Monday, June 20, 2016

මගේ විරු සොහොයුරු සොහොයුරියනි



 රාජපාක්ෂික දඩ බල්ලන්ගේ කෲර මර්ධනයට නොබියව මුහුණ දෙමින් ,  නිදහස් අධ්‍යාපන අයිතීන් මෙන්ම පොදු ජන නිදහස වෙනුවෙන්ද ඔව්හු  සටන් කළහ.

ලාංකීය ශිෂ්‍ය  ව්‍යාපාරය ගොඩ නංවමින් තම ලේ, කඳුලු, දහඩිය  මතින් ඔව්හු එය පෝෂණය කළහ. 

එදවස පැවති ජේ ආර් ජයවර්ධන ආණ්ඩුවේ නිල හා නොනිල වධකාගාර තුල අත් පා කපා දමා, ඇස් , කන් උගුලවා  හිසට ඇණ ගසා  ඔවුන් මරා දැමුණි. 

සමූහ මිනී වලවල් තුලත්, මහමග අද්දර ගිනිගත් ටයර යටත් ,ඔව්හු තම අවසන් ගමන් ගියහ.

 පෞද්ගලික සුඛ විහරණයන් පසෙක ලා  පොදු අරමුණක්   වෙනුවෙන්   සටන් කරමින්,  අනේක වධ බන්ධනයන්ට ගොදුරු වී , ඒ අඳුරු හා බියකරු යුගයේදී ඔව්හු  තම ජීවිතය කැප  කළහ.

මේ සටහන ඔවුන් වෙනුවෙනි


 රස නැති කැවිලි කා වන පොත් කළ  දරුවෝ
රකුස් සෙනග විත් උන් හට වද     කෙරුවෝ
විසල් නුවර ලෙස මුළු රට ගිනි   දැමුවෝ
හදින් සිදුරු වූ  උණු රුධිරය   හෙලුවෝ
 
ගිනිගත් ටයර යට නුඹ දැවුණේ ද  ස කි
ගඟ දිය මතින් මුහුදට පා වී ද  සකි
සගයන් සමග පොදු වලකට වී ද සකි
අඩුවක් කන්න උඹ ආයෙත් ඒ ද සකි

(ජූනි 20 ජාතික ශිෂ්‍ය වීර දිනයයි)

Saturday, June 18, 2016

සෝමවංශයට පසු වදනක්


 
සෝමවංශ අමරසිංහ යනු කිසි දිනක මගේ ප්‍රියතම දේශපාලකයෙක් වී සිටියේ නැත. ඇත්තම කිවහොත් ඔහු ගැන තරම් දුරට අප්‍රසාදයක්ද මගේ හිතේ තිබුණේය. විශේෂයෙන් පැය ගණන් ගත කරමින් ඔහු වේදිකා මත කරන අග මුල නැති කතා ගැන මා සිටියේ දැඩි අප්‍රසාදයකිනි.
 
එහෙත් පුද්ගලයෙකු වශයෙන් ඔහු ඉතාම ප්‍රිය මනාප විය. 89 දෑවන්ත සංහාරයෙන් පසු විනාශ වූ ජවිපෙ නැවත ගොඩ නැගීමට ඔහු මහත් මෙහෙයක් කලේය.ධවල භීෂණයෙන් පණ බේරාගෙන ඔහු පලා ගිය සැටි ගැනත්, එතෙරදී ඔහුගේ සමහර ක්‍රියාකරකම් ගැනත් විවේචන තිබෙන බව සැබෑ මුත් වැ‍ටුනු පක්ෂය ගොඩ නගන්නට ඔහු ගේ කැප වීම අවතක්සේරු කළ නොහැක. සමහර විටක ඔහු නොසිටියේ නම් මීට වඩා හොඳ විදියකට සියල්ල සිදු වීමට ඉඩ තිබුණේ යැයි කෙනෙකුට කිව හැකි වුවද ( W3LANKA පැරා වැනි අය) ඔහු සිටි නිසා ඒ ගැන කතා කිරීම අදාල නැති දෙයකි.
 
නැගීටීමට මෙන්ම 2004න් පසු  පක්ෂයේ වැටීමටද ඔහුගේ ක්‍රියා කලාපය මහත්සේ දායක වූ බව නොකියා බැරිය.සෝමවංශ සහෝදරයා නොහොත් සිරි අයියාගේ සභාගවාදි , ජාතිකවාදි දේශපාලනය ජවිපෙට විශාල හානියක් කල අතර තවමත් එයින් ගොඩ ඒමට හැකියාවක් ලැබී නැත. සමහර විටෙක් ලැබෙන්නේද නැති වන්නට පුලුවන.
 
සිරි අයියාගේ ජීවිතයේ අවසාන කාලය මහත් ඛේදවාචකයක් විය. සමහර විට ඔහු ආ ගමනේ තර්කාන්විත අවසානය එය විය හැක.
 
මේ සියලු  අඩු ලුහුඬු කම් තිබියදී වුවද  ඔහුගේ නිහතමානි කම, නාහෙට නාහන ගතිය, සෘජු බව හා කැපවීම අනර්ඝය. ඒ සියල්ලටත් උඩින් මා ඔහුට කැමති වතාවක් පුවත්පතක් සමග කළ සම්මුඛ සාකච්ඡාවකදී ඔහු කී දෙයක් නිසාය.
 
ඔහුගේ සොහොයුරියක් ගණිකා වෘත්තියේ යෙදුනේ යැයි එකල චෝදනවක් එල්ල වෙමින් පැවති අතර ඒ ගැන පුවත්පතේ ලේඛකයා විමසු විට ඔහු දුන්නේ  සොඳුරු පිළිතුරකි.
 
"ඇය ගණිකාවක් වුනත් ඒ මගේ සහෝදරියයි"
 
තමන් අතින් රිය අනතුරක් වූ විට පවා පලා යන දේශපාලකයින් අතර එලෙස කෙලින් කතා කිරීමට ,හැකි උන්   ඉතා විරලය.
 
ඔබට සුව නින්දක් සිරි අයියේ.

(සටහන- සෝමවංශ අමරසිංහ සහෝදරයාගේ මරණය ගැන තමන්ට කිසි හැඟීමක් නැතැයි W3LANKA ලියන අජිත් පැරකුම් සහෝදරයා කියා තිබිණි. එතුමාට කොහොමටත් කිසි දෙයක් ගැන,  විශේෂයෙන් එතුමාගේ අතීතය ගැන කිසි හැඟීමක් නැතැයි පෙන්වන්නට ලොකු උත්සාහයක් ගනිමින් සිටී. ඒ ගැන අපි එතුමාට සුබ පතමු. එතුමා මේ ගැන තමන්ගේ ශාස්තෘ පොතේ ද ලියා තිබුනේ යැයි ඊ ලඟට කියනු ඇත. එම නිසා අපි එතුමාගේ ශාස්තෘ පොතට ද සුබ පතමු.)

Monday, June 13, 2016

නාම ගොච්ඡං නජීරති



 පසුගිය දොහොක  දේශපාලකයින් රොත්තක් මහජනතාවගේ මුදලින් හැදූ ගොඩ නැගිල්ලක් විවෘත කරන්ට කලුතර ගොහින් වෙච්චි අලකලංචිය මතකයිනේ. අතිගරු වෙල්ගම  හිටපු ඇමටි තුමා විවෘත කිරීම පුවරු වල තමන්ගේ නම නෑ කියලා මහ අඩව්වක් ඇල්ලුවා. අපි නොදන්නවා වුණාට සමහර විට මේ ගොඩනැගිල්ල එතුමාගේ පරම්පරා බූදලේ වියදම් කරලා හදපු එකක් වෙන්ටෑ.

 මහජනතාවගේ රීරී මාංශේ  හූරලා ගන්න බදු මුදල් වලින් කොරන මේ ඊනියා සංවර්ධන වැඩ පටන් ගන්න කොට , ඉවර කොරන කොට , වැඩේට ගිය මුදලටත් වඩා වියදම් කරලා නාම පුවරු ගහන එක දැන් රටේ නීතියක් වෙලා . හරියට උන්ගේ අම්මා අප්පගේ බූදලෙන් හදනවා වගේ. නම කොටා ගන්න එකට හපන් නම කෙ‍ටුවේ නැතිවාම ආවේස වෙලා වගේ දඟලන දැඟලිල්ල.

වෙල්ගම විතරක් නම් මදෑ. හිටපු ජානධිපති උන්නැහෙත් කියනවා , ඒ සිද්දිය දැක්කම වෙල්ගම ඉඹින්න හිතුනාය,  වෙල්ගම කෙරේ හොඳ වැඩක්ය,අපි පටන් ගත්තු වැඩවලට යහපාලන කස්ටිය නම් දා ගන්නවාය , අපේ නම් දාන්නේ නැතිය ආදි වශයෙන්. ඕන්  හිටපු ජනාධිපති තුමා ගේ ආකල්පය.

නාම පුවරු ලෙඩේ තදටම තිබ්බ එක්කෙනෙක් තමා අපේ හිටපු මහ තුමා . මතකයිනේ මැදමූලනෙන් ගෙනා සල්ලි වලින් හදපු මහින්ද රාජපක්ෂ වරාය, මහින්ද රාජපක්ෂ ගුවන් තො‍ටුපල, ක්‍රීඩාංගණ, සම්මන්ත්‍රණ ශාලා, ඉස්කෝල, විතරක් නෙවේ මරදාන පැත්තේ ප්‍රසිද්ධ වැසිකිලියකත් ගහලා තියෙනවා ගරු ගෝඨා   මැතිතුමාගේ සංකල්පයක් අනුවය කියලා,.තවත් මොන කතාද?

සටහන- අපි පුංචි කාලේ අපේ ගුරුවරු කියලා දුන්නේ ලංකාව සංවර්ධනය වෙමින් තිබෙන  රටක් කියාය. ඒ කාලේ නොදන්න කමට අපි හිතුවේ එහෙමනම් ඒක ලඟදීම සංවර්ධනය වී සුරපුරක් වෙයි කියලාය. දැන් අපි මැරෙන්නත් කිට්ටිඋය. ඒත් තවමත් මේක සංවර්ධනය වෙමින් පවතින රටක්ය.  මේක එහෙම  හදන්න පුලුවන් රටක් නෙවේය. හදන්නනම්, මකවලා හදන්න වෙනවාය. ආණ්ඩු විතරක් නෙවේ ජනතාවත් අලුතින් පත් කර ගන්ඩ වෙනවාය. වෙල්ගමලා පස්සේ යන මිනිස්සු ඉන්න රටක මොන සංවර්ධනයක්ද?

Sunday, June 5, 2016

සමනළයකුගේ සමු ගැනීම



අපේ කාලයේ වීරයෙකු වූත් , සමනළයෙකු මෙන් පියාඹමින් මී මැස්සෙකු මෙන්  ප්‍රතිවාදින්ට පහර දුන්නා වූත්  අසම  සම ශ්‍රේෂ්ඨයා , මොහමඩ් අලි නොහොත් කැෂියස් ක්ලේ ජීවිතයට සමු දී ඇත.

ඔහු බොක්සින් වලල්ල තුල අසම සමයෙකු වූවත් මොහමඩ්  අලි  ශ්‍රේෂ්ඨයෙකු වන්නේ ඒ නිසාම නෙවේ. රොකී මාර්සියානෝ,ෂුගර් රේ රොබින්සන්,ජෝ ලුවිස් සහ මයික් ටයිසන් පවා අලී තරමටම හෝ සමහර  විට ඊටත් වඩා බොක්සින් වලල්ල තුල දස්කම් පෙන්වා ඇත.

එසේ නම් මොහමඩ් අලි අසම සම ශ්‍රේෂ්ඨයා වන්නේ කෙසේ ද? ඔහු මෙතරම් සුවිශේෂි පුද්ගලයෙකු වන්නේ කෙසේද?

ඒ ඔහු වලල්ල තුල මෙන්ම ඉන් පිටතදීත් දැක් වූ කැරලිකාරිත්වය, නිසාය. අදීන බව නිසාය. කැෂියස් ක්ලේ ,මොහමඩ් අලි බවට පත් වෙන්නේත් ඒ නාහෙට නාහන ගතිය නිසාය.

වර්ණ බේදවාදි සුදු ඇමෙරිකාව කල්ලන්ට හිරිහැර පීඩා වෙනස් කම් කරන විට , තලා පෙලා හිංසා කරන විට හිස පහත් කරගෙන නොසිටියේය. එයට විරෝධය පෑමට තමන් දිනූ ඔලිම්පික් පදක්කම ඔහියො නදියට විසි කලේ ය. බොක්සින් වලල්ල තුල ලැබූ  සාර්ථකත්වය මත සුද්දෙක් මෙන් ජීවත් වීමට ඉඩ තිබුණද ඔහු ‍තෝරාගත්තේ විරෝධයේ  මාවතයි.ඔහු එලිජා මොහමඩ් ,මැල්කම් එක්ස් ඇතුලු කලු මුස්ලිම් ව්‍යාපාරයට එක් වන්නේ එබැවිනි. එය දුෂ්කර මාවතක් විය.

මේ මිනිසා ශ්‍රේෂ්ඨයින්ගෙත් ශ්‍රේෂ්ටයෙකු වන්නේ ඔහු තවත් ජාතියකට එරෙහිව අවි එසවීමට විරුද්ධ වූ නිසාය. වියට්නාමයට එරෙහිව යුද්ධ කිරීමට හමුදාවට බැඳීම ප්‍රතික්ෂේප කිරීම නිසා ඔහුගේ ලෝක ශූරතාවත් අහිමි කර හිර ගෙට දැක්කුවත් ඔහු තම ප්‍රතිපත්ති වෙනස් නොකලේය.

1971 දී එරට ශ්‍රේෂ්ඨාධිකරණය ඔහුගේ දඬුවම ඉවත් කරන තෙක් වසර තුනක් තම තරුණ දිවියේ හොඳම කාලය ක්‍රීඩාවෙන්  ඉවත්ව සිටීමට ඔහුට සිදු වුවත් ඔහු තම මතය වෙනස් නොකළේය. වියට්කොන්ග් වරුන් සමග මගේ ආරෝවක් නැතැයි ද ඒ නිසා ඔවුන්ට එරෙහිව සටන් කිරීමට මට හේතුවක් නැතැයිද ඔහු නිර්භය ලෙස පැවසූයේය.

ඒ වන විට ආරම්භක තත්වයේ තිබූ වියට්නාම් යුද විරෝධී අරගලයට ඔහු ගෙන ආවේ ඉමහත් ශක්තියක් හා ධෛර්යයකි.

 මේ කුඩා සටහන තමන් ශ්‍රේෂ්ටයෙකු බව හඳුනාගෙන නිතර ඒ බව ලෝකයට කියමින් හා එය ඇත්තක් බව ඔප්පු කර පෙන්වූ ඒ වීරයා වෙනුවෙනි.අසාධාරණයට එරෙහිව ලෝකය නැගිට්ටවීමට කළ ඔහුගේ අරගලය වෙනුවෙනි.


Muhammad Ali @ Trial

Friday, June 3, 2016

කව්ද යකෝ ඒ බලු වැඩේ කළේ?

 
 
 

අපේ ගරු විජිත හේරත් මන්ත්‍රී තුමා වාහනයක් පැදගෙන ඇවිත් ටෙලිෆෝන් කණුවක හප්පලා මහ ජර මරයක්ය.  විජිත මන්ත්‍රී තුමා බීලා හිටියා කියලා ඒ අව් අස්සේ රාවයක්ද  තිබේය.

සමහරුන් මේකෙන් මාර ආතල් එකක් ගන්නවාය. තව සමහරු අම්බානකට දුක් වෙනවාය. අපිනම් ඉතින් මධ්‍යම ප්‍රතිපදාවෙන් මේ වෙන දේවල් දිහා පටිසෝතගාමි විදියට බලා ඉන්නෙමුය. මොකද කිව්වොත් විජිත හේරත් තුමා බොන්නේ අරක්කුද , විස්කිද එහෙම නැත්නම් වතුරද කියන එක අපිට අදාල නැතිය. 

එතුමා කන බොන එක එතුමාගේ වැඩක්ය. සමාවෙන්න , එතුමාගේ හා එතුමාගේ පක්ෂයේ වැඩක්ය. හැබැයි එතුමා කන බොන මිනිහෙක් නම් අපි කැමතිය. මක් නිසාද යත් කන බොන මිනිස්සුන්ගේ අක්මාව නරක් වුනත් පපුව හොඳයි කියා පැ‍රැණි දාර්ශනිකයෝ කියා තිබෙන නිසාත් තව කාරණයක් නිසාත්ය.

එනම් අපිත් ඉතින් ඔය  වැඩේ කොරන නිසා අපේ විජිත මන්ත්‍රීතුමා අපේ ක්ලබ් එකේ මිනිහෙක් වීම ගැන සතු‍ටු නිසාත්ය. අනික ඉතින් දේශපාලන පක්ෂ අමද්‍යප ව්‍යාපාර වෙන්නම ඕනෑ කියලා නීතියක්ද නැතිය.

හැබැයි ඉතින් විජිත හේරත් මන්ත්‍රී තුමා නම් කියන්නේ එතුමා එතුමා ඇක්සිඩන්ට් එක වෙන වෙලාවේ බීලා හිටියේ නෑ කියලාය. හැබයි තමන් නොබොන මිනිහෙක් කියලා එතුමා  කියන්නේ නැත. එතුමා කියන්නේ මම ඒ වෙලාවේ බීලා හිටියේ නැත කියලාය.

වෙන්ටත් ඕනෑ එහෙමය. මොකද කිව්වොත් බීලා වාහන එලවන එක මාරන්තික නිසාය. නොබී ඔහොම නම් බීලා කොහොම වෙයිද? එම නිසා අපි එතුමාට දෙවරක් ගරු කරනවාය. එක වරක් එතුමාද අපි වාගෙම  කන බොන මිනිහෙක් වීම ගැනය. දෙක වරට එතුමා බීලා වාහන නො එලවපු එක ගැනය.

හැබැයි මේ සීන් කෝන් එක ගැන මටත් පොඩි කොස්සක් නොහොත් ප්‍රශ්නයක් තිබේ. ඒ තුමා නොබී හිටි බව උසාවියත් පිලි අරගෙන තිබේ .

 නමුත් ....

නමුත්    එතුමාගේ කටෙන් මත් පැන් ගඳ ආ බව අධිකරණ වෛද්‍ය තුමිය කියා තිබේ.

දැන් මගේ ප්‍රශ්නය නම් එතුමා බීවේ නැත්නම්  " එතුමා බීවේත් නැතිනම් එතුමාගේ  කටේ අරක්කු ගෑවේ මොන පසික්කා‍ටුවාද, අපේ ගරු මන්ත්‍රී තුමාට නොදැනෙන්න එහෙම කළේ කොහොමද " කියලාය. 
 
හා කියමු බලන්ට.

සටහන- ආයේ සැරයක් කියන්නේ අපි බීමට විරුද්ධ නැති බවය.

Wednesday, June 1, 2016

රාජිත නරක බබා දැන් ප්‍රදර්ශනයේ

 

......වෛද්‍යවරුන්ගේ ස්ථාන මාරු ලැයිස්තු ප්‍රධානව දෙකයි. එකක් post intern ලිස්ට් එක නොහොත් පශ්චාත් සීමාවාසික ලැයිස්තුව. ඒකෙ තමයි පරිවාස කාලය අවසන් කරපු අයට වෛද්‍යවරු විදියට ලබා දෙන මුල්ම පත්වීම් ලැයිස්තුව. මේ ලිස්ට් එකට ඉල්ලුම් කරන්නේ වෛද්‍ය සේවයට මුලින්ම බැඳෙන වෛද්‍යවරු. එයාල තමයි වෛද්‍ය ක්ෂේත්‍රයේ අඩුම සේවා කාලයක් සහිත පිරිස. මේකේ ප්‍රමුඛතාවය හම්බෙන්නේ තමන්ගේ කණ්ඩායමේ ලබා ගත්තු කුසලතා මට්ටම( batch එකේ merit rank එක.)

අනෙක තමයි වාර්ෂික ස්ථාන මාරු ලැයිස්තුව. යම් සේවා ස්ථානයක අවුරුදු 2ක් හෝ වැඩි කාලයක් සේවය සම්පුර්ණ කරපු අයට මේ ලැයිස්තුවට ඉල්ලුම් කරන්න පුළුවන්. මේකේ ප්‍රමුඛතාවය හම්බෙන්නේ තමන්ගේ ජ්‍යෙෂ්ටත්වයට.

මීට අමතරව special appeal list, north east list, කියන ස්ථාන මාරු ලයිස්තුත් තියෙනවා.

පශ්චාත් සීමාවාසික ලැයිස්තුව හැර අනෙක් සියලුම ලැයිස්තු වලින් වෛද්‍යවරයෙකුට ස්ථාන මාරුවක් ලැබුණු පලියට එයාට ඒ ස්ථාන මාරුව ලැබුණු තැනට යන්න වෙන්නේ නෑ. තමන් ගියාම සිදු වන පුරප්පාඩුවට වෛද්‍යවරයෙක් එනකන් හිටපු තැනම ඉන්න වෙනවා.

සාමාන්‍යයෙන් දුර බැහැර-පර්යන්තය එකකට වෛද්‍යවරුන්ගේ ඉල්ලුම අඩුයි. ඒක නිසා වාර්ෂික ස්ථාන මාරු ඉල්ලුම් කිරීමේදී එවැනි ස්ථාන වලට වෛද්‍යවරු ඉල්ලුම් කරනවා අඩුයි. ඒක නිසා ස්ථාන මාරු නියෝගය ලැබිල වුනත් පුරප්පාඩුව නොපිරීම මත පර්යන්තයක වැඩ කරන කෙනාට අකමැත්තෙන් තව අවුරුද්දක් දෙකක් සමහර විට 3ක් වුනත් වැඩ කරන්න වෙච්චි වෙලාවල් තියෙනවා.

මේ හේතුව නිසා අදාළ වෛද්‍යවරයා දෙපැත්තකින් තැලෙනවා. එකක් තමයි තමන් අකමැති සේවා ස්ථානයක වැඩිපුර වැඩ කිරීමට සිදු වීම. අනික් පැත්තෙන් තමන් කැමති සේවා ස්ථානයේ වැඩ කිරීමට හැකි වන කාලය අඩු වීම. මොකද යම් සේවා ස්ථානයක වැඩ කරන්න පුළුවන් අදාළ ස්ථාන මාරු වීම් නියෝගය ලැබිල අවුරුදු 4ක් වෙනකන් විතරයි. ඒ කියන්නේ පර්යන්තයක වැඩ කළත් ඒක ගණන් ගන්නේ වෙන්නේ ජනප්‍රිය ස්ථානයේ වැඩ කළා කියල. (මේ සිද්ධ වෙන්න ඕනි නියම විදියද කියන එක ගැන විවාදයක් තිබ්බත් සිද්ධ වෙන්නේ මේක.)

මේ ප්‍රශ්නෙට මුහුණ දෙන වෛද්‍යවරුන්ගෙන් අයුතු ලෙස ප්‍රයෝජනය ගන්න වෙනත් වෘත්තීය සමිතියක් නොකරන විදියට GMOA එකේ ඉහල නිලධාරින් පාවිච්චි කළා.

මේ පුරප්පාඩු  පිරවීමේ අයිතිය ඔවුන් අතට ගත්තා. ඒක ඔවුන්ගේ අභිමතය පරිදි තමයි සිදු වුනේ. ඒ කියන්නේ තමන් වෙනුවට වෛද්‍යවරයෙක් අනුයුක්ත කර ගන්න නම් GMOA ඉහල නිලධාරීන්ට තම පක්ෂපාතිත්වය දක්වන්න ඕනි.

 ඒ කියන්නේ GMOA ‍රැස්වීම් වලට එන්න ඕනි. කොටින්ම කිව්වොත් GMOA එකට මූන පෙන්නගත්තේ නැත්නම් එයාට නිදහස්   වෙන්න වෛද්‍යවරයෙක් එවන්නේ නෑ. පොඩි පොඩි වෙනස්කම් තිබ්බත් මේක සිද්ධ වෙන්නේ දේශපාලනඥයෙක් තමන් දිනවන්න වැඩ කරපු අයට රස්සා හදල දෙනවා වගේ.

මේ පාර සිද්ධ වුනේ අදාළ පුරප්පාඩු පිරවීම අමාත්‍යාංශය    යටතට ගත්තා. අමාත්‍යාංශය  මේ පර්යන්ත පුරප්පාඩු බහුතරයක් පිරවීමට පශ්චාත් සීමාවාසික ලැයිස්තුව  ලිස්ට් එක යොදා ගත්තා.

මේක මේ විදියට දිගටම  වුනොත් වෛද්‍යවරුන්ට තමන්ගේ සේවා ස්ථානයෙන් නිදහස් වෙන්න GMOA එක පස්සේ යන්න ඕනි වෙන්නේ නෑ.

මේකෙන් GMOA ඉහල නිලධාරීන්ගේ ඒකාධිකාරියට  එකට බඩු  හම්බෙනවා. ඒකයි ඔවුන් ඔච්චරම කලබල වෙලා තියෙන්නේ. මොකද මේක ඔවුන්ගේ පැවැත්ම පිලිබඳ ප්‍රශ්නයක්.

මේකේ අනික් පැත්ත විතරයි GMOA එක කියන්නේ . ඒ කියන්නේ ජනප්‍රිය ස්ථාන වල නියමිත කාලය වැඩ කරපු අයට පර්යන්ත වලට නිදහස්  වෙන්න අදාළ පුරප්පාඩු පුරවන්න මේ පශ්චාත් සීමාවාසික ලැයිස්තුව   භාවිතා කරන්නේ නෑ කියන එක.

GMOA එක කිසිම වෙලාවක චෝදනා කරන්නේ නෑ පර්යන්ත රෝහල් වල පුරප්පාඩු පශ්චාත් සීමාවාසික ලැයිස්තුවෙන් එකෙන් පුරවල මදි කියල.

මාධ්‍ය ප්‍රකාශක රෝහල් කීපයක් නම් කළා මේ ප්‍රශ්නෙදි. යාපනය, අම්පාර, ජාතික රෝහල සහ මඩකලපුව. මේ රෝහල් ගැන විශේෂයෙන් මාධ්‍ය ප්‍රකාශක කියන්න ඇත්තේ ලොකුම ගැටළු ඇති වුනේ මේ රෝහල් වලට කියන නිසා වෙන්න ඇති නේ.

මෙව්වයේ ඉන්න ස්ථාන මාරු ලැබූ වෛද්‍යවරුන්ට පර්යන්ත වලට යන්න මේ ලැයිස්තුවෙන් වෛද්යවවරු ආව මදි කියන එක තමයි එයා චෝදනා කළේ.  ජාතික රෝහල ඇර ඉතිරි රෝහල් කොළඹින් දුර තිබ්බට එව්වා එක්කෝ පළාත් මහා රෝහල්. නැත්නම් ශික්ෂණ රෝහල්. මෙව්වා දුෂ්කර රෝහල් විදියට සලකන්න බෑ කොළඹින් දුර තිබ්බ පලියට.

මේ රෝහල් වල වුනත් පර්යන්ත වලට ස්ථාන මාරු ලැබුණු වෛද්‍යවරු ඉන්නවා නම් එයාල අනිවාර්යයෙන්ම නිදහස් විය යුතුයි. ඒකෙ කතා දෙකක් නෑ. ඒත් ඒ වෛද්‍යවරුන්ගෙන් ඇති වෙන පුරප්පාඩු පුරවන එක ලේසියි පර්යන්ත පුරවනවට වඩා.

අනික වාර්ෂික ස්ථාන මාරු ලැයිස්තුව ජනප්‍රියරෝහල් පුරවන්න යොදා ගන්න එක සාධාරණයි පර්යන්ත පුරවන්න යොදා ගන්නවට වඩා. මොකද වාර්ෂික ස්ථාන මාරු ලැයිස්තුවට ඉල්ලන්නේ ජ්‍යෙෂ්ට වෛද්‍යවරු නිසා.

ඒ වගේම රාජිත කියනවා වැහිච්චි රෝහල් තිස් ගානක් අරින්න පුළුවන් ලු මේ විදියට වෛද්‍යවරු පිරෙව්වහම. මේකේ ඇත්ත නැත්ත ගැන මාධ්‍ය ප්‍රකාශක පිළිතුරු දෙන්නේ නෑ.

කොහොම හැදුවත් මේ  ලැයිස්තුවෙන්  පර්යන්ත රෝහල් තමයි වැඩිපුර  පිරෙන්නේ . මේ පාර ඒ රෝහල් වලට යන, කාගේවත් පස්සේ ගිහින් වැඩක් කර නොගන්න කෙලින් ඉන්න කොන්දක් ඇති වෛද්‍යවරුන්ට කවදා හරි මාරු වීමක්  හම්බුනාට පස්සෙත් නිදහස් වෙන්න විදියක් නැති වුනාම තමයි මේ ප්‍රශ්නේ හොඳටම තේරෙන්නේ.

මේ එක්ක මාධ්‍ය ප්‍රකාශක තව චෝදනාවක් ගේනවා රාජිතගේ පවුල් පාලනය සෞඛ්‍ය අමාත්‍යාංශය ඇතුලේ් ක්‍රියාත්මක වෙනවා කියල. ඒක නිසා සෞඛ්‍ය ඇමතිට අස් වෙන්නලු.

හැබැයි ඒ චෝදනාව ගේන්න එයාලට මේ මාරු ලැයිස්තුව ලිස්ට් එකේ ප්‍රශ්නේ එනකන් ඉන්න වුණා. ඇයි දන්නේ නෑ.

බැරි වෙලාවත් GMOA එක කියන ලිස්ට් එකට රාජිත එකඟ වෙනවා නම් රාජිත ඇමතිකමෙන් අස් වෙන්න ඕනි නැද්ද??

එහෙම එකඟ වුනොත් රාජිතගේ පවුල් පාලනේ ප්‍රශ්නයක් වෙන්න, ආයිත් පාරක් GMOA එකේ අය කියන දේවල් වලට එකඟ නොවෙනකන් ඉන්න ඕනිද?

සටහන-- FB උපුටා ගැනීමකි. GMOA ක්‍රියාකලාපය ගැන මගේ වෙනම කියවීමක් ඇත. නමුත් වර්තමාන ප්‍රශ්නය මේ ලේඛකයා හොඳින් විස්තර කර ඇති නිසා  සුළු සුළු සංශෝධන සහිතව මේ පල කරමි, දුහුනන් දැනුම් උදෙසා


 රාජිත හොඳ බබා ලඟදීම බලාපොරොත්තු වෙන්න