Wednesday, December 31, 2014

පාදෙනිය වෛද්‍ය සංගමය විකුණයි.



ඔවුන් ගත් සමහර වෘත්තීය ක්‍රියා මාර්ග ගැන ප්‍රශ්න තිබුනත් රජයේ වෛද්‍ය නිලධාරි සංගමය මෙතෙක් කල් රටේ ජනයා දැන ගෙන සිටියේ රටේ තිබෙන ඉතාමත් ප්‍රබල වෘත්තීය සමිතිය වශයෙනි.

එක්දහස් නමසියන් අසූ ගණන් වල උතුරු කොළඹ පෞද්ගලික වෛද්‍ය විද්‍යාල ප්‍රශ්නයේදී ඔවුන් එවකට පැවති රජය සමග කෙලින්ම ගැ‍ටුනේ තම අරගල වෘත්තීය කටයුතු වලට පමණක් සීමා නොවන බවත් පෙන්වමිනි,

එහෙත් පසු ගිය කාලයේ මාලබේ පෞද්ගලික වෛද්‍ය විද්‍යාලය ප්‍රශ්නය මතු වූ විට වෛද්‍ය සංගමයේ සභාපති වෛද්‍ය පාදෙණිය ඇතුලු නායකයන් දැක් වූයේ ඉතාමත් ඇල්මැරුනු විරෝධයකි. කොතලාවල ආරක්ෂක ඇකඩමියේ වෛද්‍ය උපාධිය හොර පාරෙන් විකුණන බවට වෙද සිසුන් චෝදනා කරද්දී පාදෙනිය ප්‍රමුඛ රජයේ වෛද්‍ය නිලධාරි සංගමය  ඒ ගැන වගේ වගක් නැතිව සිටියේය.

ඔවුන්ගේ මේ අමුතු හැසිරීම ගැන බළල මල්ලෙන් එලියට පැන්නේ තවත් සෞඛ්‍ය වෘත්තීය සමිති කිහිපයක් සමග මහින්ද රාජපක්ෂට කඩේ යෑමට පාදෙණිය එලිපිටම නිර්ලජ්ජිතව ඉදිරිපත් වීමෙනි.

එම හැසිරීමට තෑගි දැන් පාදෙනියලාට ලැබී තිබේ. ඒ මැතිවරණ අල්ලසක් වශයෙනි. 

එනම් සාමාන්‍ය ශ්‍රේණි වෛද්‍ය වරයෙකුට රුපියල් 20,000 කුත් විශේෂඥ වෛද්‍යවරයෙකුට රුපියල් 35,000 කුත් වශයෙන් වූ දීමනාවක් ගෙවීමට රජය තීරණය කර තිබේ.

එදා පාදෙනියලාත් සමග  කඩේ යෑමට එක් වූ අනිකුත් සෞඛ්‍ය සේවාවල සමිති නායකයින්ට  දැන් සිදුව ඇත්තේ උඩ බලාගෙන හීල්ලීමටය.

කෙසේ වෙතත් ර.වෛ. නි ලධාරි සංගමයට යම්තමින් ඉතිරිව තිබූ අන්තිම  ගෞරවයත් රුපියල් 35,000 කට විකිණු නායකයා වශයෙන් පාදෙනිය ඉතිහාස ගත වනු ඇත.



කුඹුක්ගැටේ වීරයෝ



කුරුණෑගල කුඹුක්ගැටේදී ලුත් පරපුරේ කලාකරුවන්ට නිල් බලකාය පහර නොදුන් බවත් නිල් බලකාය ට මඩ ගැසීම සඳහා වෙනත් කවුරුන් හෝ එය කරන්නට ඇති බවත් මේ වන විට හොඳටම සැර බාල වී ඇති ඇමති ඩලස් හුලහප්පෙරුම මහතා කියයි.

මේ අනුව තමන්ම ගස් බැඳ ගත් රජයේ සේවකයා, තමන්ටම පහර දී ගත් සරසවි සිසුන්, පොලිසියෙන් නොව දුම්රිය සේවකයින්ගෙන් ගුටි කෑ මගියා ,ඉබේ ගිනි ගන්නා විපක්ෂ කාර්යාල, පොලිසි ඇතුලේ එල්ලී මැරෙන සැක කරුවන්, තම අත් බැඳ තිබියදී පොලිස් නිලධාරින්ට වෙඩි තැබීමට ගොස් වෙඩි කා මැරෙන සැක කරුවන්,තමන්ගේ පිස්‍තෝලයෙන් තම ඔලුවට තඩි බාගන්නා හමුදා නිලදාරින් ආදි අරුම පුදුම ගොන්නට අලුත් පරපුරේ කලාකරුවන්ද ඇතුල් වී තිබේ.

සටහන- මේක නම් මාර රටක් ඕයි. එක්කෝ අපිට පිස්සු, නැත්නම් මේ කතා  කියන උන්ට ඔල්මොරොන්දම්

Monday, December 29, 2014

මගේ ඡන්දය මහින්දට නොහොත් මේ දෑස මක්කටැයි ජැකලයින් නොදු‍ටු


මේ සැරේ ජනාධිපතිවරණේදී කාට චන්දේ දෙන්දෝ  කියලා අහස පොලව ගැට ගැහෙන කම් කල්පනා කොරත් උත්තරයක් ඔලුවට ආවෙම නෑ. 

තරඟේ ඒ තරම් නැගලා යනවා.

මහින්ද මාමී යුද්දේ කලා, පාරවල් හැදුවා ,එයාර්පෝර්ට් හැදුවා( ප්ලේන් නාවාට මොකෝ) , වරායවල් හැදුවා( නැව් නම් නෑ තමා) .

එතකොට මෛත්‍රී මාමා යහ පාලනේ ගේනවා, ඒකාධිපතියෝ එලවනවා, දූෂණේ නැති කොරනවා

මං කියන්නේ කොහොමද මං වගේ හුදී ජනයෙක් මේ දෙන්නා ගෙන් කෙනෙක් ‍තෝරා ගන්නේ.

ඕන්න ඔය වෙලාවේ තමා හුට්ටප්පරේ සිද්ද වුනේ.

අපේ මහින්ද මාමට සපෝර්ට් එක දෙන්නේ ලංකාවෙන් විතරක් නෙවේ කියලා ආරංචි වුනේ.

එයාගේ චන්ද කෙරුවාවට සපෝර්ට් එක දෙන්න ඉන්දියාවෙනුත් ඇවිල්ලා

සල්මන් කානුයි ජැකලයින් කෙනඩියි... වැරදුනා ජැකලයින් ෆර්ඩිනන්ඩ්ස්

ආයේ තවත් මොනවද

ජැකලයින් ෆර්ඩිනන්ඩ්ස් මේ ඇස් දෙකට පණ පිටින් දකින්ඩ සලස්සපු පුණ්‍ය කර්මේම මදිද මහින්ද මාමට චන්දේ දෙන්න



වේලක් ඇර වේලක් කෑවත් මදිද මේ වගේ පිං කඳක් මේ ඇස් දෙකින් දැක්කට පස්සේ.

ඔන්න මම නම් මහින්ද මාමට 

සටහන- සල්මල් කාන් / ජැකල්යින් ෆර්ඩිනන්ඩ්ස් ලංකාවට ඇවිත් මහින්ද මාමට සපෝර්ට් එක දෙන්ඩ  ලක්ෂ පන්සීයක් ගත්තාලු. ඉතින්  මොකද? ලංකාවේම ඉන්න අත්තන ඇට නායකලා ත් ඉතින් නිකම්ම  ආවය මහින්ද මාමිට සපෝර්ට් එක දෙන්ඩ

(photo from Lankadeepa)


Sunday, December 28, 2014

ජනපතිවරණය පසුපස බටහිර තානාපතිවරුන්

මෛත්‍රීපාල සිරිසේනගේ පෝස්ටර් අලවන බටහිර තානාපති වරු කිහිපදෙනෙක්

ඊයේ සවස බටහිර තානාපතිවරුන් හත් දෙනෙක් විපක්ෂයේ පොදු අපේක්ෂක මෛත්‍රීපාල සිරිසේන මහතාට ආධාර පිණිස සකස් කළ පෝස්ටර් මිටියක්ද පාප්ප බාල්දියක් ද ‍රැගෙන ත්‍රී රෝද රථයක නැගී කොළඹ නගරය  පුරා පෝස්ටර් අලවා ඇති බව ප්‍රවීණ ආරක්ෂක මාධ්‍යවේදී කීර්තී වර්ණකුලසූරිය මහතා ගේ පෞද්ගලික ඔත්තු කරුවෙකු වන එකී ත්‍රී රෝද රථ රියදුරා විසින් දන්වා ඇත. 

ජනාධිපතිවරණයට බටහිර ජාතින්ගේ තානාපතින් කරන මෙම බරපතල මැදිහත් වීම පිළිබඳව සාමකාමි විරෝධයක් දැක්වීම සඳහා දේශහිතේෂී ජාතික ව්‍යාපාරයේ මහලේකම්  වසන්ත බණ්ඩාර මහතා උදලු මිටි, උණපොලු හා පරාල එකතු කරමින් සිටින බවද වාර්තාවේ. 

------------------------------------------------------------------------------------------------------------------------------------------------------------------

ජනපතිවරණය පසුපස බටහිර තානාපතිවරුන් 7ක්‌ 

කීර්ති වර්ණකුලසූරිය 

බටහිර තානාපති කාර්යාල හතක දේශපාලන කටයුතු භාර නිලධාරීන් ජනාධිපතිවරණයට බරපතළ ලෙස මැදිහත් වන බව බුද්ධි අංශවලට අනාවරණය වී ඇත.

මෙම නිලධාරීහු බුද්ධි නිලධාරීන් මඟ හැරීම සඳහා පෞද්ගලික කුලී රථ භාවිත කරන බව සනාථ වී තිබේ.

එක්‌ බටහිර රටක තානාපති නිලධාරීන් දෙදෙනකු රැගෙන ගිය කුලී රථ රියෑදුරෙක්‌ මේ බව බුද්ධි බලධාරීන්ට දැනුම් දී ඇත. මෙම විදේශ නිලධාරීන්ගෙන් පස්‌ දෙනකු හඳුනාගෙන ඇතැයි ඉහළ පෙළේ ආරංචි මාර්ග දන්වයි.

(උපුටා ගැනීම දිවයින බෝතල් පත්තරය)

Friday, December 26, 2014

වාද මණ්ඩප්ප ප්‍රශ්නය


යටගිය දවස ජම්බුද්වීපාසන්නයේ පිහිටිආශ්චර්යලන්තය නම් වූ  කොදෙව් රාජ්‍යයක මැදමූලනි බ්‍රහ්මදත්ත නම් වූ රජ්ජුරු කෙනෙකුන් රාජ්‍ය කරනා සමයේ හට ගත්තා වූ වාද මණ්ඩප්ප ප්‍රශ්නය කෙසේද යත්:

එසමයේ එරටේ  මහා සම්මතයෙන් රජ්ජුරුවන්  ‍තෝරන සිරිතක් පැවත්තේ වසර සයකට වරක් රාජවරණයක් පවත්තන්නේය. ඉදින් මැදමූලනී බ්‍රහ්මදත්ත   රජ්ජුරුවෝද එසේ රාජ ධූරයට පත්ව සිව් වසරක් ඉක්ම ගිය තැන සිතන්නේ මම රාජ්‍යත්වයට පත් වූ දින සිට මගේ ජනයාට වූ සුගතියක් නැත්තේය, උන් සාගින්නෙන් පෙලෙන්නෝය, රටේ නීතියක් නැත්තේය, මගේ බෑයින්ද , නෑයින්ද පුතුන්ද ,සහචරයන්ද එක්ව රාජ්‍ය භාණ්ඩාගාරය සිස් කොට ඇත්තේය. අහෝ තව දෙවසක් ගිය තැන පැවත්වීමට ඇත්තාවූ රාජවරණයෙන් මම් නියතින් පරදින්නේය. ඊට මත්තෙ න් දැන්ම රාජවරණයක් පැවත්තුවහොත්  යම්තමින්වත් දිනා ගත හැකිවන්නේය ආදි වශයෙන් සිතා හදිසි රාජවරණයක් කැඳවන්නේ තමන්ට ප්‍රතිමුඛව තරඟ වදින්නට සුදුසු මල්ලවයෙක් නැති බව සිතා සැනහෙන්නේය.

එකල්හි  රජ්ජුරුවන්ගේ ප්‍රතිමුඛයෝද මහත්  සේ කම්පිතව ,මෙවරත් අපට නම් දිනිය නොහැක්කේය, අහෝ රාජ භාණ්ඩාගාරයෙන් අපේ කුස් පුරවා ගන්නේ කෙසේදැයි සිතමින් දුක් වන්නෝයය.

එකල්හි මැදමූලනි රජ්ජුරුවන්ගේ මෙත් පල්  නම් වූ ඇමත්තෙක් සිටියේය. ඌ තෙම රාජසභාවේ මහ ඇමති කම්  තමන්ට ලැබෙතැයි සිතා එලුවා ගේ බිජුව වැටෙන තෙක් පස්සෙන් ගියා සේ ගොස් වෙහෙසව සිතන්නේ කිම්ද මේ මා කරන්නේ, මහ ඇමති කම් මට නම් කිසි කලෙක නොලැබෙන්නේය. මේ රජුට කදිම  පාඩමක් ඉගැන්විය යුතු යැයි සිතා රජ්ජුරුවන්ගේ ප්‍රතිමුඛයෝ සම්බ වී උන් සමග මන්ත්‍රණ කර තෙමේම රාජවරණයට ඉදිරිපත් වන බව ප්‍රසිද්ධ කලාහුය.

මැදමූලනි බ්‍රහ්මදත්ත රජ්ජුරුවෝද මේ කුමක් සිදු වීදැයි විස්සෝප සිටින්නාහු, කටවුට් නම් වූ පලක විශේෂයක් රට පුරා සි‍ටුවා  භාණ්ඩාගාරය තව තවත් සිස් කරන්නේ ජනයා අතර තවත් අප්‍රසාදයටම ලක් වන්නාහුය.

මේ අතර මෙත්පල් ඇමත්තාද රජ්ජුරුවන් සමග එක පතේ කෑ පුරුෂයෙක් වූ නිසා ඌගේ සියලු රහස් දන්නේ , තමන් හා වාදයකට එන ලෙස රජ්ජුරුවන්ට අභියෝග කරන්නේය. රජ්ජුරුවෝද වාදයෙහි තම අසමත් කමත් , මෙත්පල් ඇමත්තා තම සියලු රහස් දත්  නියාවත් දන්නේ වාදයට යාමට බිය වූවාහු කුමක් කරන්නේදැයි ශෝකයෙන් මුසුප්පු වී සිරි යහන් ගබඩාවට වැද මුනින් තලා වී සිටින්නේය.

රජ්ජුරුවන් ශෝකයෙන් සිරි යහන් ගබඩාවට වැද සිටින්නා වූ පුවත් අසා අලහප්පෙරුමයා වූ ඇමත්තා පැමිණෙන්නේ රජුගෙන් ශෝකයට කාරණා අසා මෙසේ කියන්නේ

"එම්බල රජ්ජුරුවන් වහන්ස, ඉදින් තොප මෙත්පාලයා හා වාදයට අසමත් නම් තොපට ඌ හා වාදයක් නැතැයි පවසව" කියූහ.

රජ්ජුරුවො එවිට කියන්නේ බල කෙල තොල්ල එවිට මට මහත් ලජ්ජාවක් නොවෙන්නේදැයි අලහප්පෙරුමායාගෙන් ඇසූහ.

එවිට අලහප්පෙරුමයාද කියන්නේ බල රජුනි, තොප බිය නොවව.මේ අලහප්පෙරුමයානම් මහත්  ඥාණය ඇත්තෙක්මි. මා කරනා දෙය බලනු මැනවි යැයි කියා මහත් සභාවක් කැඳවා මෙසේ කීවාහු  බල කොල්ලනි, මෙත්පලුවා අප රජ්ජුරුවන්ට වාදයකට ආරධනා කළ  බැව් සැබෑවකි, නමුත් එතුමාගේ ඇමති මණ්ඩලය වන අප එකහඬින් එතුමාට  මෙත්පල් ඇමත්තා හා වාදයකට නොයන ලෙසට අණ කළ බැවින් එතුමා ජනසම්මතවාදි ලෙස ඒ වාදයට නොයන්නාහු යැයි පතල කළා හුය.

ඒ ඇසූ කොදෙව් වාසි ජනයාද උදරයන් අල්ලා ගෙන සිනහ සෙන්නේ අපට නම් සිටින්නේ අපූරු රජෙක් හා උහුටම ගැලපෙන ඇමැත්තන් යැයි සතු‍ටු වූවාහුය.

Wednesday, December 24, 2014

මහින්දට ජය නියතයි, මෙන්න නියම ජෝතිෂ්‍ය අනාවැකි.



එලඹෙන ජනාධිපතිවරණයෙන් මහින්ද රාජපක්ෂ මහතා මාර ජයක් ලබන බව අප ස්ථීර වශයෙන්ම පවසමු. මේ බව අප කියන්නේ නිකමට ආ ගියාට නොව අප විසින් බොහෝ දුක් විඳ ඉන්දියාවේ හිමාල පාමුල වෙසෙන සෘෂි වරුන්ගෙන් ඉගෙන ගත් සුප්‍රසිද්ධ ආතකර්ම  ජෝතිෂ්‍ය  විද්‍යාව අනුවය.

ඒ සෘෂින් අපට ලබා දුන් ශාස්ත්‍රය අනුව  ජනවාරි අට දින වෙන විට සඳු පස් වෙනි රාශියටත් සෙනසුරු දශවෙනි  රාශියේ තුන්වැනි අංශකයටත්  ගමන් කරනු ඇත. මෙය තමන්ගේ නමට  හි  අක්ෂරය  ඇති අයට ඉතාමත් සුභ පල දෙන යෝගයකි.

ඊට අමතරව බ්‍රහස්පති අට වැන්නේ ද කුජ හත්වැන්නේද සිටින අතර එම යෝගය  නමට ක්ෂරය  ඇති අයට  රාජ සම්පත් හිමි කරන යෝගයකි.

අනික් වැදගත්ම කාරණය නම් අට වැනිදා උදා වෙන පත්‍රසාල නැකතයි. මෙය අල් න යන්න (න්) තම නමට ඇති අයට  සියලු වස්තු ඉසුරු පමණක් නොව රාජ බලයද හිමි කරලන නැකතකි.

මේ සියලු කාරණා සලකා බැලූ විට අපට පෙනී ගියේ  ජනවාරි අට වෙනිදා මහින්ද රාජපක්ෂ මහතා ජනාධිපති චන්දයෙන් අති විශාල ජයක් ලබන බවයි. 

මෙම සුභ පල අවම කර ප්‍රත්වාදින්ට ජය ලබා දිය හැකි  නොයෙක් ශාන්තිකර්ම ක්‍රම අප  දැන සිටියත් ඒවා හෙලි නොකිරීමට අප තීරණය කර ඇති නිසා ඒවා ගැන  අසා කරදර නොකරන මෙන් විරුද්ධ පාක්ෂිකයන්ගෙන් කාරුණිකව ඉල්ලා සිටිමු.

සටහන- මෙය  රටේ නායකයින් ප්‍රමුඛ මිථ්‍යාමතයන් හි ගැලී සිටින සකල ශ්‍රී ලංකා වාසින්ට  කලා මැදිරියාගෙන් පිදෙන තු‍ටු පඬුරකි.

Monday, December 22, 2014

රාජපක්ෂලාගේ දරු සෙනෙහස දෝර ගැලූ වගයි



යන යන තැන පොඩි උන් උස්සාගෙන ඉඹ මිරිකා දරු සුරතල් පෙන්වන මහින්ද  රාජපක්ෂගේ රාජපාක්ෂික  පොලිසිය ඊයේ මහ දවල් කොලඹ දී උද්ඝෝෂණයක යෙදුනු සිසු සිසුවියන්ට  තිරිසන් අයුරින් පහර දුන්නේය. 

මේ දිනවල වේදිකා දෙදරවමින් තමන් මේ රට හදන්නේ දරුවන්ට යැයි  රාජපක්ෂ කියද්දී  දරුවන් යනුවෙන් ඔහු අදහස් කරන්නේ අශ්වයන්ගේ පිටේ මිස ඩී අයි ජී ලාගේ පුතුන්ගේ ගෑණුන්ගේ පිටේ නොනගින තමන්ගේ පුතුන් තුන් කට්‍ටුව මිස මේ රටේ දුප්පත් දෙමව්පියන්ගේ දරුවන් නොවන බවට මීටත් වඩා සාධක අවශ්‍යද?





ඡායාරූප ලංකාදීපයෙන් උපුටා ගැණිනි.
සටහන- දැන් ඉතින් අප කළගුණ දක්වමුද?

Friday, December 19, 2014

කළගුණ දැක්වීම



ජනපති සටන තුල  මහින්ද රාජපක්ෂගේ ප්‍රධානම සටන් පාඨය වී ඇත්තේ කළ ගුණ දක්වමු යන්නයි. රාජපාක්ෂිකයන් කියන්නේ දෙමල ඊලම් අරගලය පොඩි පට්ටම් කර දමා තිස් වසරක් පැවති යුද්ධය නිමා කළ නිසා මහින්දට කළගුණ දැක්වීමක් වශයෙන් ඔහුව නැවත ජනාධිපති ධූරයට පත් කළ යුතු බවයි.

එම කථාවෙන් කියවෙන්නේ මහින්ද නැවත ජනපති ධූරයට පත් කල යුත්තේ රටට සේවය කිරීමට, රට සංවර්ධනය කිරීමට ඔහුගේ සේවය අවශ්‍ය නිසා නොව යුද්ධය දිනූ මහින්දට කරන උපකාරයක් වශයෙන් අප ඔහු දිනවිය යුතු බවයි.

එනම් මේ රටේ සම්පත්  තමන්ගේ හා තම පරපුරේ ප්‍රයෝජනයට ගැනීමට අප කළ ගුණ සැලකීමක් වශයෙන් ඔහුට ඉඩ දිය යුතු බවයි.

 මේ රට චීනුන්ට උගස් කරමින් තම මඩිය තර කර ගැනීමට අප කළ ගුණ සැලකීමක් වශයෙන් ඔහුට ඉඩ දිය යුතු බවයි.

සෑම ව්‍යාපෘතියකින්ම  ඩොලර් මිලියන් ගණන් කොමිස් ගැසීමට  කළ ගුණ සැළකීමක් වශයෙන් අප ඉඩ දිය යුතු බවයි.

එතනෝල් කාරයින් හා කුඩු කාරයින් මේ රට වනසද්දී කළ ගුණ සැළකීමක් වශයෙන් අප ඊටද  ඉඩ දිය යුතු බවයි.

අධිකරණය ඇතුලු සියලු ආයතන විනාශ කර දමද්දී කළ ගුණ සැළකීමක් වශයෙන් අප ඒ විනශයන් ට ඉඩ දිය යුතු බවයි.

කොටින්ම කිවහොත් මුලු රටම නායකයාගේ හා පවුලේ බූදලයක් බවට පත් වෙද්දී අප ඇහ කණ පියාගෙන ඊට ඉඩ දිය යුතුබවයි.

මේ කළ ගුණ සැලකීමේ කථාවේ ඊට වඩා වෙනස් අරුතක් මට නම් නොපෙනේ.

කළ ගුණ දැක්වීම යනු එයද?






Monday, December 15, 2014

ඇමතිවරුන්ට යෝජනාවක්


වැඩේ කෙලවී ගෙන  එනබවත් , යුද්දෙන් විතරක් දැන් චන්දේ කොරන්න බැරි බවත් තේ‍ටුම් ගත්තු අපේ මහ රජානෝ නොයෙක් නොයෙක් නූල් සූස්තර දමමින් සිටියි. විපස්සෙ උදවිය බිලී බා ගැනීම,දිනපතා මජන මුදලින් ජහමනයාට දන් සැල් පැවත්වීම, හම්බන්තොට , ගාල්ල, කොළඹ, මාතර, තංගල්ල සිට අනුරාධපුර ‍රැලියට සෙනග ඇද්දවීම වැනි දාහකුත් එකක් විජ්ජා අතර පැට්‍රොල්, ඩීසල් ගෑස් මිල අඩු කිරීමත් වෙනවාය.

මෛත්‍රී , රාජිතත් අරගෙන පැනපු පැනිල්ලට පැට්‍රොල් ඩීසල් රුපියල් හතකිනුත් ගෑස් 250 කිනුත් අඩු කොලේ ජහමනයා කෙරේ හදිසියේ පහල වූ අප්‍රමාණ මානව බක්තිය නිසාමය.

මේ අවස්ථාවේ පොදු ජන හිතාය සුඛාය පිණිස අපි පොඩි යෝජනාවක් ආණ්ඩු පස්සේ ඇමති වරුන්ට හා නියෝජ්ජිය ඇමති වරුන්ට කරන්ට කැමතිය. ඇමති වරු හා  නියෝජ්ජිය කට්ටිය විතරක් කිව්වේ ඊට අමතරව සාමාන්නිය මන්ත්‍රීලා නැතිව ඇතැයි කියන උපකල්පනයෙන්ය.

අපේ යෝජනාව මෙහෙමය,

දවසකට දහ දෙනා  ගානේ ඇමතිලා විපස්සෙට  පැනිය යුතුය.

එතකොට දවස්  පහක් ,හයක් ඇතුලත පෙට්‍රල් , ඩීසල් හා ගෑස් ජනයාට නොමිලේම ලබා ගන්ට හැකි වෙනවාය. 

අඩු ගානේ චන්දේ ඉවර වෙනකම් වත් මේ දෙසැම්බර් නිවාඩු කාලේ හොඳට ගමන් බිමන් ගොහින් , බඩ පිරෙන්න කාලා( දන් සැලුත් තියෙනවා නොව) බඩේ ‍රැල් දිග ඇරගෙන ඉන්න පුලුවන්ය.




Sunday, December 14, 2014

ජනපති තිරුපති ගිය රහස හෙලි වේ.


ලඟදීම තම රස්සාව නැති වීමට නියමිත තිරුපති කෝවිලේ පූසාරියාද මෙහි සිටී. 

අති ගරු ජනාධිපති තුමා නාමයෝජනා භාර දුන් සැණින් තම මැතිවරණ ව්‍යාපාරයද දිනෙ දෙකකකට නවතා දමා හදිසියේම ඉන්දියාවේ තිරුපති කෝවිලට ගියේ මන්දැයි නොයෙක්  කථා පවතී. 

 ලොකු අතුල අරලිය ගහ මන්දිරය තුල  මිය යාමට නිසා ඇති වූ කිල්ලෙන් මිදීමට ගිය බවක් සමහරු කියත් 

ජනාධිපතිවරණය දිනීම ලේසු පාසු  නොවන නිසා හා ලංකාවේ සිටින දෙවියන්ගේ ශක්තිය එය දිනවා දීමට මදි නිසා ඉන්දියාවේ දෙවියන්ගේ ධාරිතාව වැඩි නිසාත්  තිරුපති ගිය බව තව සමහරු කියති.

තිස්ස අත්තනායක ආණ්ඩුවට හේත්තු වීම නිසා සිදු වූ අපල වස් දොස් දුරු කරගැනීමට තිරුපති ගිය බව ත සමහරුන්ගේ මතයයි.

එහෙත් කලාමැදිරියා තම ජ්‍යෝතිෂ ඥාණය යොදවා ලබා ගත් තොරතුරු අනුව සත්‍ය කාරණය වෙනම එකකි.

දැනට ලංකාවේ තිබෙන හයි ෆයි දේවාල කොවිල් වලට තම පවුලේ සාමාජිකයන් හා අනුගාමිකයන් බස්නායක නිලමේ වරු ලෙස පත් කර ඇත හෝ පත් කිරීමට සැලසුම් කර ඇත.

කතරගම දේවාලයට ශෂින්ද්‍ර රාජපක්ෂ බස්නායක ලෙස පත් කර ඇති අතර දළදා මාලිගාවට නාමල් කොලු පත් කිරීමට සිතා ගෙන සිටී.  

ඊ ලඟට සිටින්නේ යෝෂිත කොලූය. ඔහුට ශෂින්ද්‍ර ට වඩා වැඩි හා ලොකු තනතුරක් දිය යුතුව තිබේ. ලංකාවේ කතරගමට වඩා ලොකු කෝවිලක් නැත. 

රාජපක්ෂලා  තිරුපති ගියේ එම කෝවිලේ බස්නායක නිලමේ කමක් ඇති කර එය තම කොලුවාට ලබා දෙන්නටය. එයට කපුකම කලේ තිස්ස අත්තනායකය. වැඩේ හරි ගියාදැයි අපේ අන්ජනමට තවම නොපෙනේ. ඒ මා පසු ගිය දවසක  කිල්ලකට අසු වූ නිසාය. අපේ මාරයා තුමාවත් මේ ගැන සොයා බලා අපි හා සෙසු බ්ලොග් ලෝකය දැනුවත් කරනවා නම් මරුය.

සටහන - තිරුපති කෝවිලේ බස්නායක තනතුරක් නැතැයිද මෙය මඩ පහරක් යැයිද සමහරු කියනු ඇත. ඒ උන්නැහේලාට කියන්නට තිබෙන්නේ මගේ හා මාරයා තුමාගේ  ජ්‍යෝතිෂ ඥාණය අවතක්සේරුවට ලක් නොකරන ලෙසය.

Friday, December 12, 2014

රජනි කාන්ත්ලා ගේ කෝවිල් වන්දනාව


බුරුසු උඩු ‍රැවුලක් ඇති වීරයා තම අත් ඔර්ලෝසුව දෙස සුභ  නැකත එනතෙක් බලා සිට නිවසින් එලියට බසියි. එවිට ඔහුගේ බිරිය සුභ ලකුණක් වන්නට වතුර වීදුරුවක් ‍රැගෙන ලතාවකට එයි. ඉන් ඉක්බිති  ඔහුගේ දෛවඥයා බුලත් අතක්   ‍රැගෙන ඔහු ඉදිරියට පැමිණ දේව කන්නලව්වක් කර හතර ගාතෙන්  වැඳ වැටේ.

ඉනික්බිති ඡන්දයට නාම යෝජනා දෙන වීරයා විපක්ෂයේ මන්ත්‍රීවරයෙක්  බිලී බා ගැනීමට හැකි වීම ගැන ප්‍රසිද්ධියේ උදම් අනයි. ඒ අතර තම අතේ නිතරම තබා ගෙන සිටින ජීවම් කරන ලද මැජික් බෝලයක් ජනතාවට පෙන්වන්නේ ඔවුන් එහි බලයෙන් වශී කරගන්නටය.

තම අතේ තවරාගෙන සිටින ජීවම් කළ තෙල් විරුද්ධ පක්ෂ අපේක්ෂකයාගේ තවරන්නට ඒ අතර උත්සහ කරයි. එම පුද්ගලයාද බිය වී අතට අත නොදී වැඳ ආචාර කරයි.

අනතුරුව වීරයා ප්‍රසිද්ධ දේවාලයකට ගොස් දෙවියන්ට කන්නලව් කරමින් වැඳ වැටී  තමන් ඡන්දයෙන් දිනවා දෙන මෙන් යදියි.

ඔබ මේ කියෙව්වේ රජනි කාන්ත් රඟපාන දකුණු ඉන්දියානු චිත්‍රපටියක ජවනිකාවක් නොව ශ්‍රී ලංකාවේ ජනාධිපතිවරයා තමා නාම යෝජනා දෙන්නට ආ සැටි හා ඉන්පසු කල කී දේවල්ය.

මෙසේ අසීමාන්තික ලෙස මිථ්‍යා මතවල ගැලී එල්බී ගිලෙමින් සිටින ,ඇසට ඇසක් දතට දතක් න්‍යායෙන් කටයුතු කරන නායකයින් සිටින මෙවන් රටකට,එහි ජනතාවට, අබසරණ මිස අන් කිසි සරණක් ඇත්තේම නැත්ද??


Wednesday, December 10, 2014

මහින්දට ඡන්දය දිය යුත්තේ ඇයි


ඉහතින් දැක්වෙන්නේ ඊයේ උදයේ කො‍ටුව දුම්රියපොල අසල දී යම් කිසි පිරිසක් විසින් බෙදූ පත්‍රිකාවක මාතෘකාවයි. මේ මාතෘකාව දු‍ටු විගස පත්‍රිකා ලබා ගත් පිරිස් ඒවා එතනම විසි කර දමා සිය අතර එසේ විසි කළ පත්‍රිකා දහස් ගණනම් කො‍ටුව දුම්රිය පොල අවට සුළඟේ පාවෙමින් තිබිනි. ඉතා හොඳ කඩදාසියක මුද්‍රණය කර තිබූ මේ පත්‍රිකාවේ වගකීම ගෙන තිබුනේ අන්තර් විශ්වවිද්‍යාල  ශිෂ්‍ය මධ්‍යස්ථානය නම් සංගමයකිනි. (අන්තර් විශ්ව විද්‍යාල ශිෂ්‍ය සංගමය නොවේ)

ඉදින් මේ විශ්වවිද්‍යාල සිසුන් යැයි කියා ගන්නා කණ්ඩායම විසින් මෙරට පොදු ජනයා වන අප මහින්දට ඡන්දය දීමට හේතු වශයෙන් දක්වා තිබුනේ පහත කරුණුය.

1.බුලත් විටක් හපා ඇඟිලි දෙකින් දෙතොල් තද කොට අඩි ගණනම් ඈතට බුලත් කෙළ පහරක් විදින්නට හැකිවීම

2.නියරක් දිගේ ඇවිදින්නට පුළුවන් වීම

3. සරම වලාපොට ගැසීම

4.නිරාවරණ දෙපයින්  ඇවිදීම

5. හමුවෙන අයට අයියේ, මල්ලියේ,මාමේ,නැන්දේ,කියා කතාකිරීමට හැකිවීම

6.ඉතිරි පිටාර ගලන දරු සෙනෙහස( අම්මප ඔව් ඕයි)

7.පුංචි දරුවන්ගේ නාසය මිරිකීම

8. බ්ලා බ්ලා බ්ලා

(මොකොද කියන්නේ අපිත් දෙමුද)

Monday, December 8, 2014

යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.


වත්මන් දේශපාලනය හා සමාජය පිළිබඳව විමල් වීරවංශ ඇමතිතුමාගෙන් ඇසු ප්‍රශ්න කීපයකට  ලැබුනු පිළිතුරු පහත දැක්වේ. 

ප්‍රශ්නය : හැම තැනම කුඩු,මත්ද්‍රව්‍ය? 
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: විභාග වංචා වලට මොකද වෙන්නේ?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: අධිකරණය ස්වාධීන නෑ?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා....

ප්‍රශ්නය: බඩු මිල දරා ගැනීමට අපහසුයි.
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: නීතිය ක්‍රියාත්මක කරවා ගැනීමට අපහසුයි. ඇයි ඒ?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: විදේශ ව්‍යාපෘති වල  අක්‍රමිකතා පිළිබඳව සොයා බලනවාද?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: කෝප් වාර්තාවේ සඳහන් දූෂණ පිළිබඳව සොයා බලනවාද?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: සේවක අර්ථසාධක අරමුදලට මොකද වෙන්නේ?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: විදේශ වෙළඳ පොලේ තෙල්, කිරිපිටි මිල 50% කට වඩා අඩුවී තිබෙනවා.
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: නිලධාරීන් අල්ලස් ගැනීම ගැන මොකද්ද කියන්නේ?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: ආගමික නිදහසක් නෑ?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය:මැතිවරණ නීති උල්ලංඝණය කරනවා ?
පිළිතුර: යුද්දෙ දින්නා. පාරවල් හැදෙනවා. දැවැන්ත සංවර්ධනයක් සිදුවෙනවා.

ප්‍රශ්නය: රටේ යහ පාලනය, ආර්ථිකයසම්පූර්ණයෙන්ම බිඳ වැටිලා? 
පිළිතුර: යුද්දෙ දින්නා. පාරවල් හැදෙනවා. දැවැන්ත...
අන්න.... ජාත්‍යන්තර කුමණ්ත්‍රණ ! විදේශ බලවේග!... මාතෘ භූමිය... දිනු නිදහස... ඩොලර් කුට්ටි... විදේශ පිල්ලි... ඇමරිකානු බළල් අත්... විදුලි පුටුවට ... අද උපදින දරුවාගේ අනාගතය... NGO... රට පාවා දීමට... අශුද්ධ සන්ධාන... කොටි සෙවනැළි... ඩයස්පෝරාව... යුද  අධිකරණය... නිදහසේ පාරේ බැහැලා යනවා... ඊනියා මානව හිමිකම්... කැස කවනවා... අම්මේ තාත්තේ... ඔබේ දරුවා මගෙත් දරුවා...

(උපුටාගැනීම මුණු පොතෙනි)

Saturday, December 6, 2014

මෙන්න තවත් ඡන්ද ප්‍රථිපලයක්

ත‍ටු හැලී නිරුවත් වූ මැකෝ ගිරවා

අරලිය මන්දිරයට බය්යන් හා ගොයියන් දහස් ගණනින් කැඳවා මහජන මුදලින් උන්ට ආප්ප ගිල්වමින් හා ලයිට් කණු වල කටවුට් දහස් ගණන් එල්වමින් ඡන්දය දිනීමට සිතු උතුමාණෝ  වැඩේ කීරීම අමාරු  බවත් තත්වය හිතුවාට වඩා නරක  බවත් අවබෝධ කරගෙන සිටී. 

වැඩේ කෙලවුනොත් වස්තු ඉසුරු බවබෝග සැප සම්පත් සියල්ල හැර දමා දුරි භූත වීමට සිදු  වන බව දැනී රක පුත් වී  සදාචාරෙ බලු බල්ලට ගියාවේ කියා මොනවා හෝ කර චන්දය දිනීමට , නැවත වතාවක් මේ රටේ චන්ද දායකයින් රවටා ගැනීම කල යුතුය.

ඉදින් මේ රටේ ජහමනයා ‍රැවටීම සඳහා ඊයේ මධ්‍යම රාත්‍රියේ සිට නැවත වතාවක් ජනයාට අල්ලසක් දී තිබේ . ඒ පැට්‍රොල් හා ඩීසල් මිල සුපියල් හතකින් පහල දැමීමෙනි. 

දැන් ඡන්දදායකයින් වන අප තීරණය කළ යුත්තේ රුපියල් හතකට අපේ අනාගතය පාවා දෙනවාද නැත්ද යන්නයි.

Thursday, December 4, 2014

එතනෝල් දෙයියෝ


බලේ බලේ එතනෝල් දෙයියන්ගේ බලේ

බොලේ බොලේ මී හරකෙක් ඇඬුවා බොලේ

චන්දේ ඉල්ලුවොත්  ගස් බැඳ ගහන  මොලේ

මොලේ මොලේ පුකටම බැහැලාය මොලේ


විපක්ෂ පොදු අපේක්ෂක මෛත්‍රීපාල සිරිසේන වෙනුවෙන් චන්දේ ඉල්ලා එන අයට ගස් බැඳ පහර දෙන මෙන් නියෝජ්‍ය ඇමති ලක්ෂ්මන් වසන්ත පෙරේරා පසු ගියදා මාතලේ නා උලදී පැවසීය.

සටහන- පුක යනු අසභ්‍ය වචනයක් නොවේ. මෝඩ උප ඇමතිගේ කතාව නම් ශිෂ්ට සමාජය පිලිකුල් කරන අසභ්‍ය කතාවකි.

Wednesday, November 26, 2014

ශ්‍රී ලාංකීය ගෙටිස්බර්ග් දේශනය



"විදුරු ගෙවල්වල ඉදන් ගල් ගහන්න එපා.ගියපු අයගේ ෆයිල් මං ළඟ තියෙනවා .ඒත් මම ඒවා එළියට දාන්නේ නැහැ. 

මම කියන දේ කරපු මිනිහෙක් කරන දේ කියන මිනිහෙක්.ඒ පැත්තට මේ පැත්තට යන එක අද ඊයේ සිදු වු දෙයක් නොවේ.එදා සීපීද සිල්වා ගියෙත් පොළොන්නරුවෙන්.  ගියපු අයට නම් වැඩක් වෙන්නේ නෑ හැබැයි ආපු අයට නම් හොදයි.

අපේ සැලුන් දොර හැම වෙලාවෙම විවෘතයි.ඕනෑ වෙලාවක එන්න යන්න පුළුවන් .ගිය අයටත් එන්න පුළුවන්.ඔය කීප දෙනෙක් ගියාට වැඩක් නෑ.අපේ ආණ්ඩුව හොල්ලන්න බෑ"

සටහන- ආපු අයට හොඳටම හොඳ බවත් ගියපු  අයට නරකම නරක බවත් ඔයා නොකිව්වට රටම දන්නවා.

ඔය ආපු හැමෝම ආවේ හොඳ නිසා නේ. අනික ගිය අයට, ඒ කියන්නේ ජනරාල් සරත් ෆොන්සේකාට, ශ්‍රී පතිට වෙච්චි දේ මතකයිනේ. 

ඔය ඔක්කෝටම වඩා වැදගත් දේ තමා ඔය තියෙනවැයි කියන පයිල් කතාව. මොනවද ඒ පයිල්. ඇයි ඒවා හංගගෙන ඉන්නේ. ඒවායේ තියෙන්නේ රටේ ආණ්ඩුවේ දේශපාලකයෝ කරපු වංචා දූෂණ ගැන නම්, ඒවා හෙලිදරව් නොකර ඉන්න එකත් වැරදිනේ. 
(සමහර විට එතුමා ඉන්නේත් වීදුරු ගෙයක නිසාද දන්නෙ නෑ පයිල් එලියට අදින්න බැරි)

Tuesday, November 25, 2014

හිහ් හිහ් හිහ් හී රටකට ගිය කලක්

ජනාධිපතිවරණය කැඳවූ දින අරලියගහ මන්දිරයේදී කිරි ගොවීන් හමුවීමට ලැබිම තමාගේ ජයග්‍රහණය ස්ථිර කරන සුබ නිමිත්තක් යැයි ජනාධිපති මහින්ද රාජපක්ෂ මහතා ප්‍රකාශ කළේය. අරලියගහ මන්දිරයේදී පෙරේදා (20) කිරි ගොවීන් 5000කගේ සහභාගිත්වයෙන් පැවැති කිරි ගොවි සම්මේලනය අමතා ජනාධිපතිවරයා එසේ පැවසීය. 


මෙහිදී වැඩිහිටි කිරි ගොවීන් 11 දෙනකු සඳහා රුපියල් 50000ක් බැගින් මුදල් ප්‍රදානයක් ජනාධිපතිතුමන් අතින් පිරිනැමූ අතර විශ්ව විද්‍යාල වරම් ලැබූ කිරි ගොවීන්ගේ දරුවන්ට රුපියල් 10000 බැගින් මුදල් ප්‍රදානයක්ද ජනාධිපතිතුමන් පිරිනැමීය. 

මෙහිදී ජනාධිපති මහින්ද රාජපක්ෂ මහතා මෙසේද පැවසීය. අද ඉතාම හොඳ දවසක්. ඒ හොඳ දවසෙයි අප කිරි ගොවීන් හමුවන්නේ. කිරි කියන්නේ අපේ සාම්ප්‍රදායේ, සංස්කෘතියේ ඉතාම වටිනා දෙයක්. සුබ නිමිත්තක්. සුබ කටයුතුවලදී කිරි උතුරවනවා. අවුරුදු 6ක් පවතින ජනාධිපති ධුරයේ වසර 4ක් අවසන් වීමත් සමග තවත් වරක් ජනාධිපතිවරණයකට යාමට අද මම කැඳවීමක් කළා. 

නැවත වාරයක් මැතිවරණයක් කැඳවන්න කියා මැතිවරණ කොමසාරිස්වරයාට දැනුම් දුන්නා. එය දැනුම් දුන් අද දවසේ මේ කිරි ගොවීන්ගේ පැමිණීම මගේ ජයග්‍රහණය ස්ථිර කිරීමක් ලෙසයි මා සලකන්නේ. එය සුබ ලකුණක්. 

Monday, November 24, 2014

දහ අට කැතම කැත වරදකි


දහ අට කැතම කැත  වරදකි 
කිසිදා සමාවක්‌ නම් නැති 
මට පෙන්නලා අගමැති සැපේ 
 නුඹ දුන්නු දුක හොඳටම ඇති // 

මහලේකම් දැලේ පැටලී පෑහී 
සුව ඇමති වී උන්මාද වූයේ මා
විපක්ෂේ  දිහා බැලුමට යළී 
මට  පණ  නැතැයි කෙඳිරුවේ කවුරුන්දෝ

 දහ අට කැතම කැත  වරදකි ........

 ජනපතිකමේ හැමදා ‍රැඳී   දැවටී
 ඉන්නට හදයි රට රවටලා 
ඒවා කොහෙද ආ පුලතිසි පුරෙන් 
දන්නෝ දනිති මම මෛත්‍රී වෙමි

දහ අට කැතම කැත  වරදකි ........

Sunday, November 23, 2014

අයියෝ මගේ රට


මේ රට මගේ රට
මා ඉපදුන රට
හැදුන වැඩුන රට
අයියෝ මගේ රට
සුමනදාස කුක්කට ගිය රට

Friday, November 21, 2014

මෛත්‍රී කිරීම හා මෛත්‍රීගේ කිරීම


මෛත්‍රීපාල ඇමති තුමා පොදු අපේක්ෂකයා වීමත්  සමග බොහෝ දෙනෙකුගේ රක පුත් වී තිබේ. මේ නම් ඔවුන් හීනෙන්වත් නොහිතූ දෙයකි. බුද්ධි අංශ බුදියා ගෙන සිටියා දැයි හිතේ.විමල් වීර වංශ බුහ් බුහ් ගානවා මිස කියන දෙයක් ඇහෙන්නේත් නැති ගානය. අනිත් අය මීක් නැත. ඒ නිසා මහින්ද තුමාට ම එලියට ඇවිත් මම විසි අට පාරක් දින්නා, විසිනම වැනි පාරත් දිනනවා යැයි කියන්නට වී තිබේ. 

  මෛත්‍රීපාල ආවා කියා මේ මජර ක්‍රමය වෙනස් කරනවා යැයි හිතිය නොහැක.  ඔහුද මේ තරම් කාලයක් එහිම එල්ලී ගෙන රටේ සාරය උරා බිව් කෙනෙකි. එහෙත් මේ මොහොතේ රටක් වශයෙන් අප හුස්ම ඩිංගක් ගත යුතුව තිබෙන නිසා,ගිනි පොලියට ණය අරගෙන ඒ මුදලින් බජව් දාන , මඩිය තර කරගන්නා පවුල් පාලනයේ ගමනට තිරිංග දැමිය යුතු නිසා හා ඊට  වෙන ක්‍රමයක් නැති නිසා මෛත්‍රීපාල වුවද  කම්  නැතැයි සිතේ. 

තව බොහෝ අය එන ආරංචි තිබේ. ඒ අතර වික්‍රමනායක ජෝඩුව, රෙජිනෝල්ඩ්, ජනක තෙන්නකෝන් පමණක් නොව හකීම්, දිගම්බරම්, සිටී යැයි කියවේ. සෝදාපාලුව තව දුරටත් ගොස් ගිරි හිම නිපාතයක් මෙන් වෙන්නටද බැරි නැත. 


කෙසේ වුවත් වැදගත්ම දෙය නම් රාජපක්ෂලාට හා වීරවංශලාට හීන් දාඩිය දැමීටමට පටන් ගෙන තිබීමය.  ඒ දකින මට හීනි ආතල් එකක් දැනේ. දැනට ඒත් මදෑ. සෙස්ස පස්සට බැරුවාය.   

Tuesday, November 18, 2014

විමලේ මල්ලී මහින්ද අයියාට ලියු කවිය


රතනයා  නැතිවුනත් 
මගෙ ජනිපෙ......
ඇත ඔබේ නාමයෙන් 
ඇත ඔබේ නාමයෙන්...// 

ඇමති ක‍ටුවක රැඳී ඉන්නට 
වරම් ඇත්නම් අයියාගෙන් 
වෙන්ව නොගොසින් හුදකලාවේ 
මගෙ ජනිපෙ.... 
ඇත ඔබේ නාමයෙන් 

රතනයා  නැතිවුනත් .....

මෙදා චන්දේ කෙලවුනෝතින්  
ඔබේ වැඩ කිඩ සුනේ සුං...// 
සොයා එන්නට එපා එතකොට  
මගේ ජනිපෙත්  
නැත ඔබේ නාමයෙන් 

රතනයා  නැතිවුනත් .....

Sunday, November 16, 2014

මහින්ද මාමා චම්පිකා නැන්දාට කී කවිය




විපස්සෙට ගොහින්  තනි වෙන්න එපා
රනිල්ට  මුවා වී සැඟවෙන්න එපා
 කඳුලු වලින් මා නෙත් තෙමනු එපා
චන්ද වලින් මා පරදන්න එපා

කොමිස් ගැහුවේ අපි එකට සැට් වෙවී
කිමද අද මෙසේ ඔබ බොහෝ දුරට වී
කොමිස් මල් පිපී මද පවනේ සැලෙන්නේ
එවන් ලොවක ඇයි මා තනි කරලන්නේ

Saturday, November 15, 2014

මීයෝ පනිති



මීයන්ට පුදුමාකාර ඉවක් තිබේ . උන් ගිලෙන නැව් වල ඉන්නේ නැත.මීයන් ගිලෙන නැව් වලින් පනිති.

රාජපක්ෂ ආණ්ඩුවද ගිලෙන නැවක් බවට සීඝ්‍රයෙන් පත් වෙමින් තිබේ. එයින්ද මීයන් එකිනෙකා දැන් පනින්ට පටන් ගෙන තිබේ. මෙතෙක් කල් එක පතේ වැලඳු රතන සාධු හා රණවක ඇමති තුමා ලා පනින්ට කකුල් ඔසවා ගෙන සිටිති.

අත්තෙන් අත්තට පනින කුරුල්ලෙක් වූ නන්දන ගුණතිලක දැන් නැවෙන් පැන තිබේ. 

ඉදිරි කාලයේදී නැවෙන් පනින මීයන්ගේ ප්‍රමාණය අනුව නැව ගිලෙද නැත්ද යන්න අපිට බලා ගත හැකිවනු ඇත. 

ඒ අතර නැව යටින් සිදුරු කර ගිලීම ඉක්මන් කිරීම  මෙන්ම , මීයන්ට නැවෙන් පැනීමට උනන්දු කිරීම හා උදව් කීරීමද අපි මේ අවස්ථාවේ ජාතික යුතුකමක් වශයෙන් කල යුතුව තිබේ 

Thursday, November 13, 2014

හැත්තෑවේ කොළණිය


ජනතා විමුක්ති පෙරමුණ 87-89  යුගයේ මෙහෙයවූ දෙවැනි අරගලය නිමා වී වසර විසි පහක් ගත ව තිබේ. ඔවුන් විසින්ම ඊට පෙර කළ  1971 අරගලයට වසර 43කි. 

එම අරගලයන්  ගැන කෙරුණු දේශපාලන විමර්ශන විවේචන යම් පමණකට ඇතත් ඒවා පසු බිම් කරගෙන නිමා වුනු කලා කෘති නම් ඇත්තේම නැති තරම්ය. ඇතත් ඒ  එම අරගලයන් බොහෝ විට  ප්‍රධාන කථාවට අනුපානයක් ලෙස හෝ මාකටින් කිරීම සඳහා  කෘතිම ලෙස වද්දවා ගත් අවස්ථා මිස  ඒවා පිළිබඳව කෙරුණු පුළුල් හා සාධාරණ විග්‍රහ  නම් නොවේ. 

මීට වෙනස්ව දෙමළ අරගලය පිළිබඳව මිතුරුව හෝ පස මිතුරුව බොහෝ  කලා කෘතීන් නිර්මාණය වී ඇති අතර වෙමින්ද පවතී.

ජනතා විමුක්ති පෙරමුණේ එම අරගලයන් පිළිබඳව ඇති දුලබ නිර්මාණ අතර  මා දු‍ටු   වටිනාම නිර්මාණ දෙකක් වශයෙන් සරත් ආරියරත්න නම් අප්‍රකට නවකථා කරුගේ  " හැත්තෑවේ කොළණිය" හා " මේ කාගේ මේ කමතා" නම් කෘතී දෙක සඳහන් කළ හැකිය. මෙයින් පළමු වැන්න 71 අරගලය පසුබිම් කර ගෙන ලියැවී ඇති අතර දෙවැන්න 87-89 යුගය ගැනය. වියළි කලාපයේ ,රජරට කොළනි ජීවිතයන්ට එම අරගලයන් දෙකේ බල පෑම ඔහු අපූරුවට සිත්තම් කර තිබේ යැයි මට සිතේ. 

ඔබටත් හැකි නම් සොයා ගෙන කියවන්න. ඒ වටී යැයි ඔබට ද සමහර විට සිතෙනු ඇත.

අපිට එපෝ



"අපිට ඉරාකයක් මෙහේ ඕනේ නැහැ.අපිට ලිබියාවක් මෙහේ ඕනේ නැහැ.

ඊජිප්තුවක් මෙහේ ඕනේ නැහැ.ඇෆ්ගනිස්ථානය වත් මෙහෙට එන්න ඕනේ නැහැ. "

කෙටියෙන් කිව්වොත් මට සදාම් හුසේන්ට වෙච්චි දේ වෙන්ට දෙන්ට එපෝ, 


ගඩා‍ෆිට වෙච්චි දේ වෙන්ට දෙන්ට එපෝ, 

හොස්නි මුබාරක්ට වෙච්චි දේ වෙන්ට දෙන්ටත් එපෝ.

මම වැඩ කරන්නේ උන් වගේ උනාට මට එහෙම කරන්ට එපෝ.



Wednesday, November 12, 2014

පැරණි වමේ නව පිබිදීම නොහොත් කොමියුනිස්ට් පක්ෂයේ ලෝක වාර්තාව


ශ්‍රී ලංකාවේ කොමියුනිස්ට් පක්ෂ ලෝක වාර්තාවක් පිහි‍ටුවා තිබේ. ඒ නේපාල කොම්යුනිස්ට් වාදින් මෙන්  චන්දයෙන් ආණ්ඩු බලය පිහි‍ටුවා හෝ ඉන්දියාවේ කොමියුනිස්ට් පාක්ෂිකයන් මෙන් බටහිර බෙංගාලයේ වසර විස්සක් පාලනය කරමින් හෝ නොවේ. 

අපේ ශ්‍රී ලංකාවේ ඩීව් ' පොල්පොට්" ගුණසේකර ප්‍රමුඛ ඊනියා කොමිනිස් කාරයින් වාර්තාවක් පිහි‍ටුවා ඇත්තේ තමන්ගේම පක්ෂයේ පුවත්පත වන  ඇත්ත පුවත් පත තහනම් කරමිනි.

විපක්ෂයේ සිටියදී පුවත් පත් නිදහස ගැන ඇඟ කිලි පොලා යන ආදර කතා කියූ ඩීව් ලා යම්තම් පිනට ලැබුනු ඇමති කට්ටක එල්ලී ගෙන ක්‍රියා කරන්නේ මෙලෙස නම් , මොවුන්ට රාජ්‍ය බලය ලැබුණහොත් ස්ටාලින් පවා ලජ්ජා වෙන තරමේ මර්ධකයන් වනු ඇත.

සටහන- පැරණි වමේ නව පිබිදීම ගැන ආදර කතා කියූ වික්ටර් අයිවන් සීයා මේ ගැන කියන්නේ කුමක්දැයි දැන ගැනීමට මම ආශාවෙන් බලා සිටිමි.

Sunday, November 9, 2014

මහින්දට පුලුවන්



මහින්දට පුලුවන්ද බැරිද කියලා මේ දවස් වල මහා වාදයක් යනවා. ආණ්ඩුක්‍රම ඔස්තාර්ලා , නීති විශාරදලා දෙපැත්ත බෙදිලා ගජරාමෙට වාද කර ගන්නවා.  මේ වෙලාවේ නීතිය ගැන හසල බුද්ධියක් තියෙන , නීති ගරුක පුර වැසියෙක් වන මමත් කල්පනා කළා මේ ගැන මගේ අදහසත් කියන්න ඕනෑ කියලා.

ලංකාවේ විතරක් නොවේ , ඇමෙරිකාවේ ,ප්‍රංශයේ , නයිජීරියාවේ, වැනිසියුලාවේ , පකිස්තානයේ  , ඝානාවේ , තව මියන්මාරයේත්  ආණ්ඩුක්‍රම ව්‍යවස්ථා හොඳින් අධ්‍යනය කරපු මම බැහැපු තීරණය තමා මහින්දට පුලුවන් කියන එක. සරත් එන් සිල්වලා , අනුර කුමාරලා මොනවා කිව්වත් ඒක තමා ඇත්ත. පවතින යථාර්ථය සහ උන්ඩුක පුච්ඡය.

බොරුනම් බලන්න ලබන දහ වෙනිදා අපේ ශ්‍රේෂ්ඨාධිකරණයත් මම කියන දේම කියන්නේ නැත්ද කියලා. එතුමලා මටත් වඩා සූක්ෂමව ඔය නීති තර්ක , අර අන්ධ කන්‍යාවිගේ අතේ තියෙන කඩුවෙන් පොතු ගහලා , ‍රැහැලා, පෙති කපලා , ඒ ගෑණු ළමිස්සිගේ අතේ තියෙන තරාදියටම දාලා කිරලා මැනලා කියන්නෙත් මම කිව්ව ටිකම තමා. මෙන්න කැට.  

Saturday, November 8, 2014

බර්ලින් තාප්පයේ වැටීම-FALL OF A WALL


බර්ලින් තාප්පය බිඳ වැටී වසර විසි පහකි.  බර්ලින් තාප්පයත් සමග බිඳ වැ‍ටුනේ සෝවියට් දේශය ප්‍රමුඛ සමාජවාදි යැයි හැඳින්වූ රාජ්‍ය පද්ධතිය පමණක් නොවේ. එතෙක් පැවති සීතල යුද්ධය හමාර වී ලෝක දේශපාලන බල තුලනයද ඒ සමග බිඳුනි. එයින් වූයේ හොඳක් ද නරකක්ද යන්න මට තවම තේරුම් ගැනීමට නොහැක. එහෙත් එම සිදු වීම මම මහත් කම්පනයකට ලක් කළ එකක් බව නම් මතකය.  

Thursday, November 6, 2014

සිරසේ දන්සැල්


අනේ සුසානෝ මම කොළඹ යනකොට
අරලිය මන්දිරේ පන්දාහක්  ජනතාව
බයියන් ලෙසින් කට ඇරගෙන බලා ඉඳ
දන්සැල් බුදිති හත් වලාමේ

ආපහු හෑරිලා කොස්ලන්දට ආපු කොට
තුන්සීයකට කන්නට දෙන්නට බැරිව
සම්මාදම් කරයි  ලොරි පුරවන්ට
සිරස  මාකටින් මල මිනී වුනත්

Saturday, November 1, 2014

මම වැලපෙමි.


මේ බිමේ සැබෑ උරුමකරුවන් ඔවුන්ය
එහි වෙසෙන සැබෑ නිර්ධනීන්ද  ඔවුන්මය.
එහි උරුමක්කාර පොල්මක්කාරයන් යැයි කියා ගන්නා උන්ට
සැප විඳින්නට, බොරු කරමින් සැප විඳින්නට,
හොරකම් කර මඩි තර කර ගන්නට 
කාර් රේස් පදින්නට 
ගුවන් සවාරි යන්නට පමණක් නොව 
අභ්‍යවාකාශ තරණයේ යෙදෙන්නටත් 
ධනය සොයා දෙන්නේ ඔවුන්ය.
පාන් පිටියෙන් තැනූ රොටී කැබැල්ලකින් 
වේලක් හැර වේලක් පිරිමසා 
සීනි නැති කහට කෝප්පයකින් කුසෙහි  අඩුව පුරවා
අනික් උන් එලියට බහින්නට පවා නොහිතන හීතලේ,වැස්සේ 
 නහර පෑදුනු කෝ‍ටු අත් ,කෘශ සිරුරු, 
කඩමාල්ලෙන් වසාගෙන ජාතියට ( කාගේ ජාතියට ද)
ධනය සොයන්නේ ඔවුන්ය.
ඔවුන්ගේ උගුරු බුලත් හැපීම නිසා වණ වී ඇත,
පිලිකා ඔඩු දුවා තිබේ.
ඔවුන්ගේ දරුවන්ද  ඔවුන් මෙන්ම 
අඩ කුස ගින්නේ 
කහට ගැහුනු සුදු නිල ඇඳුම් 
පයට රබර් සෙරෙප්පු, නැතිනම් නග්න දෙපයින් යුතුව 
පාසල් කරා යන්නේ  තම දෙමව්පියන් යට කර ගෙන ඇති
මහා දුක් කන්දෙන් ගැලවෙන්නට විය යුතුය.

එහෙත් සොබා දහම පවා එරෙහි වන්නේ ඔවුන්ටමය.
ඔවුන් තමන්ගේ මහා දුක් කන්දත් සමගම
තම ආදරනීයන් සමග 
ඒ පස් කන්ද යට වැලලී සිටිති.

කී දෙනෙක්ද?අපි නොදනිමු.
තුන්සීයක්, හාර සීයක් , දෙසීයක්
පොලිස් ප්‍රකාශක ට අනුවනම් තිස් හතරකි.
අපට එය වැඩක් නැත.
ඒවා හුදු සංඛ්‍යා පමණකි.
දැන් වරද කරුවන් ද ඔවුන්මය.
උගත් බුද්ධිමත් මහතුන් යන්නට කී විට 
ඔවුන් ගියේ නැත.
යන්නේ කොහාටදැයි කිසිවෙක් කීවේද?

ඔවුන් යට කරගෙන සිටින මහා පස් කන්ද
මා පපුව මත තැබුවා මෙන්
මහද රිදේ 
මම වැලපෙමි.
මට කළ හැක්කේ එපමණි








 වලින් පො


Tuesday, October 28, 2014

නොකෙරෙන වෙදකමට කෝඳුරු තෙල් හත් පට්ටයකුත් ටිකක් හෙවීම


විධායක ජනාධිපති කම අත හැරීමට නම් දෙමළ ජාතික සංධානය හා ඩයස්පෝරාව ඊලම් ඉල්ලීම අත හැරිය යුතුය යැයි ජනාධිපතිවරයා මේ දිනවල කියන්නට පටන් ගෙන තිබේ.විධායක ජනාධිපති කමෙත් ඊලමෙත් ඇති සම්බන්ධය කුමක්දැයි අපට නොතේරේ.  තිබුණත් එය ඇඹුල් කෙසෙල් ගෙඩි හා ඔම්ලට් අතර ඇති සම්බන්ධය වැනි එකක් මිස ඊට වඩා කිට්‍ටු එකක් නම් නොවේ.

අනිත් අතට ඔහු මේ කියන්නේ ඊලම සැබැවින්ම අත හැරීම ගැනද නැතිනම් අත හැරිය  බවට  ප්‍රසිද්ධියේ පැවසීමක් ගැනද? යමෙක්  ඊලම අත හැරියා යයි පැවසුවද ඔහු එසේ පැවසුයේ ඇත්තටම දැයි දැන ගන්නේ කෙසේද?

කෙසේ වෙතත් දැන් අතිගරු උතුමාණෝ  මෙසේ කියනා නිසා ඒ ගැන මදක් හොයා බැලූ විට අපිට පෙනෙන්නේ  දෙමල ජාතික සංවිධානය දැනටමත් ප්‍රසිද්ධියේ ඊලම අත හැර ඇති බවයි. නො එසේනම් ඔවුන් කිසිම දිනෙක ඊලමක් නොපැතූ බවයි. ( මෙහිදී ඇතමුන් ස්වයං පාලනය හා ඊලම පටලවා ගැනීමට ඉඩ තිබේ.) ඔවුන් පාර්ලිමේන්තු මන්ත්‍රීන් වශයෙන් දිවුරුම් දෙන විටම ඒකීය රාජ්‍යයක පැවත්ම ප්‍රසිද්ධියේ පිලිගෙන ඇත. 

එසේ නම් දැන් ඉතුරුවන්නේ ඩයස්පෝරාව පමණි. මේ ඩයස්පෝරාව යනු නිශ්චිත කාණ්ඩයක් නොවේ. ඕනෑ අතකට අර්ථ දැක්විය හැකි කුලකයකි. එහි අනිත් සියලුම දෙනා ඊලම අත හැරි බව ප්‍රසිද්ධියේ කිව්වත් , නොකියූ එකම එක පුද්ගලයෙකුට ඇඟිල්ල දිගු කර අන්න අරූ කිව්වේ නෑ. ඒ නිසා ඩයස්පෝරාව ඊලම අත හැර නෑ. ඒ නිසා මම විධායක ජනාධිපතිකම අත හරින්නේත් නැහැ යැයි කිව හැක.

ඒ නිසා  ජනාධිපතිවරයාගේ මේ කියමන නොකෙරෙන වෙදකමට කෝඳුරු තෙල් හත් පට්ටයකුත් ටිකක් හෙවීම  වැනි දෙයක් මිස අන් යමක් නොවේ. ඔහු විධායක ජනාධිපතිකම අත හරින්නේ නැත.ඔහු නොකියා කියන්නේ එයයි. 

Saturday, October 25, 2014

රතන සාදු කීවේ කුමක්ද?


සුගිය දිනක 19 වැනි ව්‍යවස්ථා සංශෝධනය ගැන කතා කිරීමට අරලිය ගහ මන්දිරයට ගිය රතන සාධු මන්ත්‍රී තුමා හා චම්පික රණවක හිටපු විදුලි බල ඇමතිතුමා සාකච්ඡාව අතර මැදදී ජනාධිපතිවරයා නැගිට ගිය පසු ඔල්මොරොන්දන් වී එලියට පැමිණෙන අතර රතන සාදු චම්පික ඇමතිවරයාට කීවේ කුමක්ද?
(නිවැරදි පිළිතුර දෙන කෙනෙකුට හක් ගෙඩියක් පුරවා දෙනු ලැබේ)

1. වවුලාගේ මගුල් ගෙදර ගියානම් එල්ලිලා ඉන්ට වෙනවා බං

2. ඌරාගේ මාලු ඌරාගේ පිටේම තියලා කැපුවනේ

3. මොකෝ බං ගලක් උඩ රීපු බළලෙක් වගේ ඉන්නේ

4. කුම්බලා මාලු කෑවනම් දුක විඳපන් බළලෝ

5. මේවාට තමා කියන්නේ අපි හදපු නරි අපිටම හූ කියනවා කියලා

Friday, September 26, 2014

මේ ඔබාමා ඒ ඇමෙරිකාවේ නොවේ. වෙන ඇමෙරිකාවක . ඒක හරි හොඳයි


ඇමරිකාව හා බ්‍රිතාන්‍යය ඇතුළු රටවල් 5 විසින් ශ්‍රී ලංකාව සම්බන්ධයෙන් ජිනීවාහි එක්‌සත් ජාතීන්ගේ මානව හිමිකම් කවුන්සිල සැසිවාරයට ඉදිරිපත් කොට තිබූ යෝජනා පසුගිය බ්‍රහස්‌පතින්දා වැඩි ඡන්ද 11 කින් සම්මත විය. යෝජනාවට පක්‍ෂව ඡන්ද 23 ක්‌ ලැබුණු අතර රටවල් 12 ක්‌ විරුද්ධව ඡන්දය දුන්හ. රටවල් 12 ක්‌ ඡන්දය දීමෙන් වැළැකී සිටියහ.
............
ශ්‍රී ලංකාවට එරෙහි මෙම යෝජනාව සම්මත කර ගැනීම සඳහා ඇමරිකාව හා බ්‍රිතාන්‍යය පසුගිය කාලය තුළ දැවැන්ත මෙහෙයුමක්‌ දියත්කොට තිබිණි. ඇමරිකානු රාජ්‍ය ලේකම් ජෝන් කෙරී, එරට රාජ්‍ය දෙපාර්තමේන්තුවේ දකුණු හා මධ්‍යම ආසියානු කටයුතු භාර සහකාර රාජ්‍ය ලේකම් නිශා දේසායි බිස්‌වාල්, ශ්‍රී ලංකාවේ ඇමරිකානු තානාපති මිෂෙල් ඡේ. සිසන්, බ්‍රිතාන්‍ය අගමැති ඩේවිඩ් කැමරන්, ශ්‍රී ලංකාවේ බ්‍රිතාන්‍ය මහ කොමසාරිස්‌ ජෝන් රැන්කින් ආදීන් ශ්‍රී ලංකාවට එරෙහි යෝජනාවට සහාය ලබාගැනීම සඳහා සාමාජික රටවලට විශාල ලෙස බලපෑම් කළ අයුරු පසුගිය කාලයේ අපට දැකගත හැකි විය.

ඇමරිකාව, බ්‍රිතාන්‍යය, ප්‍රංශය, නෝර්වේ ආදී රටවල් ශ්‍රී ලංකාවේ යුද්ධයේ අවසන් අවස්‌ථාවේදී, යුද්ධය නතර කොට සටන් විරාම ගිවිසුමක්‌ මගින් කොටි නායකයන් බේරා ගැනීම සඳහා නොයෙකුත් අයුරින් බලපෑම් කරමින් ප්‍රබල උත්සාහයක යෙදුණි. ..............


තමන්ගේ අපේක්‍ෂාවන් සහ අරමුණු ඉටුනොවීමත්, ශ්‍රී ලංකාව තමන්ගේ කීමට පිටුපා ගොස්‌ යුද්ධය අවසන් කිරීමෙන් ඇමරිකාව, බ්‍රිතාන්‍යය, ප්‍රංශය ආදි රටවලට මහත් මදිකමක්‌ විය. එබැවින් ඔවුන් එදා සිට ශ්‍රී ලංකාවට එරෙහිව නොයෙකුත් යෝජනා ගෙන එන්නේ ශ්‍රී ලංකාවට පාඩමක්‌ ඉගැන්වීමටය. එමෙන්ම ජනාධිපති මහින්ද රාජපක්‍ෂ මහතාගේ ආණ්‌ඩුව පෙරළා දැමීම ඔවුන්ගේ එකම අරමුණ වී තිබේ.

ඉන්පසු 2010 ජනාධිපතිවරණයේදී මහින්ද රාජපක්‍ෂ ජනාධිපතිවරයා පරාජය කිරීම සඳහා පොදු අපේක්‍ෂකයකු ලෙස හිටපු යුද හමුදාපති සරත් ෙµdන්සේකා මහතා ඉදිරිපත් කළේද ඇමරිකාවේ උවමනාව මත බව පැහැදිලිය.

මහින්ද රාජපක්‍ෂ ආණ්‌ඩුව පෙරළා දැමීමට නොහැකි වූ නමුත් ඇමරිකාව ඇතුළු රටවල් ඔවුන්ගේ අරමුණ අත්හැර නැත. සෑම වසරකම එක්‌සත් ජාතීන්ගේ මානව හිමිකම් කවුන්සිලයට ශ්‍රී ලංකාවට එරෙහිව යෝජනාවක්‌ ඉදිරිපත් කොට සම්මත කර ගැනීමට ඇමරිකාව ආදී රටවල් කටයුතු කරන්නේ ඒ නිසාය. ..................


ජාත්‍යන්තර වශයෙන් ශ්‍රී ලංකාව කොටුකර ගැනීමට මාන බලන අතරම ඇමරිකාව, බ්‍රිතාන්‍ය ඇතුළු රටවල් දෙමළ ජාතික සන්ධානය සහ උතුරු පළාත් සභාව මගින් උතුරේ වෙනම පාලනයක්‌ ඇති කිරීමටද පියවර ගනිමින් සිටිති. ශ්‍රී ලංකාවේ ඇමරිකන් තානාපති මිෂල් ඡේ සිසන් බ්‍රිතාන්‍ය මහ කොමසාරිස්‌ ජෝන් රැන්කින් ආදීන් පසුගිය කාලයේ නිතර නිතර උතුරට ගොස්‌ උතුරු පළාත් සභාවේ මහ ඇමැති සී. වී. විග්නේශ්වරන් මහතා ඇතුළු ප්‍රධානින් හමුවූයේ නිකම්ම නොවේ. එමෙන්ම දෙමළ ජාතික සන්ධාන නායකයෝද කොළඹ ඇමරිකානු තානාපති කාර්යාලයට ගෙන්වා කීපවරක්‌ම සාකච්ඡා පැවැත්වූ බව රහසක්‌ නොවේ.

ඇමරිකාව ඇතුළු රටවල් ශ්‍රී ලංකාවට එරෙහිව ගෙන ආ යෝජනාව සම්මත කර ගැනීම සඳහා දෙමළ ජාතික සන්ධානයේ නායකයන් විශාල කාර්යභාරයක්‌ ඉටු කෙළේය.

ඇමරිකාව, බ්‍රිතාන්‍යය ඇතුළු රටවල් විසින් ශ්‍රී ලංකාවට එරෙහිව ඉදිරිපත් කළ යෝජනාවට සහාය පළකරමින් ශ්‍රී ලංකාවේ සිදුවී ඇතැයි කියන යුද අපරාධ පිළිබඳ ජාත්‍යන්තර පරීක්‍ෂණයක්‌ සිදුකළ යුතු යෑයි කියෑවෙන යෝජනාවක්‌ උතුරු පළාත් සභාවේදී සම්මත විය. එ

මේ අතර දෙමළ ජාතික සන්ධානයේ ඇම්. ඒ. සුමන්දිරන් සහ සුරේෂ් ප්‍රේමචන්ද්‍රන් යන මහත්වරු ඉකුත් දිනවල දකුණු අප්‍රිකාව, බොට්‌ස්‌වානා, නැමීබියා යන රටවලට ගොස්‌ ඇමරිකානු යෝජනාව සම්මත කර ගැනීමට සහාය දෙන්නැයි එම රටවල නායකයන්ගෙන් ඉල්ලා තිබිණි. එම සන්ධානයේ එස්‌. ශ්‍රීධරන් මන්ත්‍රිවරයාද ඉතාලිය ඇතුළු යුරෝපා රටවල් කිහිපයකට ගොස්‌ ඇමරිකානු යෝජනාවට සහාය ඉල්ලා සිටි බව ජාත්‍යන්තර මාධ්‍ය වාර්තාවල සඳහන් විය. 

 පරීක්‍ෂණ පැවැත්වීම සඳහා එක්‌සත් ජාතීන්ගේ මානව හිමිකම් කොමසාරිස්‌වරියගේ නියෝජිතයන් ශ්‍රී ලංකාවට පැමිණි විට ඔවුන්ට පූර්ණ සහාය දෙන බව දෙමළ ජාතික සන්ධානයේ නායක ආර්. සම්බන්දන් මහතා, ඇමරිකානු යෝජනාව සම්මත වීමෙන් පසු මාධ්‍යවලට පවසා තිබිණි.


(ලිපිය උපුටා ගැනීම  2014/03/30  දිවයින ලැප්ටොප් සංග්‍රහයෙන්)

Tuesday, September 9, 2014

බන්දුල විතානගේ - අවර ගණයේ කලා කරුවෙක්



මැරුණු මිනිසුන් ගැන ගුණකථන කළ යුතුම ද? යි ලිපියක් W3 Lanka ලියන පැරකුම්  ලියා තිබිණි. එම ලිපියේ ඔහු බන්දුල විතානගේ නම් වූ කලා කරුවා ගැන මෙසේ ලියා තිබිණි."බන්දුල විතානගේ සාමකාමී, අහිංසක කලාකරුවෙකි. ඔහු සමාජයට කළ හොඳක් මිස වරදක් ගැන සිහිපත් වන්නේ නැත. "

මේ ලිපිය ලියන මාද සිතුවේ එසේය. බන්දුල විතානගේ යනු මා ඉතා ප්‍රිය කල කලාකරුවෙකි. එහෙත් පසු ගිය දා දිවයින පත්‍රයේ පල වූ ලිපියක් දු‍ටු මම මගේ අදහස වෙනස් කරගත්තෙමි. 
ඒ ලිපියට අනුව බන්දුල විතානගේ යනු අවර ගණයේ කලා කෘතී කල පහත් කලා කරුවෙකි. මේ ලියන්නේ එසේ මෙසේ කෙනෙක් නොව මහ ඇමති කෙනෙකුන්ගේ පෞද්ගලික සහකාර කෙනෙක් නිසා බොරුවක් වන්නට බැරිය
පහතින් ඇත්තේ ඒ ලිපියේ සේයා රුවකි. 



 සටහන- නොදන්නා කලාවක් හා කලාකරුවන් ලියන්නට  ගොස් මඩ නාගන්නවාට වඩා තමුන් දන්න සාස්තරේ, එනම් බඩ තඩි මහ ඇමති කෙනෙකුට දාස කම් ක්‍රමින් සිටීම හොඳ බව කණහැර ආරච්චි මහත්තයාට දැන්විය හැකි කෙනෙක් සිටී නම් ලොකු උදව්වකි.

Sunday, September 7, 2014

නික්ම ගිය දැවන්තයා



පරණ වමේ මුල් කාලීන නායකයන්ගේ විශේෂ ලක්ෂණයක් වූයේ ඔවුන් තමන් කරන අරගලය පිලිබඳව තැබූ විශ්වාසයයි. ඉහල මධ්‍යම පාංතිම්ක පවුල් වල්;ඉන් දේශපාලනයට පිවිසි ඔවුන්  නොයෙක් මාක්ස්වාදි නිකායන් වලට බෙදී සිටියත් තම අරගලය කෙරෙහි අවංක වූහ.පසු කාලීනව සංශෝධනවාදයේ හා සභාගවාදි ගොහොරුවේ ගිලී ගියත් ඔව්හු ලාංකීය වමේ ව්‍යාපාර වෙනුවෙන් ඔවුන් කළ සේවය අඩු එකක් නොවේ. එය වඩාත් කැපී පෙනෙන්නේ අද එම ඊනියා වමේ පක්ෂවල සිටින නායකයින් වැටී සිටින නරාවලේ තරම දෙස බලන විටය.

මේ සටහන එම පරණ වමේ සිටි අවසාන පතාක යෝධයෙක් වන පසුගියදා අප හැර ගිය බාලා තම්පෝ සහෝදරයා වෙනුවෙනි. ඔහුට සාධාරණය වෙනුවෙන් පෙනී සිටින්නට, අසාධාරණයට එරෙහිව සටන් වදින්නට පංගු පේරුවක් නොතිබිණි. ඔවුන්ගේ දේශපාලන මතය අනුමත නොකලද , 1971 අරගලයේ  විත්තිකරුවන් වෙනුවෙන් ඔහු නොබියව උසාවියේ පෙනී සිටියේ එබැවිනි.

ඔහු සැම විටම , අවසානය දක්වාම , සටන් කාමි විය. ජනාධිපති රාජපක්ෂ ඔහුට දෙන්නට හැදූ සම්මානය ප්‍රතික්ෂේප කරන්නට තරම් කොන්දක් වයස  අනූ ගනන්  වලදීත්  ඔහුට  තිබිණි.

ඔහුගේ දේශපාලනයෙන් තොර වෘත්තීය අරගල  නම් වූ  අදේශපාලනික හා සංශෝධනවාදි මතවාදය නොපිලිගත්තත් ලාංකීය වෘත්තීය සමිති ඉතිහාසය තුල ඔහු මහත් බල පෑමක්  කල සටන් කරුවෙකි.  ලංකාවේ වෘත්තීය සමිති  ව්‍යාපාරය තුල විශාල හිඩැසක් ඉතිරි කර යන බාලා තම්පෝ නම් වූ ඒ අනවරත අරගල කරුවාට අපේ ආචාරය.

Tuesday, August 19, 2014

වතුර තිබහ නම් බීපියව්.......?



තිබහක් වෙලා මා ගිය කල රජු ලඟට

මැනලා දින 6ක් දුන්නැයි ගිනි අව්වේ  වැඩ

ගන්දෝ නොගන්දෝ කියලා හිතුනි මට

මැනලද රජෝ චන්දේ දුන්නේ උඹට

Saturday, August 16, 2014

උපෙ නාපො වීම



 අධ්‍යාපන පොදු සහතික  පත්‍ර ( උසස් පෙල) විභාගය හෙවත් අපොස
 (උ පෙ) විභාගයෙන් විශ්ව විද්‍යාල වලට සිසුන් බඳවා ගැනීම වසර 2015 සිට නවතා දැමීමට විශ්ව විදායල ප්‍රතිපාදන කොමිසම තීරණය කර තිබේ .  ඒ වෙනුවට සරසවි වලට සිසුන් බඳවා ගැනීම සඳහා අපොස ( නාපො) නමින් අලුත් විභාගයක් පැවත්වෙනු ඇතැයි වාර්තා වේ. 

සම්පූර්ණ වශයෙන් කිවහොත් එම විභාගයේ නම අධ්‍යාපන පොදු සහතික  පත්‍ර ( නාමල් පොර)  නම් වේ. ඒ අනුව මින් පසු සිසුන් පාසල් යාම, ටියුෂන් පංති ගානේ කට්ට කමින් උගැනීම ආදිය  අවශ්‍ය නොවන අතර කළ යුතු වන්නේ නිල් බලකායට බැඳී නාමල් පොරගේ දේශපාලන වැඩ වලට සහයෝගයක් දීම , එනම් පොරගේ පෝස්ටර් ඇලවීම , අනුන්ගේ පෝස්ටර් ගැලවීම, පෙලපාලි යාම පෙලපාලි වලට පහර දීම ආදි දේ පමනි. එම ක්‍රියා වලින් ලබා ගන්නා ලකුණු වල එකතුව මත සිසුන් ඇතුලත් කරන පීඨය හා සරසවිය තීරණය කරනු ඇත. සිසුන් තේරීම සඳහා හිරිඹුරේ නෝනා හා සම්බන්ධීකරණ මහත්තයා යන දෙදෙනා ගෙන් සමන්විත ස්වාධීන කමි‍ටුවක් ද පත් කරනු ඇත. 

මේ පිළිබඳව අදහස් දැක් වූ උසස් අධ්‍යාපන  ඇමති ඇස් බීන් මහතා පවසා සිටියේ මෙය කන්නන්ගර චින්තනය තව දුරටත් ඉදිරියට ගෙන යාමක් බවයි.

සටහන- අපොස ( සාපෙ) විභාගය, අපොස ( රොපෙ) හෝ අපොස (යෝපෙ) වශයෙන් නම් කිරීමට තිබෙන ඉඩ කඩ පිළිබඳව රු.2500. මහා ආර්ථික විද්‍යාඥ බන්ඩුල මහතා සොයා බලමින් සිටින බව මේ අතර වාර්තා වේ. 

Wednesday, July 9, 2014

වීරවංශගේ රම්පෝසා වික්‍රමය


අංක 1- සිරිල් රම්පෝසාට ලංකාවට එන්න දුන්නොත් අපි තව එක මොහොතක් මේ ආණ්ඩුවේ ඉන්නේ නෑ. අපි එලියට බහිනවා

අංක 2- ‍රැම්පෝසා ලංකාවට ආවට කමක් නෑ. එහෙම එන්ඩ එපා කියන්න බෑනේ. රටක නායකයෙක්නේ. ඔහේ ආවාවේ. හැබැයි උන්නැහේ එක්ක  ලංකාවේ බලය බෙදන එක ගැන කතා කරොත් නම් අපි ආන්ඩුවෙන් එලියට බහිනවා...

අංක 3. සිරිල් ‍රැම්පෝසා ඒ කවුද? කොහෙ එක්කෙනෙක්ද? මමනම් අහලා නෑ. 
'
'
'
;
අංක 4.- මේ මොන මගුලක්ද යකෝ. මම ආපහු දකුණු අප්‍රිකාවට ගිය 'ගමන් ඉල්ලා අස් වෙනවා.මේක හතර විලි ලැජ්ජාවක්නේ

Tuesday, July 8, 2014

රොබරෝසියාව ගැන කව් ගී ලියවුනා මදි



පේරාදෙණි වලේ (එළිමහන් රඟහලේ ) චිරාත් කාලයක් තිබී පසු ගියදා කඩා වැ‍ටුණු රොබරෝසියා ගස ගැන ලියවෙන කව්, ගී බ්ලොග් සටහන් මුණු පොත් සටහන් වලින් මේ දිනවල අන්තර් ජාලය පිරී උතුරා යමින් තිබේ.

මේවා දකින කියවන අයවලුන් සිතනු ඇත්තේ "අහා කොතරම් නම් සංවේදි මිනිසුන් සිටින රටක්ද? කඩා වැ‍ටුනු මහලු ගසක් ගැන මෙතරම් කව් ගී පබඳින්නට, ලිපි ලියන්නට, මොවුන් නම් මහා මානව භක්තිකයන් විය යුතුය." කියාය. 

එහෙත් මේ වෘක්ෂ ප්‍රේමින් කී දෙනෙක්ගේ හදවත  විස්කෝතු කමි න් සිටියදී මරා දැමුණු ළමයෙක් ගැන ලියන්නට තරම් උණු වීද?

කුඩා බිම් කඩකට හිර වූ ලක්ෂ ගණනක් ජනයා මත ෂෙල් වෙඩි පතිත වෙද්දි මේ අපූරු සංවේදි මිනිසුන් කුමක් නම් කලේද?

පසු ගියදා රටේ සුලුතරයක් වූ වරදට තම ගෙවක් දොරවල් පමණක් නොව ජීවිත පවා අහිමි වූ මිනිසුන් ගැන මේ රෝබරෝසියා ප්‍රේමින් වදනක්වත් ලීවෙද?

තම බ්ලොගය සංවේදි රචනාවලින් පුරවන මෑතකදී බ්ලොග් අවකාශයට එක් වූ ඇතැමෙක් මීට වසර කිහිපයකට පෙර වීදි වල කිරිබත් කෑ වුන් බව අප  හොඳින්ම දනිමු.

.ඇත්තෙන්ම මෙය නම් අපූරු රටකි. රොබරෝසියා ගස් මිනිසුන්ට වඩා වටින රටකි. 

එවන් රටක උපත ලැබ ජීවත් වීමට ලැබීම මොනතරම් වාසනාවක්ද?