කුලී ලියන්නන් අවශ්‍ය කොට තිබේ

 

කීකරු කුලී ලියන්නන්

අවශ්‍ය කොට තිබේ

කොහෙත්ම හිතන්නට බැරි

දේශපාලන කුලී කහින්නන්

අතිශයින්ම අවශ්‍යව තිබේ

පීඩිත ජනයා හඬ නගන කල

උන්ට මඩ ගසන්නට

උන්ගේ ලේ උරා බොන්නට

ලුම්පනයන් උසි ගන්වන්නට

යතුරු පුවරුවෙන් මිනී මරන්නට

වෛරය පතුරුවන්නට

සමාජය ගඳ ගස්වන්නට

ඉතා කීකරු කුලී ලියන්නන්

අවශ්‍ය කොට තිබේ

නායකයන් ගේ පා ලෙව කන

උන්ගේ වැසිකිලි දිවෙන් සුද්ද කරන

ධනපති කුණු කාණුවල ජරාව බුදින

තමන්ට කියා චින්තනයක් නැති මුත්

මහා චින්තකයින් යැයි පෙන්වන

දෙනෙත් අඳ මොලේ නැති කුලී ලියන්නන්

අවශ්‍ය කොට තිබේ

 

ලංකාවේ කොයි මුල්ලකින් හෝ
එසේත් නැතිනම්
ඉන්දියාවෙන්, චීනෙන්, කැනඩාවෙන්
හෝ ඔෂනියාවෙන්
ඒත් නැත්නම්
ට්‍රාන්ස්සිල්වේනියාවෙන් වුව කම් නැත
කුලී ලියන්නන් ඕනෑ කර තිබේ.

මහින්දට ආ අභිරහස් දුරකථන ඇමතුම කුමක්ද?

පසුගිය සඳුදා උත්සවයකට සහභාගි වෙමින් සිටි හිටපු ජනාධිපතිවරයා හදිසියේ ලැබුණු දුරකථන ඇමතුම නිසා එම ස්ථානයෙන් පලා ගිය බව ප්‍රවෘත්ති විකාශ තුලින් දැක ගන්නට ලැබුණි.

 

ඔහු එසේ පලා ගිය එසේ ගිය හේතුව සොයා ගිය අපට දැන ගන්නට ලැබුණේ විශ්මයජනක කථා පුවතකි.

 

එම දුරකථන ඇමතුම ලැබීමට මොහොතකට කලින් ඔහු කියමින් ඇති කථාව මෙබඳුය.

 

" අපි මේ රටේ දූෂණය, බොරුව, වංචාව නැති කරනවා,  සාමකාමී පරිසරයක් අති කරනවා ,  ජාතික ආරක්ෂාව තහවුරු කරනවා"

 

ඒ මොහොතේ සිදු වූ  දුරකථන දෙබසේ  කියවුනේ මෙවැන්නකි.

 

" සර්, මේ දැන් භූ ගර්භ විද්‍යාතනයෙන් අපේ සුසිල් ඇමතිතුමාට කෝල් එකක් ආවා"

 

"ඒ මොකක්ද සුසිල්ට ප්‍රශ්නයක්ද,"

 

"සුසිල්ට ප්‍රශ්නයක් නැහැ සර්, ඔය සර් ඉන්න තැන පොලව පැලෙනවලු, ඉක්මනට ඔතැනින් පැනගන්න සර්"

 

ඉන්පසු සිදු වූ දෙය කවුරුත් දනිති.

පැරදුණේ මං නිසා

 විමල් වීරවංශ, නාන සාර ප්‍රමුඛ බොදු බල සේනාව, ගෝඨාභය රාජපක්ෂ, නාමල් රාජපක්ෂ පමණක් නොව මහින්ද රාජපක්ෂට පවා සැනසුම් සුසුමක් හෙලිය හැකි ප්‍රකාශයක් ඇමෙරිකාවට පලා සිය බැසිල් රාජපක්ෂ කැලිපෝර්නියාවේ ස්වකීය මාලිගාවේ සිට කර තිබේ.

එනම් ජනාධිපතිවරණයේ පරාජයේ වගකීම තමන් භාර ගන්නා බවත් ඒ නිසා ශ්‍රිලනිප ජාතික සංවිධායක ධූරයෙන් ඉල්ලා අස් වෙන බවත්ය.

දැන් කවුරුන් හෝ මහින්ද පැරදුනේ විමල්ගේ පඩත්තල කථා නිසා යැයි කියන විට විමල් කල යුත්තේ බැසිල්ගේ ප්‍රකාශයේ පිටපතක් එසේ කියන අයට ලබා දීමයි.

තව කවුරුන් හෝ බොදුබලය නිසා මුස්ලිම් චන්ද මහින්දට අහිමි වීමෙන් ඔහු පරාජය විනැයි කියන්නේ නම් නානසාර කල යුත්තේ බැසිල් උපුටා දැක්වීමයි.

එසේම නාමල්ගේ කාර් රේස් , රගර් හා මොන්ගල් කතා නිසා මහින්ද පැරදුනේයැයි කිව හොත් " අනේ පලයන් බං යන්න ,අපි පැරදුනේ ඒවා නිසා නොවේ, අපේ බාප්පා නිසා යැයි ඔහුටද බය නැතිව කිව හැක.

වෙන එකක් තියා කවුරු හෝ අසමජ්ජාතියෙක් " මහින්ද මහත්තයෝ ඔයා පැරදුනේ ඔයා ගේ බල ලෝභය, පෙරේත කම, ඥාති සංග්‍රහය,ඒකාධිපති වැඩ, මිථ්‍යා විශ්වාස,වංචා දූෂණ, රාජ උමතුවහෝ   දෙමල ජනයාගේ හිස් මතට මෝටාර් හෙලීම   නිසා" යැයි කිව්වොත් මහින්ද රාජපක්ෂ ට පවා ඇමෙරිකාවට වී සුව සේ වෙසෙන තම සහෝදරයා පෙන්වා " මම නෙවේ අන්න බඩු " යැයි කිව හැක.

මෙවන් සහෝදරයෙක් , බාප්පා කෙනෙක් ලැබීම සැබැවින්ම මහා වාසනාවක් නෙවේද?

ජාත්‍යන්තර කුමන්ත්‍රණ ! බම්බුව තමා( මහින්දට චන්දය නොදිය යුත්තේ ඇයි-3)

මෙවර ජනාධිපතිවරණයේ දී මහින්ද රාජපක්ෂ පැරදවිය යුතු යැයි ඉතාමත් දැඩි සේ සිතා සිටින ශ්‍රී ලාංකිකයින් අතර මමද සිටිමි. ඒ මෛත්‍රීගේ ඇති විශේෂ හොඳක් නිසා නොව මේ ලොව කිසිම පාලකයෙක් මහින්දට වඩා නරක විය නොහැකි බැවිනි. 

ඉතින් මෛත්‍රී නරක වුවත් මේ රටේ මිනිසුන්ට හොඳ හුස්මක් අල්ලා ඉතිරිය පටන් ගත හැකි බව මම මී ට පෙර කීවෙමි. එසේම තවමත් මහින්දට චන්දය දීමට සිතා සිටින අයවලුන්ට ඔහු තම මැතිවරණ ව්‍යාපාරය කර ගෙන යන අන්ත සදාචාර විරෝධී ක්‍රමය දෙස බලන්නැයිද ඉල්ලා සිටියෙමි.

මඩ , අල්ලස ,මැර බලය හා රාජ්‍ය දේපල අව භාවිතය හැරුණු විට මහින්දගේ චන්ද සටනේ ප්‍රධානම තුරුම්පුව වන්නේ යුද්ධ ජයග්‍රහණය, ජාත්‍යන්තර කුමන්ත්‍රණ හා ඊනියා සංවර්ධනයයි. රාජපක්ෂගේ  යුද්ධය ගැන අප මීට පෙර ලිපියෙන් කීවෙමු.

රාජපක්ෂ/වීරවංශ ඇතුලු කල්ලිය කියන පරිදි ඇමෙරිකානුවන් හා යුරෝපීයන්ට මහින්දගේ රජය පෙරලීමට කුමන්ත්‍රණ කිරීම හැර වෙනත් කිසිම වැඩක් නැත. ඒ රටවල නායකයන්ගේ සිට අත දරුවන් දක්වා සියලු දෙනා උදේ ඇස ඇරි මොහොතේ පටන් නින්දට යන තෙක් කල්පනා කරන්නේ මහින්දගේ ආණ්ඩූව පෙරලා ශ්‍රී ලංකාව අස්ථාවර කරන්නේ කෙසේ ද යන්නයි.

රාජපක්ෂ තෙමේමත් වීරවංශ ඇතුලු ඔහුගේ ගිරා පෝතකයිනුත් පුන පුනා කියන්නේ මේ කුමන්ත්‍රණ පැරදවීමට නම් ඔවුන්ට බලය දිය යුතු බවයි.

අපි නිකමට මොහොතකට සිතමු මේ කියන ආකාරයේ කුමන්ත්‍රණයක් ඇත්තටම පවතිනවා යැයි කියා. එනම් මෙම බටහිර  රටවල  වෙසෙන්නවුන්  ‍ රැ දවාලක් නැතිව ලංකාව අස්ථාවර කිරීමට කැස කවන වා යැයි කියන කතාව ඇත්ත බව.

එසේ නම් කළ යුත්තේ මොනවාද? රා බී ගත් ගමේ චණ්ඩියෙකු ලෙස කුණුහරුප කියමින් කෑ ගැසීමද? 

නැතිනම් එසේ ඔවුන් මෙරටට මැදිහත් වන හේතු සොයා ඒවා විසඳා සැබෑ රාජ්‍යතාන්ත්‍රික මැදිහත් වීමක් කර එම උත්සාහයන් පැරදවීමද? ඔවුන්ට අප රටට අත පෙවීමට පසුබිම සකස් කරන මානව හිමිකම් අහිමි කිරීම  , සීමා කෙරෙමින් ඇති ප්‍රජාතන්ත්‍රවාදය වැනි කරුණු වලට සැබෑ විසඳුම් දීම නොවේද? 

අනික් අතට ජාත්‍යන්තර පීඩනයක් එල්ල වන විට ඊට එරෙහිව කටයුතු කල යුත්තේ. කල හැක්කේ ඊට මනා සේ පුහුණු කළ විනය ගරුක විදේශ සේවයකින්   මිස මත් පැන් බී එකිනෙකා මරාගන්නා කසඩ රස්තියාදු කාරයින්ගෙන් හා නූගත් ඥාතින්ගෙන් පිරවූ විදේශ සේවයකින්ද? රාජපක්ෂගේ විදේශ සේවය එබඳුය. ජාත්‍යන්තර කුමන්ත්‍රණ පැරදවීම කෙසේ වෙතත් ඒවා ඇති කිරීමට නම් ඔවුන්ට හැකිය.  

එසේ නම් අප තව දුරටත් මෙවැනි රස්තියාදුකාර නඩ නඩත්තු කිරීමට අප රටේ ධනය නාස්ති කිරීමට රාජපක්ෂලාට ඉඩ දෙනවාද? 

මම  නම් ඉඩ නොදෙමි. 

ඔබ....?

මහින්දට චන්දය දෙන්න මට පිස්සුද ඕයි? (මා මහින්දට චන්දය නොදෙන්නේ ඇයි?-2)

මහින්ද රාජපක්ෂ තම ජනාධිපතිවරණ  ව්‍යාපාරය මෙහෙයවන අතිශය දූෂිත  හා නින්දිත ආකාරයම ඔහුට චන්දය නොදී සිටීමට ප්‍රමාණවත් යැයි මම මීට පෙර ලිපියේදී කීවෙමි. 

එසේ නම් ඔහු මේ මැතිවරණ ව්‍යාපාරය ඉතා  ධාර්මික හා යහපත් ලෙස කළේ නම් අපි ඔහුට චන්දය දිය යුතුද?

ඔහුගේ අනුගාමිකයන් කියන්නේ අප ඔහුට චන්දය දිය යුත්තේ සියලු ජාත්‍යන්තර කුමන්ත්‍රණ පරදවා යුද්ධය දිනා , රට සංවර්ධන කරන නායකයෙක් නිසාලු. 

ඔවුන්ම කියන පරිදි යුද්ධය දැන් අවසන්ය. එසේ නම් තවත් යුද්ධය ගැන කතා කුමකටද? යුද්ධ කළ නායකයෙක්  නැවත පත් කර ගන්නේ කුමකටද? රටේ දකුණේ  ජනතාව සමග ( උතුරේ ජනතාව සමග කලා මෙන් ) යුද්ධ කිරීමටද? 

ඔව්, එයනම් රාජපක්ෂ ලා කදිමට කර ගෙන ආවේය. ක‍ටුනායකදී අරගල කළ කම්කරුවන්ට වෙඩි තබා මරා දැම්මේ මේ මහා ජනතා පුත්‍රයාය. රතුපස්වලදී ජලය ඉල්ලු ජනතාවට වෙඩි තමා මරා දැම්මේත්   ඒ මහා සංවේදී නායකයාමය. ඉන්ධන සහනාධාරයක් ඉල්ලා හඬ නැගූ ධීවරයින්ට වෙඩි තැබුවේත් ඔහුම නොවේද?  සාමකාමි දේශපාලනයක නිරත වී සිටි ලලිත් හා කුගන් යන තරුණ වාමාංශිකයන් දෙදෙනා අතුරුදහන් කලේද ඒ ජනමූල නායකයාමය. එපමණ්ක් නොව ප්‍රගීත් එක්නැලිගොඩ, ලසන්ත වික්‍රමතුංග ,...මේ ලැයිස්තුව තව දිගය. ඔව් ඔහුට නම්  යුද්ධය තවම නතර වී නොමැත. අපි ඔහුට චන්දය දිය යුත්තේ මේ යුද්ධය තව දුරටත් කරගෙන යාමටද? 

නැත මහත්වරුනි මම නම් මහින්දට චන්දය නොදෙමි. ඔබෙනුත් නොදෙන මෙන් නැවතත් ඉල්ලා සිටිමි.

එසේත් නැතිනම් අප ඔහුට චන්දය දිය යුත්තේ ඔහුගේ ගෝල බාලයින් කියන පරිදි යුද්ධය දිනා දීම නිසා කළ ගුණ දැක්වීමටද?

මෙයනම් අතිශය පසුගාමි වැඩවසම් යුගයට අයත් දේශපාලන තර්කයකි. ප්‍රජාතන්ත්‍රවාදි සමාජයක් තුල අප මහජන නියෝජිතයන් පත් කරගන්නේ ජනතාවට සේවය කිරීමට මිස දේශපාලකයින්ට ඊනියා කළගුණ දැක්වීමට නොවේ. 

කළගුණ දැක්වීමටම අවශ්‍ය නම් ඔහුට උපහාර උත්සවයක් පැවත්වීම හෝ සමරු තිළිණයක් දීම හෝ වෙනත් එවැනි දෙයක් කළාට අපට කම් නැත. එහෙත් කළ ගුණ සැලකීමට මුලු මහත් රටක්, මෙවන් ඒකාධිපතියෙකුට භාර දීම. එයනම් ශිෂ්ඨසම්පන්න ලෝකයකට සිතාගත නොහැකි තරම් පසුගාමි වැඩකි.

අනිත් අතට කළගුණ සැලකිය හැකි එකම ක්‍රමය මෙය නම් දැනටත් මේ රටේ ජනතාව ඔහුට ඇතිවන්නට කළ ගුණ සලකා තිබේ.  බහුතරයක් ජනතාව කුසගින්නේ සිටිද්දි, රටේ දරුවන්ගෙන් බහුතරය මන්දපෝෂණයෙන් පෙලෙද්දී රාජපක්ෂ පවුල මහජන මුදල් මහා පරිමාණයෙන් තම සුඛ විහරණයට යොදා ගනිමින් සිටිති. ජනධිපතිවරයාගේ දිනක වියදම රුපියල් කෝටි දෙකකට අධිකය. 
හුගේ පුතුන්ද තම අධි විනාශකාරි දිවි පෙවෙත උදෙසා මහජන මුදල් පමණක් නොව තම පියාගේ බලපරාක්‍රමයද රිසි සේ භාවිතා කරති. නගර වසා මෝටර් රථ රේස් පවත්වන්නේ ඊට එරෙහිව එන විරෝධය තුට්‍ටුවකට නොගෙනය. ඔව්හු කෝටි ගණන් වටින අශ්වයින් , මෝටර් රථ හා හෙලිකොප්ටර් වල හිමිකරුවන් බව කියවේ. 

ඉන්ධන සහනාධාරයක් ඉල්ලා හඬන ධීවරයින්ට වෙඩි තබන ආඩම්බරකාර තාත්තාගේ පුතුන් අග නගරය වසා  නයිට් රේස් පවත්වති. ඔහුගේ බාල  පුතා අභ්‍යවකාශගාමියෙක්  වෙන්නෙමියි  වහසි බස් දොඩද්දී ඔහු තම අයිතිවාසිකම් ඉල්ලන සිසුන්ගේ හතර හන්දි කැඩෙන ලෙස පොලිසිය ලවා පහර දෙවයි.

අප මහින්ද රාජපක්ෂ නැවත පත් කළ යුත්තේ මේවා සියල්ල මෙලෙස තව දුරටත් කරගෙන යාමටද? මේ අශීලාචාර පවුල් පාලනයට අසීමිත කාලයකට මේ රට භාර දිය යුත්තේ අපේ දරුවන්ට මන්දපෝෂණය හා වෙඩි උණ්ඩ හිමි කර දීමටද?

නැවතත් මම කියමි. මගේ චන්දය මහින්ද රාජපක්ෂ පාලනය නිම කිරීමටය. ඔබටත් එසේ කරන මෙන් නැවතත් ඉල්ලා සිටිමි.

මා මහින්දට චන්දය නොදෙන්නේ ඇයි?

වහෙන් ඔරෝ කථා වැඩක් නැත. මම මහින්දට චන්දය නොදෙමි. ඔබෙනුත් නොදෙන්නැයි ඉල්ලා සිටිමි. මහින්දට චන්දය නොදී වෙන කාට දුන්නත් මට කම් නැත. එහෙත් මහින්ද  රාජපක්ෂ වෙනුවෙන් ඔබේ චන්දය භාවිතා නොකරන මෙන් මම ඉල්ලා සිටිමි.

මම මහින්දට චන්දය නොදෙන්නේ ත් ඔබෙන්  මහින්දට චන්දය නොදෙන මෙන් ඉල්ලා සිටින්නේත් ඇයි.

 ඔහුගේ රජය හොර බොරු නැති, වංචා දූෂණ නොකළ, රට සංවර්ධනය කරන , එතනෝල්, මත් කුඩු, පුත්‍ර සමාගම් සහෝදර සමාගම් නැති රජයක් යැයි නිකමට මොහොතකට හිතමු. 

ඒ සියල්ල එසේ තිබුණත් ඔහුගේ මැතිවරණ ව්‍යාපාරය පවත්වා ගෙන යන නිර්ලජ්ජී, ජඩ, නින්දිත සදාචාර විරෝධී ආකාරයම ඔහුට විරුද්ධව චන්දය භාවිතා කිරීමට ප්‍රමාණවත්ය.

ඔහුගේ මැතිවරණ ව්‍යාපාරය සහමුලින්ම පදනම් වී පවතින්නේ අල්ලස් හා මඩ මතය. අල්ලස් දීම සඳහා හා ප්‍රචාරණය සඳහා රාජ්‍ය දේපල නිර්ලජ්ජී ලෙස යොදා ගනිමින් සිටියි.

මහජන මුදල් කෝටි ප්‍රකෝටි ගණන් ධනය චන්ද දායකයින් අතර බෙදා දීම ඔහු පටන්ගත්තේ මැතිවරණය නිල වශයෙන් ප්‍රකාශ කිරීමටත් ප්‍රථමය. 

දිනපතා ජනතාව 5000 ක් දෙනා බැගින් ඔහුගේ බලෙන් අල්ලා ගෙන සිටින නිල නිවසට කැඳවා මහජන මුදලින් ඔවුන්ට  දන්සැල් පැවත්වීය. එම ජනයාට ප්‍රවාහනය සඳහා වියදම් කලේත් මහජන මුදල්ය.

ඊ ලඟට ඔහු සිල් රෙදි, ඔර්ලෝසු , සාරි දස දහස් ගණනින් බෙදීම කළේය. මහජන මුදල් තම පෞද්ගලික බූදලයක් ලෙස ගනිමින් ‍තෝරාගත් පිරිස් වෙත නොයෙක් වරදාන , වැ‍ටුප් වැඩි වීම්, යතුරු පැදි ඇතුලු නොයෙක් අල්ලස් ලබා දුන්නේය.

එසේම ඔහු මැතිවරණ නීති අමු අමුවේ උල්ලංඝණය කරමින් අති දෑවන්ත කටවුට් අඩියෙන් අඩියට සවි කල අතර තවමත්  ඒවා දැකිය හැකීය.

රාජ්‍ය දේපල අවභාවිතාව සඳහා ඔහුට සීමා නැත. කොතැනක මැතිවරණ ‍රැස්වීමක් පැවත්වූවත් රටේ හතර දිග් භාගයේ සිට ලංගම බස් යොදවමින් නොමිලේම තම හෙංචයියන් ප්‍රවාහනය කරන්නේ පොදු මහජනයා මුහුණ පාන කරදර ගැන අබමල් රේණුවක් වත් තරම්  නොතකාය.තමන්ගේ ‍රැස්වීම් වෙනුවෙන් එසේ ජනයා අදින ඔහු විපක්ෂයේ ‍රැස්වීමක් පවතිනදාට සියලුම ලංගම බස් ඩිපෝ වලට ගාල් කර තබනවාට අමතරව පෞද්ගලික බස් සේවාද මැර තර්ජන යොදා නවත්වයි.

රූපවාහිනිය, අයි ටී එන් රජයේ ගුවන් විදුලි නාලිකා හා ලේක්හවුසිය අමු අමුවේම මාධ්‍ය ගණිකා වෘත්තියේ යොදවන්නේ පුවත් පත් කලාවේ හා දේශපාලනයේ සියලු ආචාර ධර්ම කෙලෙසමින් විපක්ෂ නායකයින්ට මඩ ප්‍රහාර එල්ල කිරීමටත් තමන්ගේ නැති වූ ප්‍රතිරූපය ගොඩ නගා ගැනීමටත්ය. බොහෝ පෞද්ගලික මාධ්‍ය ද එක්කෝ බියගන්වා එසේ නැතිනම් වරදාන මගින් හෝ තම අතවැසියන් යොදවා මිලට ගැනීම තුලින් අවනත කර ගෙන සිටින රාජපක්ෂ විපක්ෂයේ ප්‍රධාන අපේක්ෂක මෛත්‍රිපාලට  මහා මඩ ප්‍රහාරයක් එල්ල කරමින් සිටින්නේ ලොව සියලු සදාචාර නීති වලට එරෙහිව කුඩා ළමයින් පවා යොදා ගෙනය.

මේ සියල්ල කර ඒත් අසමත් ව සිටින ඔහු දැන් ප්‍රතිවාදින්ට ශාරිරිකව පහර දෙන තැනට වැටී තිබේ. විපක්ෂ කාර්යාල වලට හා වේදිකාවලට ගිනි තබමින් ආරම්භ කළ මේ මැර ක්‍රියා දැන් විපක්ෂ ආධාර කරුවන්ට , හා අපේක්ෂකයින්ට පහර දීම දක්වා උත්සන්න කර තිබේ.  

තම මැතිවරණ ව්‍යාපාරය මෙලෙස අන්ත මැර , ප්‍රජාතන්ත්‍ර විරෝධී , ලැජ්ජා විරහිත, තුච්ඡ,හා වනචර ආකාරයට පවත්වා ගෙන යන පුද්ගලයෙකු වෙනුවෙන් තම චන්දය භාවිතා කළ හැක්කේ ඊටත් වඩා වනචරයෙකුට හෝ මන්ද බුද්ධික අයෙකුට පමණි.

එසේ නම් මේ මැතිවරණය යනු ඔබ වනචරයෙක් හෝ මන්දබුද්ධික්ලයෙක් නොවන බව පෙන්වීමට අවස්ථාවක් කර ගත යුතුය.  රටේ බහුතරයක් එවැන්නන් නොවන බවට ලෝකයට පෙන්වීමට අවස්ථාවක් කර ගත යුතුය. එනම් මහින්ද රාජපක්ෂ 2015 ජනවාරි අට වෙනිදා ඡන්දයෙන් පරාජය කළ යුතුය.