මූලික තත්වයන් හා විෂය මූලික තත්වයන් පිලිබඳව ගැඹුරින් අධ්‍යයනය කොට, ශ්‍රී ලංකාවට එරෙහිව සිදු වෙමින් පවතින බටහිර අධිරාජ්‍ය බලවේග වලට විරෝධතාවක් පෙන්වීමටත්, මාක්සීය කේන්ද්‍රීය අපසාරනය හා අභිසාරනය තත්වයන් පාලනය කරමින් ,විකල්ප මානව සාරධර්ම පිලිබඳව ඇති උග්‍ර පාරභෞතික මතවාදයන් විඛණ්ඩනය කරමින් රටේ භෞමික අඛණ්ඩතාව සමග ගැට ගැසුනු ලෙනින් වාදි මූලධර්මයන්ට අනුගත වෙමින් ආර්ථව චක්‍රය මැනවින් පාලනය කිරීම  උදෙසා එම අවස්ථාවේ රාජාණ්ඩු පනතට පක්ෂව චන්දය දුන් නමුත් තමන් රාජාණ්ඩු ක්‍රමයකට  මහත්සේ විරුද්ධ බවත් එම නිවේදනයේ වැඩි දුරටත් සඳහන් වේ.

එසේම පසු ගිය මාසයේ පැවත් වූ මහ රජ තුමාගේ ඔ‍ටුනු පැලඳවීමේ උත්සවයට හා  ඊයේ පැවත් වූ ඔ‍ටුන්න හිමි කුමරා නම් කිරීමේ උත්සවයට පවා තමන් සහභාගි වූයේ මෙම අතිශය සංකීර්ණ  ප්‍රතිමාක්ස්වදි ප්‍රවණතාවන් පරාජය කිරීමට බවත් , නමුත් එය  ඓතිහාසික වැරද්දක් බව ඊයේ  සවස තේරුම් ගත් බවත් එම පක්ෂ විසින් නිකුත් කල නිවේදනයේ වැඩි දුරටත් දැක්වේ.

සටහන- තමන් 18 වැනි ව්‍යවස්ථා සංශෝධනයට පක්ෂ වීමෙන් වැරද්දක් කර ඇති බව කොමියුනිස්ට් පක්ෂයේ රාජා කොල්ලුරේ මහතා පසු ගියදා පැවසීය.

Tuesday, October 23, 2012

විමල්, අපි ඔබ සමගයි-බොරු නෙවේ ඇත්තටම


                                                          කඩුවක් ‍රැගෙන කොස් කොටන්නට යන තරුණියක්

13 වැනි ව්‍යවස්ථා සංශෝධනය අහෝසි කිරීම සඳහා ජනමත විචාරණයක් ගෙන ආ යුතු යැයි ජාතික නිදහස් පෙරමුණේ රාල නායක විමල් වීරවංශ මහතා පවසා තිබේ .

ඒ මහතා දරණ මොන මතයට විරුද්ධ වූවත් මෙතැනදී නම් අපි ඔහු සමග එකඟය. මේ පලාත් සභා වලින් කිසි පලක් නැතැයි ඔහු කියන විටද  අපි ඔහු සමග එකඟය .

ඒ ගැන අපි පොඩ්ඩක් විමසා බලමු.

13 වැනි සංශෝධනය ගෙන ආවේ ශ්‍රී ලංකාවේ ජාතික ගැටලුවට විසඳුමක් ලෙස දෙමළ ජනයාට යම් කිසි ස්වයං පාලනයක් දෙන්නටය.

එහෙත් අපි මීට පෙරද කියූ පරිදි රටේ අනික් පලාත්  සියල්ලටම මේ වන විට පලාත් සභා ලැබී  තිබුනද ජාතික ගැටලුව  තදින්ම බල පා තිබෙන උතුර පලාතට තවම පලාත්  සභාවක් නැත. දෙන පාටක් ද නැත. පලාතේ ජනතාවට පාලන බලය ලබා දීම සඳහා ගෙන ආ පලාත් සභාවේ තීන්දු තීරණ ගන්නේ මධ්‍යම රජය විසින් පත් කල හිටපු හමුදා නිලධාරියෙකි.

එම නිසා අපි පලාත් සභාවලින් පලක් නැතැයි කියන්නේ ඒ අර්ථයෙනි. එසේ නැතිව විමල් කියන ජාතිවාදි අර්ථයෙන් නොවේ. එනම් යුද්දෙට නැති කඩුව කොස් කොටන්නද  කිව්වා වගේ උතුරට නැති පලාත් සභා දකුණට මොකටද අසමිනි.

එසේම පලාත් සභා අහෝසි කිරීම සඳහා ජනමත විචාරණයක් ගෙන ආයුතු යැයි කියන විට අපි එකඟ වෙන්නේ ද කොන්දේසි සහිතවය.

එනම් ජනමත විචාරණය පැවත් විය යුත්තේ උතුර හා නැගෙනහිර දෙපලාතේ පමණි. තම ජීවිතය ගැන තීන්දු ගත යුත්තේ එහි වෙසෙන  ජනයා මිස වීරවංශලාගේජාතිවාදි ගුලි ගිල දමා මත් වී සිටින   උන්    නොවේ.
සටහන-
1 . හැකි නම් සාධාරණ චන්දයක් තියා උතුරේ හා නැගෙනහිර ජනතාව ලවා පලාත් සභා එපා යැයි කියවාගන්න.

2. එම දෙපලාතේ ජනයා එපා යැයි කිව්වත් ඉන්දියාව පලාත් සභා අහෝසි කරන්නට ඉඩ නොදෙන බවට මෙන්න කැට.මේ බව විමල් ඇතුලු ආණ්ඩුවේ ලොකු ලොක්කන් හොඳින්ම දනී.

3. එසේ නම් මේ පලාත් සභා වලට විරුද්ධව ගෙන යන හඬ  අණ්ඩුවේ කුජීත   අය වැය කෙරෙන් ජනතා අවධානය වෙනතක ඇදීමක් මිස අන් කුමක්ද?

Saturday, October 20, 2012

බියොන්ඩ්ෆ්‍රේම්ගේ හා අපේ මියන්මාර් ගමන


2010 ජනාධිපතිවරණයට පසු , එවකට සිටි ප්‍රකට බ්ලොග් කරුවෙකු වන බියොන්ඩ් ෆ්‍රේම් තමන් මියන්මාරය කරා නැව් නගින බව උපහාසයෙන් යුතුව කියා සිටියේය
.
ඔහු ව්‍යංගයෙන් කිව්වේ හමුදා පාලනයක් පවතින මියන්මාරය ලංකාවට වඩා හොඳ බවයි.

ඔහු  එසේ කියද්දී පෙරමුණේ රාල වැනි රාජපක්ෂික අන්තේවාසික බ්ලොග් කරුවන් බියොන්ඩ් ෆ්‍රේම්ව පට්ට ගැසුවේ ඔහුගේ ව්‍යංගය පවා වටහා ගත නොහැකිවය.

යම්තම වසර  තුනක් ගත වී තිබේ . ආශ්චර්යමත් ලංකාවේ ජනී ජනයා දැන් මියන්මාරය බලා නැව් නැගීමට පටන් ගෙන තිබේ.

මුලින්ම වැඩේ පටන් ගෙන ඇත්තේ ලංකාවේ වාහන ආනයන කරුවන්ය. වාහන වලට පනවා ඇති අධික බදු නිසා තම වෙලඳාම කඩා වැටී ඇති නිසා නව වෙලඳපොලවල් සොයා යාමට මෙසේ වෙලෙන්දෝ පෙලඹ සිටිති.

තමන්ගේ නාස්තිකාර වියදම් සඳහා මුදල් සොයා ගැනීම සඳහා වත්මන් පාලක රෙජිමය වාහන වලට පමණක් නොව  කුඩා දරුවාගේ කිරිපිටිපැකට්‍ටුවේ සිට අත්‍යවශ්‍ය ආහාර දක්වා වන සෑම දෙයකටම  පොදු ජනයාට දරා ගත නොහැකි අහස උසට බදු ගසමින් සිටියි.

එසේ බදු අය කර සොයා ගන්නා මුදලින් ජාතියේ ලොකු හා පොඩි පුතුන් හින්දි නිලියන් ගෙන්වමින් හා මාර්ග වසමින්  පිස්සු කෙලිද්දී  රටේ පොදු ජනයාට වේලක් ඇර වේලක්වත් කෑමට නම් මියන්මාරයට හෝ අඩු තරමෙන් මාල දිවයිනටවත් නැව් නැගීමට නම් නොදුරේ දී සිදු වනු නො අනුමානය.

Friday, October 19, 2012

බන්ඩුලගේ ගුන්ඩු


ඇමති ගුන්ඩුල බණවර්ධන හිටපු ටියුෂන් කාරයෙකි. එතුමා දේශපාලනෙට ආවෙත් ටියුෂන් වලට පිං සිද්ද වෙන්ටය.

 කුජිනෝල්ඩ් රෙරේ, ග්‍රෙහාන් ලාල් මෝරෝ, ඒ විදියට ටියුෂන් වලින් දේශපාලනේට ආපු උදවියය.   අපේ සක්විති රනසිංහ තුමාත් තව ටික කාලයක් හිටියානම් දේශපාලනේට එනවා නිසැකය.

ගුන්ඩුල බනවර්දන ඇමති තුමා චිරාත් කාලයක් ටියුෂන් කොරපු නිසා ටියුෂන් මාස්ටර් ලාගේ සෙල්ලම් ගැන එතුමා අත් දැකීමෙන්ම දන්නවාය.  ඒක නිසා එතුමා එක්ක පරණ සෙල්ලම් දාන්ට බැරිය.

විබාග වලට සතියක කාලයක් ඇතුලේ සාකච්ඡා , සම්මන්ත්‍රණ ආදිය තියන එක එතුමා  තහනම් කලේ ඒ නිසාය. විභාග ප්‍රශ්න පත්‍ර  කලින් පිට වුනත් මාස්ටර්ලා ලමයින්ට ඒවා කියලා දෙන්නේ ඒ අන්තිම  කාලයේ බව එතුමා හොඳින්ම දන්නවාය. ඒ අත් දැකීමෙන් වෙන්ට ඕනෑය.

ඔන්න දැන් එතුමා වඩේ වැඩේ දුන්නේය. ප්‍රශ්න පත්‍ර පිට වුනත් ලමයින්ට කියලා දෙන්ට බැරිය.ඇයි අන්තිම සතියේ සම්මන්ත්‍රණ කරන එක තහනම් කරලා නොව. දැන් ඉතින් දාහ දෙදාහ ඉන්න ටියුෂන් ක්ලාස් වලට යන හිඟන පැටවුන් විබාග වංචා කොරලා හමාරය. (ගෙවල්වලට ගුරුවරු ගෙන්න ගෙන ඉගෙන ගන්න සල්ලි කාර උන් එහෙම කුජීත වැඩ කරන්නේ නැත. අනික කොලත් මොකද?)

පහු ගිය සිස්සත්ත විබාගේ ප්‍රශ්න පත්‍රය කලින් පිට උනා කියලා ගුරු සංගම් කියන කොට ඒක එහෙම උනේ නැතිය කියලා ගුන්ඩුල බනවර්දන ඇමති තුමා අමුඩේ මල පහ වෙන කම් කෑ ගැහුවේය. එහෙම චෝදනා කරපු ගුරු සංගම් කාරයෝ අල්ලා හිරේ දානවා කියලත් කීවෝය. මේ විදියට විබාග වලට චෝදනා කරන්නේ විබාග දෙපාර්තමේන්තුව ගැන අප්‍රසාදයක් ඇති කරන්ටය, ඒක ලංකාවේ අධ්‍යාපනයට විරුද්ද කුමන්ත්‍රනයක් ය ආදි වශයෙන් එතුමා බඩ යනකම් කෑ ගැහුවෝය.

එහෙනම් දැන් මේ විදියට අලුතින් නීති රීති දාන්නේ අම්මගේ රෙද්දට දැයි එතුමාගෙන් අහන්ට එතුමා හිරේ දාපු ගුරු සංගම් කාරයෙක් වත්  නැත්දැයි අපි බලාන ඉන්නෙමු.


Wednesday, October 17, 2012

බුදු අම්මෝ අපි නැ‍තෝ



දකුණු ඉන්දියාවේ ඉදි කරන න්‍යෂ්ඨික බලාගාර වලින් ලංකාවට බල පෑමක් එල්ල වෙන්නේ නැති  බවට  අපට ඉස්තීර වසයෙන්ම දැන ගන්නට ලැබී තිබේ. ඒ අනුව එම න්‍යෂ්ඨික බලා ගාරයක අනතුරක් සිදු වුනත් ලංකාවට  විකිරණ කාන්දු වන්නේ නැත.
 
අප ඒ පිලිබඳව මේ තරම් විස්වාසයකින් යුතුව කියන්නේ ඊයේ අපට අසන්නට ලැබුණ එක්තරා කාරණයක් නිසාය.
 
විදුලිබල ඇමති චම්පික රණවක මැතිතුමා ඊයේ (15 දා ) එතුමාගේ අමාත්‍යාංශයේ පැවති පුවත් සාකච්චාවකදී ස්ථීරවම කියා සිටියේ දකුණු ඉන්දියාවේ න්‍යෂ්ටික බලාගාර වලින් ලංකාවට කිසිම් අබල පෑමක් නැති බවයි. එතුමා හත් අතේ දිවුරමින් මේ බව පවසා තිබේ.
 
අපේ චම්පික ඇමති තුමා එහෙම කියනවානම් තවත් මොන කතාද?
 
බලපෑමක් නෑ කිව්වොත් නෑ තමා ඉතින්.
 
මතකනේ, පහුගිය දවස් වල එතුමා පොලවේ හැපි හැපි කිව්වා මොන තරම් නියඟයක් ආවත් විදුලිය කපන්නේ නැත කියලා. බලන්න පොලව කරුකුට්ටම් වෙන්න පෑයුවත් විදුලිය කැපුවේ නැහැනේ.ශෝක් ඇමතිතුමා නේද?
 
ඒ වගෙම එතුමා කිව්වා විදුලි බල මණ්ඩලේ කොච්චර පාඩුවට දිව්වත් පොදු ජනයාගේ පිට ඒ බර පටවන්නේ නැතිය කියලා. කිව්වා වගේම කරා ,හොඳා, නැත්ද?
 
ඒ නිසා අපේ රටේ ජහ මනයා මහජනයා ඔය දකුණු ඉන්දියාවේ හදන න්‍යෂ්ඨික බලාගාර ගැන කිසි බයක් ඇති කර ගන්ට ඕනෑ නැත.
 
සටහන- හැබැයි ඉතින් විනෝදෙට වගේ ගෙදර යට කොන්ක්‍රීට් වලින් පොඩි බංකරයක් හදා ගෙන , ගෙදර  වහල දොර ඊයම් තහඩු වලින් ආවරණය කර ගෙන මාස දෙක තුනකට කෑම බීම ලෑස්ති කර ගෙන හිටියට කමක් නැහැ. බයකට නොවේ , විනෝදෙට හොඳේ. චම්පක මැතිතුමා කිව්වොත් කිව්වනේ. හිහ් .

Monday, October 15, 2012

ලංකා තලේබාන්


මෙතුවක් කල් තලේබාන් ලා හිටියේ ඇෆ්ඝනිස්ථානය, පාකිස්ථානය වගේ මුස්ලිම් රටවල පමණි.. දැන් ලංකාවෙත් තලේබාන් සංවිධානයක් බිහි වී තිබේ. එහි  නම බොදු බල සේනාව ය. ඔරිජිනල් තලේබාන් ලා සේම මේ තලේබාන් ලා ටත් තමන්ගේ ආගම හැර වෙන ආගම් නයාට අඳු කොල බඳුය.

එපමණක් නොවේ. බුද්ධාගමේ නිල ආරක්ෂකයා හා ප්‍රකාශකයා විදියට තමන්වම පත් කරගෙන සිටින මේ  ලංකා තලේබාන් ලා දැන් බෞද්ධයින්ට බුද්ධාගම අදහන්න හැටිද කියා දීමට පටන් ගෙන තිබේ. දැන් බුද්ධාගම අදහන්නට සිදු වී ඇත්තේ  ගලගොඩ අත්තේ කියන විදියටය. අනම් මනම් වලට ආවෝත් සුම්මා තමාය.

පිටිදුවේ සිරිධම්මට වගේම තමන් බුදු වී ඇතැයි කියන ගාල්ලේ  සිරිවර්ධනටත් මේ ආගමික පොලිසීයේ හිරිහැර විඳින්නට සිදු වුනේ වැඩි ඈතක නොවේ.

 බෞද්ධයින් වෙනත් ආගම්වලට හරවනවා යැයි කියමින් චෝදනා කර අල්ලා ගත් පිරිසක් මේ තලේබාන් බල සේනාව විසින් ශ්‍රී ලංකා පොලිසියට භාර දුන් පුවත අද දින පුවත්පත් වල පල වී තිබුනි.

යමෙක් ආගමකට අපහාස කරන්නෙ නම් හෝ වෙනත් නීතිවිරෝධී ක්‍රියාවක් කරන්නේ නම් ඒ ගැන නීති මගින් කටයුතු කල යුතු ආකාරයක් තිබේ.

එසේ නැතිව නීතිය තම අතට ගෙන මෙසේ ක්‍රියා කරන්නට ඊනියා බොදු බල සේනාවට බලයක් ලැබුනේ කෙසේද? ඔවුන් බුද්ධාගමේ ආගමික පොලිසීය වශයෙන් පත් කලේ කවුද?  කවදා සිටද?

අද මෙසේ වෙනත් ආගම් වලට හා බුද්ධාගමේ ම වෙනත් ඇදහිලි කරුවන්ට පහර දෙන මේ බෞද්ධ තලේබාන් ලා අනාගතයේ දී සැබෑ තලේබාන්ලා මෙන් මිනිසුන්ගේ නිදහසට බාධා කරන ක්‍රියා වලට නොපෙලඹෙතැයි සහතිකයක්  ඔවුන්ගේ මේ උමතු ආගම්වාදි ක්‍රියාවලට උඩගෙඩි දෙන ජනමාධ්‍ය  වලට දිය හැකිද?

පන්සල් නොයන අයට දඬුවම් කරන්නට, පන්සිල් අනිවාර්ය කරන්නට, ඇඳුම් පැලඳුම් ගැන නීති හදන්නට ඔවුන් අනාගතයේ දී ක්‍රියා නොකරනු ඇත්ද?

ඒ ආකරයේ මූලධර්මවාදයකට ලංකාව පත් කිරීමට පෙර මේ තලේබාන්  ක්‍රියා වල අනතුර හෙලිදරව් කිරීම සිහි බුද්ධියක් ඇති  සියලු දෙනාගේ වගකීමකි.

සටහන- බුද්ධාගම හෝ වෙනත් ආගම් ගැන අපේ උනන්දුවක් නැත. එහෙත් කැමති කෙනෙකුට තමන් කැමැති ආගමක් තමන් කැමති පරිදි ඇදහීමේ නිදහස තිබිය යුතු යැයි අප විශ්වාස කරමු.

Saturday, October 13, 2012

හොරිකඩ පන්දන් මූදට දක්කන්- පා ගේ පුංචි මොලේ


ඉස්සර කාලේ අප්‍රිකාවේ,දකුණු ඇමෙරිකාවෙ , කැලෑ වල හිටි නොදියුණු ගෝත්‍රිකයෝ කෑවේ මිනී මස්ය. උන් තමන්ගේ ගෝත්‍රයෙන් පිට මිනිහෙක්  අහු වුනොත් හෙම ඌ අරගෙන ගිහින් මරලා පුච්චලා හරි අමුවෙන් හරි කනවාය. කාලා මදිවට ඒ මිනිහාගේ ඇට කෑල්ලක් බෙල්ලේ හරි ඉණේ හරි එල්ල ගන්නවාය.

මේ විදියට අප්‍රිකාවේ හිටි එක ගෝත්‍රයක් පස්සෙ කාලෙක කැලෑ එලි වෙලා  උන්හිටි තැන් නැති වුනාම නොයෙක්  රටවල් වලට පැන ගොහින්  වෙස් වලාගෙන හිටියෝය.

එහෙම කට්ටියක් ලංකාවටත් ඇවිත් වෙස්වලාගෙන හොඳට ඉගෙන ගෙන විශ්වවිද්‍යාලවලටත් ගොහින් වෛද්‍ය  උපාධිත් ලබා ගත්තේය. ඊට පස්සේ ඒ ගෝත්‍රික කට්ටිය ඔක්කොම එක්කාසු වෙලා වෘත්තීය සංගමයකට බැඳුනේය.  ඒකේ නම රජයේ වෛද්‍ය නිලධාරි සංගමේය.

දැන් එතකොට ඔයගොල්ලෝ දැනගන්න ඕනෑ රජයේ වෛද්‍ය නිලධාරි සංගමේ දැන් ඉන්න නිලධාරි ටික අර මං කිව්ව අප්‍රිකානු ගෝත්‍රිකයෝ කියලා.

එයාලා  වෘත්තීය සංගම් කාරයෝ  උනාට හැබෑ අරමුණ පුලුපුලුවන් වෙලාවට තමන්ගේ ගෝත්‍රයෙන් පිට මිනිස්සු අල්ලගෙන මරලා කන එකය.

මේ ගොල්ලෝ මෙච්චර කල් වැඩිපුර කෑවේ තමන්ගේ සෞඛ්‍ය ක්ෂේත්‍රයේ කට්ටියමය. නර්ස් නෝනලා , එම්.එල්.ටී ලා සුළු සේවකයෝ වගේ කට්ටියය. එයලා තමන්ගේ වෘත්තීය සමිති වලින් සටන් කරලා මොක හරි දිනා ගත්තොත් ඒකට අකුල් හෙලන එක මෙයාලගේ ජන්ම පුරුද්දක්ය.

මෙයාලා කියන්නේ තම ක්ෂේත්‍රයේ පහලම ඉන්න කෙනාට වැඩිය 12 ගුණයක පඩියක් තමන්ට ඕනෑ කියලාය.

මේ ගෝත්‍රිකයෝ කට්ටිය ගණන් බලන්නේ අවම වැ‍ටුප රුපියල් 10,000 කියලාය. එතකොට උපරිම වැ‍ටුප 120,000 ක්ය.ආණ්ඩුවේ නිලධාරින්ට සාමාන්‍යයෙන් ගෙවන උපරිම වැ‍ටුප් දිහා බැලුවම මීට වඩා උපරිම වැ‍ටුපක් ලැබෙන්නට ඇති ඉඩ අඩුය. ඒ නිසා ම ගොල්ලෝ නොකියා  කියන්නේ තමන්ගේ වැ‍ටුප 120,000 දක්වා වැඩි කරලා පහල මට්ටමේ සේවකයින්ට 10,000 හිඟන පඩියක් විතරක් දුන්නම ඇති කියලාය.

කෙටියෙන් කිව්වොත් මෙයාල මේ හදන්නේ ආණ්ඩුවට උදව්වක් විදියට පහල මිනිස්සුන්ගේ පඩි වැඩි කරන්ට එපා කියන එකය.

මෙයාල සෞඛ්‍ය ක්ෂේත්‍රයේ අය විතරක් නොවේ කන්ට ගන්නේ . ඊයේ පෙරේදා මෙයාල තමන්ගේ වල්,  වනචාරි , ම්ලේච්ච  දීන ,ආන්ඩු ගැති ගතිය පෙන්නමින් විශ්ව විද්‍යාල ආචාර්ය සටනත් විරුද්ධ වුනේය.

මේ දවස් වල ඩීල් පා...නිය ලංකාවේ නැති හින්දා සටනට එවා තිවුනේ  හිටපු සෞඛ්‍ය සේවා අධ්‍යක්ෂටත් චරිත සහතික දෙන්ට ආපු න.ර.  වනචාරි ගෝත්‍රිකයාමය.

මේ ගොත්‍රිකයා කිසි හිරිකිතක් නැතිව කිව්වා ආචාර්යවරුන්ට පඩි වැඩි කරනවාට අපි විරුද්ධය, එයලාට වැඩි කලොත් අපිටත්  වැඩි කරන්ට ඕනෑය. ආචාර්යවරු විශේෂ කට්ටිඅයක් විදියට සලකන්න එපාය. ලංකාවේ ඉන්න සුවිශේෂම කට්ටිය අපිය ආදි වශයෙනි.

මේ උන්නැහෙලා ආයෙත් සැරයක් කොලේ  අර පරණ හොරිකඩ වැඩේමයි. ආචාර්ය සටනට ගහන්න ආණ්ඩුවට ආයුධ දීපු එක.

මෙච්චර හොරිකඩකම් කරන්න මොකද්ද ආණ්ඩුවත් එක්ක ඩීල් පා....නිය  දාගත්තු ඩීල් එක කියලා හොයලා බැලුවම හොරේ අහු වුනා.

රාජකාරි වෙලාවෙත් ප්‍රයිවට් ප්‍රැක්ටිස් කරන්න මෙයාලා  ආණ්ඩුවෙන් අවසර  ඉල්ලලා. සෞඛ්‍ය  ඇමතිගෙන්වත් , සෞඛ්‍ය ලේකම්ගෙන්වත් නෙවේ, ජනාධිපතිගෙනුයි , මල්ලිගෙනුයි. 
මෙන්න ඩීල් එක.

අපිට රාජකාරි වෙලාවේත් පුද්ගලික සේවයේ යෙදෙන්න අවසර දෙනවා නම් පෞද්ගලික වෛද්‍ය විද්‍යාල ඇති කරන එකට තියෙන අපේ සාමාජිකයන්ගේ විරෝධෙ අයින් කරලා දෙන්නම්. ඒ විතරක් නොවේ මීට පස්සේ ඕනෑම වෘත්තිය සමිති සටනකට විරුද්ධව හොරිකඩ කම් කරන්නම්.

හොඳයි නේද පා.. ගේ මොලේ.



Friday, October 12, 2012

මංජුලට දඬුවම් කලේ ආයතන සංග්‍රහය අනුව


අධිකරණ සේවා කොමිසමේ ලේකම් මංජුල තිලකරත්න මහතාට පහර දුන් හේතුව ඊයේ හෙලිවිය. කැබිනට් තීරණ දැනුම් දීම සඳහා ඊයේ පැවත්වූ මාධ්‍ය සාකච්ඡාවේදී මේ ගැන හෙලි කලේ කෙහෙලිය රමුක්වැල්ල මහතාය.

අධිකරණ සේවා කොමිසමේ ලේකම්වරයාට ප්‍රකාශ නිකුත් කිරීම හෝ මාධ්‍ය සාකච්ඡා පැවැත්වීම කළ නොහැකි නමුත් හෙතෙම රාජකාරිය ඉක්‌මවා කටයුතු කර ඇති බව රජයේ මාධ්‍ය ප්‍රකාශක ඇමැති  රඹුක්‌වැල්ල මහතා පැවැසීය.

මේ අනුව පෙනී යන්නේ අධිකරණ සේවා කොමිසමේ ලේකම් වරයා කර ඇති ඉහත වරදට දඬුවම් ලෙස ඔහුට පහර දී ඇති බවයි.  

සාමාන්‍යයෙන් රජයේ සේවකයෙක් මෙවන් වරදක් කල විට ගත යුතු පියවර ආයතන සංග්‍රහයේ සඳහන් වන අතර , මාධ්‍ය ප්‍රකාශ නිකුත් කිරීම හෝ මාධ්‍ය සාකච්ඡා පැවැත්වීම කළ විට දිය යුතු දඬුවම ලෙස  මුහුණ කට තලා පොඩි කර  දැමීම ලෙස ඉතා මෑතදී සංශෝධනය කර ඇත.

සටහන- මින් පසු සියලු රජයේ සේවකයින් මාධ්‍යවලට තොරතුරු ලබා දීමේ දී ඉතා ප්‍රවේශම් විය යුතුය.

Wednesday, October 10, 2012

විපස්සක දෙවියන්ගේ පොහොර


(තමන්ගේ කුඹුරේ කෙමක් කිරීමට යන ගෙවිලියක්)
 


අපේ නලින් සිල්වා මැති තුමාට දෙවියන් මාර සපෝර්ට් දෙන්නේය. මීට කලින් ආසනික් කේස් එක වෙලාවේ නාථ දෙවියන් ඇවිත් ෆුල් බැක් අප් එකක් දුන්නේය. ඒ සපෝර්ට් එක නිසා රජ රට වකුගඩු කන ආසනික් යකා  හොයා ගන්නට ඇහැක් විය.

නාථ දෙවියන් නොහිටින්ට එක  රජරට ගොවියකුගේවත් වකුගඩුවක් ඉතුරු වෙන්නේ නැත. දැන් කැළණිය විස්ස විද්දියාලේ විද්‍යා පීඨෙත් ,රජරට විස්ස විද්‍යාලේ වෛද්‍ය පීඨෙත් නාථ දේවාල දෙකක් හදා වකුගඩු රෝගෙට බෙහෙත් ගජරාමෙට කරගෙන යනවාය. අනුරාධපුර පැත්තේ ඉස්පිටිතාල ඔක්කොම වසා දමලාය. දේවාලෙන් ලෙඩ හොඳ කොරන කොට ඉස්පිටිතාල මොකටද කියා බම්බු ඇමති තුමා ඒවා වසා දැම්ම අතර ඒවායේ නාථ දේවාල හැදීමට මර්වින් තුමාට භාර දී තිබේය.

නාථ දෙවියන්  විතරක් නොව විපස්සක දෙවියනුත් අපේ නලින් තුමාට උදව් කරනවාය.ආසනික් පොලවට එකතු වෙන්නේ පොහොර හා කෘෂි  රසායනික නිසා බව නාත දෙවියන්ට පෙනුනත් , ඒ වෙනුවට මොනවා යොදා ගන්නදැයි එතුමා දැන හිටියේ නැත. ඒ නිසා නාත දෙවි තුමා ඒ වැඩේ ගැන පරීක්ෂණ කොරන්නට භාර දුන්නේ විපස්සක දෙවියන්ටය. ( නලින් තුමා චන්න ජයසුමනට වැඩේ භාර දුන්නා වගේය.)

විපස්සක දෙවියනුත් පරීක්ෂණ කරලා පොහොර හා කෘෂි රසායනික වලට විකල්පයක් හොයාගත්තේය. හැබැයි හොයා ගෙන , තමන්ට වැඩේ පවරපු නාථ දෙවියන්ට දැනුම් දුන්නේ නැත. ඒ වෙනුවට කෙලින්ම තමන්ගේ නමට පේටන්ට් එක ගත්තේය. දැන් ඒ නිසා ඒ පොහොර හඳුන්වන්නේ විපස්සක පොහොර කියාය.  මේ ගැන ලෝකෙට හෙලි කරන්ට වැඩේ භාර ගත්තේ අපේ නලින් සිල්වා තුමාය.

එතුමාට අනුව රසායනික හා කාබනික පොහොර දෙකම බටහිරයන්ගේ අදහස්ය. ඒ නිසා ඒවා හොඳ නැත.  ඒවා වෙනුවට විපස්සක පොහොර භාවිතා කරන්නට පුලුවන්ය.

විපස්සක පොහොර ගැන නලින් තුමා පහු ගියදා තිබුනු දෙරණ 360 වැඩසටහනේ දී හෙලි කලේ මෙසේය.

"අරකෙන් ටිකක් දානවා, මේකෙන් ටිකක් දානවා, කෙමක් කරනවා , පිරිත් ටිකක් කියනවා"

සටහන- එක්කෝ මූට පිස්සුය. නැත්නම් මේවා අහන බලන අපට පිස්සුය.

Monday, October 8, 2012

මේ රට මගේ රට මා ඉපදුන රට හැදෙන වැඩෙන රට මගේම මවු රට -2013 වර්ෂයේ 5 වසර ශිෂ්‍යත්ව විභාගයට අනුමාන ප්‍රශ්නයක්



අධිකරණ සේවා කොමිසමේ ලේකම්ට මැර පිරිසක් විසින්  පහර දී තිබේ.

එම පහර දීම

1. ටී-20 ක්‍රිකට් ලෝක කුසලාන ලංකාව දිනනු ඇතැයි සිතා එම උණුසුමෙන් පහරදීම  යටපත් කරනු හැකි වේ යැයි සිතා ආණ්ඩුව කළ එකක්.

2. ටී-20 ක්‍රිකට් ලෝක කුසලාන ලංකාව දිනනු ඇතැයි සිතා එම උණුසුමෙන් පහර දීම යටපත් කරනු හැකි වේ යැයි සිතා ආණ්ඩුව කළ එකක් බවට පෙන්වීමට ආණ්ඩුවේ හතුරන් කළ වැඩක්.
.
3.ටී-20 ක්‍රිකට් ලෝක කුසලාන ලංකාව දිනනු ඇතැයි සිතා එම උණුසුමෙන් පහරදීම යටපත් කරනු හැකි වේ යැයි සිතා ආණ්ඩුව කළ එකක් බව පෙන්වීමට තම හතුරන්  පහර දුන් බව  කීමට හැකි වේ යැයි සිතා ආණ්ඩුව කල වැඩක්.

4.ටී-20 ක්‍රිකට් ලෝක කුසලාන ලංකාව දිනනු ඇතැයි සිතා එම උණුසුමෙන් පහරදීම යටපත් කරනු හැකි වේ යැයි සිතා ආණ්ඩුව කළ එකක් බව පෙන්වීමට තම හතුරන්  පහර දුන් බව  කීමට හැකි වේ යැයි සිතා ආණ්ඩුව කල වැඩ ක් බව පෙන්වීමට ආණ්ඩුවේ හතුරන් කල වැඩකි...

5.ටී-20 ක්‍රිකට් ලෝක කුසලාන ලංකාව දිනනු ඇතැයි සිතා එම උණුසුමෙන් පහරදීම යටපත් කරනු හැකි වේ යැයි සිතා ආණ්ඩුව කළ එකක් බව පෙන්වීමට තම හතුරන්  පහර දුන් බව  කීමට හැකි වේ යැයි සිතා ආණ්ඩුව කල වැඩ ක් බව පෙන්වීමට ආණ්ඩුවේ හතුරන් කල වැඩක් බව පෙන්වීමට ආණ්ඩුව කල වැඩකි...

6.................

7....................

8..................

9......................

10.ඒ මහතා නාන කාමරයේ වැටී සිදු වූ අනතුරක් මිස පහර දීමක් සිදු වී නැත.

Sunday, October 7, 2012

දිවිනැගුමද දිවිනැසුමද?


1987 දී දහතුන් වැනි ව්‍යවස්ථා සංශෝධනය හා පලාත්  සභා  ගෙන ආවේ ශ්‍රී ලංකාවේ ජාතික ප්‍රශ්නයට විසඳුමක් ලෙස  දෙමල ජනයාට යම් තරමකට හෝ ස්වයං පාලනයක් දෙන්නටය. එසේ බිහි වූ පලාත් සභා දිවයිනේ අනෙක් සෑම පලාතකටම දුන්නත් දෙමල ජනයා වෙසෙන උතුරු පලාතේ තවම පලාත් සභාවක් පිහි‍ටුවා නැත.

සමෘද්ධි බැංකු වල තැන්පත්ව ඇති සමෘද්ධීලාභින්ගේ අනිවාර්ය ඉතුරුම් කෝටි 9000 කට අධික මුදල ඉතා  රහස්‍ය ලෙස  පාරිභෝජනය කිරීම සඳහා ගෙන එන දිවි නැසුම නැගුම පනත පලාත් සභා සියල්ලම සම්මත කල යුතු යැයි නීතියක් ශ්‍රේෂ්ඨාධිකරණය නියෝග කල පසු දැනට පිහි‍ටුවා ඇති  පලාත් සියල්ල වැඩි චන්දයෙන් එම පනත සම්මත කර දී ඇත.

තමන් සතුව තිබු බලයක් මෙසේ වැඩි චන්දයෙන් මහ ආණ්ඩුවට පවරා දීම පලාත් සභා පැත්තෙන් ගත් කල සිය දිවි නැසුමක් ම වේ. ආණ්ඩුව නැගෙනහිර පලාත් සභාවේ බලය වෙනුවෙන් මාරන්තික සටනක නියලුනේ මන්දැයි දැන් හොඳින්ම පැහැදිලිය.

දැන් ආණ්ඩුවේ සිටින ඊනියා වාමංශිකයන් ඇතුලු සියලු දෙනාට පලාත් සභා පිහිටවූ අරමුණ අමතකය. බස්නාහිර, වයඹ, දකුණ, සබරගමුව, මධ්‍යම, උතුරු මැද,ඌව හා නැගෙනහිර පලාත් සභා වලින් දිවිනැසුම නැගුම පනත සම්මත වූ නිසාත් උතුර පලාත් සභාව තවමත් පිහිටවා නැති නිසාත් එම පනත දැන් පාර්ලිමේන්තුවට ඉදිරිපත් කර සම්මත කර ගත හැකි යැයි ආණ්ඩුවේ න්‍යාචාර්යයන් සිතයි.

උතුරේ දෙමල ජනයාගේ ජාතික ප්‍රශ්නයට විසඳුමක් ලෙස ගෙන ආ 13 වැනි ව්‍යවස්තාවෙන් පලාත්සභාවලට පැවරූ බලතල සියලු පලාත් සබාවලින් විමසා මිස මධ්‍යම රජයට නොගත යුතු යැයි අධිකරණ කියද්දීත්  උතුර පලාත් සභාව සඳහා ආණ්ඩුවෙන්ම ආණ්ඩුකාරයා ලෙස  පත් කල හමුදා නිලධාරියාගේ අනුමැතිය ඒ සඳහා ප්‍රමාණවත් ආණ්ඩුව කියන්නේ නම්   ව්‍යවස්ථාව  කෙසේ වෙතත් අවම සදාචාරයවත් ඔවුන් නොසලකන බව නැවත වතාවක්  ඉතා පැහැදිලි ය.

තමන්ගේ පාත්‍රයට කඩා වැදුනු සෙනසුරා වෙනුවෙන් හිඟන්නන් ජය ගෝෂා නගයි නම් අප කුමක් කරන්නද?

Friday, October 5, 2012

හෙල උරුමය බටහිර පිල්ලියක් - නලින් ද සිල්වා හෙලි කරයි



මේ දිනවල විශ්ව විද්‍යාල ආචාර්ය සමිතිය විසින් ගෙන යනු සටන සහය දෙන සියල්ලන්ම බටහිර  ඩොලර් වලට නටන ඩොලර් කාක්කන් බව ඊයේ එම සංගමයේ සභාපති සමග රූපවාහිනි විවාදයකට එක් වෙමින් ආචාර්ය නලින් ද සිල්වා මහතා පැවසීය.

මෙහිදී නම් ගම් ඇතිවම කතා කල  ද සිල්වා මහතා ලංකා සමසමාජ පක්ෂය මෙන්ම ජාතික හෙල උරුමයද සිංහල සංස්කෘතියට එරෙහි විජාතික බලවේග බව පැවසීය.

ලංකා සමසමාජය සමග තමන් එක ගොඩට දැමීම ගැන හෙල උරුමයේ දේශප්‍රේමින්ට දැනෙන්නේ කෙසේ දැයි දැන ගැනීමට අපි පුලපුලා බලා සිටිමු.

සිංහල බෞද්ධ සංස්කෘතියේ එකම ආරක්ෂකයින් වශයෙන් පෙනී සිටින ජාතික හෙල උරුමයේ නායක කාරකාදින් වන චම්පක රණවක හා  අතුරලියේ රතන දේශප්‍රේමිනි, මෙය ඔබේ අවධානයටයි.

සටහන-1 ජාතික හෙල උරුමයේ දේශපාලන මණ්ඩල සභිකයෙක් වන කථිකාචාර්ය අනුරුද්ධ ප්‍රදීප් මහතා මේ දින වල විශ්ව විද්‍යාල ආචාර්ය සංගමය විසින් ගෙන යනු ලබන වෘත්තීය සටනේ ප්‍රමුඛ සටන් කරුවෙකි.  මෙම වර්ජනය ඇරඹීමටත් කලකට පෙර සිටම ඔහු අධ්‍යාපනය පෞද්ගලීකරණය කිරීමට එරෙහිව විශාල හඬක් නැගුවෙකි.

සටහන-2 ලිපියේ අවසාන වාක්‍ය සඳහා සාදර අනුග්‍රහය සිරස නිව්ස් ෆර්ස්ට් .

Thursday, October 4, 2012

එස්.බී පන්නමු හා වෙනත් එවැනි කථා


එස්.බී පන්නමු යන්න අද රට තුල ඉතාම ජනප්‍රිය සටන් පාඨයකි. මේ දිනවල සමහරුන් පෙන්වීමට  හා සමාජගත කිරීමට උත්සාහ කරමින් සිටින්නේ අධ්‍යාපන ක්ෂේත්‍රයේ ඇති වී තිබෙන ගැටලු සියල්ලට මුල එස්. බී දිසානායක ඇමතිවරයා හා බන්දුල ගුණවර්ධන ඇමතිවරයා බවයි. මේ මතය ඉදිරියට ‍රැගෙන යනවුන් අතර විමල් වීරවංශ හා ඔහුගේ ජාතිවාදි නඩයත්,ජාතික පුවත් පත් යැයි හඳුන්වාගන්නා දිවයින ,රිවිර හා සමහර විද්‍යුත් මාධ්‍යත්  ප්‍රමුඛ වේ.

මොවුන් සියලු දෙනාම වත්මන් රාජපක්ෂ ආණ්ඩුවේ කොන්දේසි විරහිත ආරක්ෂකයින්ය.
අද රජයේ සිටින එක ඇමතිවරයෙක්වත් රාජපක්ෂලාගේ අනුමැතියකින් තොරව  බරපතල  තීන්දු තීරණ කිසිවක් නොගන්නා බව ඉතාමත් පැහැදිලිය. මේ බව දැන දැන ම එස්.බී  පන්නමු බඳු සටන් පාඨ මතු  වන්නේ නියම වග උත්තරකරුවන් සැඟවීමටය. මෙම අර්බුද ඇතිවන නියම හේතු සැඟවීමටය.'

අද විශ්වවිද්‍යාල තුලත් පොදුවේ අධ්‍යාපන ක්ෂේත්‍රය තුලත් මතු වී තිබෙන අර්බුදය එස්.බී ගෙ ප්‍රශ්නයක් නොව වත්මන්  ආණ්ඩුව අන්තර්ජාතික මූල්‍ය අරමුදලට අවශ්‍ය පරිදි අධ්‍යාපන වියදම් ක්‍රමිකව කප්පාදු කිරීම නිසා වූවක් බව සැඟවීම ඔවුන්ගේ අරමුණයි. එය විශේෂයෙන්ම තමන් මහා ‍රැඩිකල් විප්ලවවාදින් යැයි කියමින් තම මෝඩ අනුගාමිකයෛන් රවටාගෙන සිටින  වීරවංශ වැන්නවුන්ගේ දේශපාලන පැවත්මට අත්‍යවශ්‍ය වේ.

එස්.බී ඇමතිවරයා අද තමන් ශ්‍රී ලංකාවේ සරසවි අධ්‍යාපනයේ ස්වාමියා වශයෙන් පෙන්වීමට උත්සාහ කලත් ඔහු මෙරට රාජ්‍ය සරසවි අධ්‍යාපනය වැනසීමට ආණ්ඩුවේ සැබෑ පාලකයින් විසින් යොදා ගනු ලබන රූකඩයක් පමණි.

මෙබඳු රූකඩ සිටීමේ විශේෂ වාසියක්ද රජයකට තිබේ. එනම් ප්‍රශ්නයක් ඔඩු දුවා දෑවන්ත මහජන විරෝධයක් පැන නැගුන විටෙක මෙවන් රූකඩ යක් පාවා දී සියලු වරද ඔහු පිට පැටවීමට හැකි වීමයි.

සරසවි ප්‍රශ්නය හෝ උසස් පෙල විභාග අර්බුදය නිසා රජය අපකීර්තියට ලක් වන විට එස්. බී හා බන්දුල ඇමතියන්ගේ ඇමතිකම් ඉවත් කර විරෝධය සමනය කර ගත හැක. එසේම කොමිස් සෙල්ලම් නිසා ඇතිවූ ඉන්ධන අර්බුද වලට වගකිව යුත්තා ලෙස සුසිල් ප්‍රේම් ජයන්ත ඉතා හොඳ බිලිබෝයි කෙනෙකි.
මොවුන්ගේ ඇමතිකම් ඉවත් කල විට සියලු ප්‍රශ්න විස‍ඳෙන බවට සිතීමට පුරුදු කල ජනතාවක් අද සිටින අතර එස්. බී ලා  දැන් දරන ඇමතිකම් වලින් ඉවත් කර වෙන ඇමතිකම් දුන්නත්  ඒ ගැන පවා කිසිවෙක් ප්‍රශ්න නොකරනු ඇත..


සටහන- මෙවැනිම තත්වයක්  1980 ගනන් වල අග කාලයේ ද ඇති විය. එකල තිබූ සියලු අර්බුද වලට වගකිවයුත්තා  ජනාධිපති ජේ ආර්. යැයි මතයක් සමාජ ගත වූ අතර එකල ඉතා ජනප්‍රිය සටන්පාඨයක් වූයේ  ජේ.ආර්. මරමු යන්නයි. කෙසේ වෙතත් පාලක පංතිය  ඉතාම කපටි ලෙස ජේ .ආර්. බලයෙන් ඉවත් කර ප්‍රේමදාස ඒ තැනට පත් කර ගත්තේය. ජේ ආර් මරමුයි කෑ ගසමින් උන් පිරිස් අන්ද මන්ද වී ගිය අතර ප්‍රේමදාස බලයට පැමිණ ජේ ආර් විරෝධීන්ගේ සියලු සටන් පාඨ සියතට ගෙන ඔවුන් සුනු විසුනු කර දැම්මේය.

Wednesday, October 3, 2012

Tuesday, October 2, 2012

පුහුල් හොරා කරෙන් දැනේ.



ගාල්ලේ විද්‍යාලෝක මහ විද්‍යාලයට රාජ්‍ය සේවා කොමිසන් සභාව විසින් නීත්‍යානුකූලව පත් කරනලද සියලු සුදුසු කම් සහිත  විදුහල් පතිවරයාට එහි සිසුන් හා දෙමව්පියන් විසින් පහර දී ඔහුගේ මෝටර් රථයට ද බරපතල හානි කොට එලවා දමා තිබේ. ඔහු තම පාසලට පැමිණීම ගැන මෙම පිරිස් අකැමති බව කියවේ. මෙම සිදු වීම පිලිබඳව පාසලේ වැඩ බැලූ විදුහල් පතිවරයාගේ වැඩ තහනම් කර ඇත.

නිසැකවම  මෙම මැර ක්‍රියාව එහි වැඩ බැලූ විදුහල්පතිවරයාගේ අනු දැනුම ඇතිව වූවක් විය යුතුය.අලුතින් එන විදුහල්පති එලවා ගන්නට උවමනාව ඇත්තේ ඔහුටය. එසේ නැතිව සිසුන්ට හා දෙමව්පියන් ස්වේච්ඡාවෙන් එය කලා යැයි කීම සමාන වන්නේ තමන්ම ගස් බැඳගත් සමෘද්ධි නිලධාරියාගේ ක්‍රියාවට හා ජායික් හිල්ටන් හෝටලයේ තමන් විසින්ම ඔලුව තුවාල කරගත් මේජර්වරයාගේ ක්‍රියාවටය.

කෙසේ වෙතත් මෙවන් තකතීරු මෝඩ වැඩක් බලවතුන්ගේ ආරක්ෂාව නැතිව කරන්නට තරම් එම වැඩ බලන විදුහල්පතිවරයා මෝඩයෙක් විය නොහැක.

 වැඩ බලන විදුහල්පතිකම්  බොහෝ විට සැමවිටම ලැබෙනුයේ පලාතේ දේශපාලනඥයින්ගේ ඇම්බැට්ටයින්ටය. පස්ස හම යන තෙක් කඩේ ගොස් ලබා ගත් විදුහල්පතිකමට කෙලින්නට කවුරුන් හෝ එන විට වැ.බ. විදුහල්පතිට මෙන්ම , තම වැයික්කියේ ඇති ආයතනයක තමන්ට අඩංගු නැති එකේක් සිටීම දේශපාල-අඥානයින්ද කැමති නැත.

සටහන- මෙම සිදුවීම ගැන නි.කථානායක ච.වීරක්කොඩි මැතිතුමා පැවසුවේ විදුහල්පතිවරුන් පත් කරන්නට අවශ්‍ය පාසල් ඕනෑ තරම් තිබියදී මෙසේ හොඳින් වැඩ කරගෙන යන පාසල් වලට අලුත් විදුහල්පත්වරුන් ඒවායේ  වැඩ අවුල් කරන්නේ මෝඩ නිලධාරින් හා කොමිසම් සභා බවයි. ඔවුන්ට දඬුවම් කල යුතු බවත් ඔහු කීවේය.
-

Monday, October 1, 2012

නාට්ටිය කෑලි-අංක 1 . විස්සවිජ්ජාල ආචාර්යවරුන්ට විරුද්දව ලෙමන් පෆ් සටන අරඹයි


- ඒයි විමලේ මෙහෙ වරෙන්

- ඇ..ඇයි සර්

-මෙහෙ වර මෙහෙ වර.‍තෝ කොහෙද මෙච්චර දවසක් හැංගිලා හිටියේ.

- කොහෙවත් නැහැ සර්ර

-නැත්නම් ඇයි උඹ මෙච්චර දවසක් අර විස්ස් විජ්ජාල කාරයන්ගේ හුට පටේ ගැන වචනයකත් කිව්වේ නැත්තේ?

- කිව්වා සර්ර

- පල ඩෝ බොරු කියන්නේ නැතිව, කිව්වා ලබ්බ

-නෑ සර්ර්, මම අපේ තට්ට විජයා, ගූ දාස සරමසේකර ලොක්කා වගේ ඈයෝ ලව්වා කියෙව්වා

-හුක්, කියෙව්වා,ඇයි උඹට ඉස්සරහට ඇවිත් කියන්න බයද?

- බය නෑ සර්ර, ඒ වුනාට මම අර ජෙප්පෝ එක්ක ඉන්න කාලේ කෑගැහුවේ අද ඔය විස්ස විජ්ජාල කාරයෝ කියන කතා කියලානේ.. ඉතින් නිකම් ලජ්ජයි ලජ්ජයි වගේ..හ්හික්,හික්

- අනේ පල යන්න ,තොගේ ලජ්ජාව, ‍තෝ මෙච්චර දවසක් කරේම ලජ්ජාව තියෙන වැඩනේ.

-හික් හික් සර්රුත් කියන කතා

- දැන් මෙතැන හිකි හිකි ගාන්නේ නැතිව පලයන් ගිහින් අදම ඔය විස්ස විජ්ජාල කාරයින්ට විරුද්දව කතා කරපන්...

-හරි සර්ර් මේ යනවා

- ඒයි ඔහොම හිටපන් කලුවා මාරපන් ගියා වගේ යන්නේ නැතිව.
.
- ඇයි සර්ර්

-ඇත්ත කියපන්, උඹ හැංගිලා හිටියේ අර තිරිකුනාමලේ පිස්සු හුටන්ට ඇමති කමක් දුන්නේ නෑ කියලා නේද,

-අනේ නෑ සර් ඔය එක එකාට ඇමතිකම් අරන් දෙන්න මට පිස්සුයැ? මම මේ මගේ එක ආරක්ෂා කර ගෙන ෂේප් එකේ ඉන්න හදන්නේ,,, හික්.හික්

 -හ්ම්ම් , පලයන් දැන් ගොහින් ටීවී එකේ , රේඩියෝ එකේ ‍රැස්වීම් වල අර විස්ස විජ්ජාල කාරයන්ව පතුරු ගහපන්..
-රයිට් සර්ර්, මේ ගියා
......................................
....................................

..................................
 -ආදරණීය අම්මේ ,තාත්තේ , සහෝදරයා සහෝදරිය, අද මේ දේශප්‍රේමි ආණ්ඩුවට විරුද්දව මහා කුමන්ත්‍රණයක් විදේශ බලවේග , ඩයස්පෝරාවත් එක්ක එකතු වෙලා ආරම්බ කරලා තියෙනවා...මුන් මේ නිදහස් ආද්දියාපනය , සීයට හය කිය කියා එන්නේ ඒ කුමන්ත්‍රනේ ප්‍රතිපලයක් විදියට, අපි ඒක හොඳින්ම දැන ගන්න ඕනේ අම්මේ තාත්තේ, මේ දේශරේමි ආන්ඩුවට එරෙහිව තියෙන බලවේග අපි හඳුනා ගන්න ඕනේ. පිරපාහරන් පරද්දපු එක ගැන අපේ රටත් එක්ක මාරන්තික වෛරයකින් ඉන්න , ඇමෙර්කාව, නෝර්වේ, එංගලන්තේ ,ජර්මනිය, ජපානේ, චීනේ.. සොරි සොරි චීනේ නෑ හොඳේ , චීනෙ හරි හොඳායි .. මුං ඔක්කොම එකතුවෙලා .. මේ ආචාර්ය සංගම් කාරයෝ පස්සේ අද ඉන්නේ ඔය විදේශ බලවේග, එන් ජී ඕ ඒජන්තයෝ, යූඑස් ඒ කාරයෝඅ, කේජීබී කාරයෝ,, ආයෙත් සොරි හොඳේ ,කේජීබී නැහැ හොඳේ.. මේ සකල අදිරාජ්‍යවාදි බලවේග, බලල් අත්, කුකුල් කකුල්, හරක් පීකුදු, හෝව්,...බලල් අත්, අම්මපා ඔව්ව්ව්
-