ඇමතිවරුන්ට යෝජනාවක්

වැඩේ කෙලවී ගෙන  එනබවත් , යුද්දෙන් විතරක් දැන් චන්දේ කොරන්න බැරි බවත් තේ‍ටුම් ගත්තු අපේ මහ රජානෝ නොයෙක් නොයෙක් නූල් සූස්තර දමමින් සිටියි. විපස්සෙ උදවිය බිලී බා ගැනීම,දිනපතා මජන මුදලින් ජහමනයාට දන් සැල් පැවත්වීම, හම්බන්තොට , ගාල්ල, කොළඹ, මාතර, තංගල්ල සිට අනුරාධපුර ‍රැලියට සෙනග ඇද්දවීම වැනි දාහකුත් එකක් විජ්ජා අතර පැට්‍රොල්, ඩීසල් ගෑස් මිල අඩු කිරීමත් වෙනවාය.

මෛත්‍රී , රාජිතත් අරගෙන පැනපු පැනිල්ලට පැට්‍රොල් ඩීසල් රුපියල් හතකිනුත් ගෑස් 250 කිනුත් අඩු කොලේ ජහමනයා කෙරේ හදිසියේ පහල වූ අප්‍රමාණ මානව බක්තිය නිසාමය.

මේ අවස්ථාවේ පොදු ජන හිතාය සුඛාය පිණිස අපි පොඩි යෝජනාවක් ආණ්ඩු පස්සේ ඇමති වරුන්ට හා නියෝජ්ජිය ඇමති වරුන්ට කරන්ට කැමතිය. ඇමති වරු හා  නියෝජ්ජිය කට්ටිය විතරක් කිව්වේ ඊට අමතරව සාමාන්නිය මන්ත්‍රීලා නැතිව ඇතැයි කියන උපකල්පනයෙන්ය.

අපේ යෝජනාව මෙහෙමය,

දවසකට දහ දෙනා  ගානේ ඇමතිලා විපස්සෙට  පැනිය යුතුය.

එතකොට දවස්  පහක් ,හයක් ඇතුලත පෙට්‍රල් , ඩීසල් හා ගෑස් ජනයාට නොමිලේම ලබා ගන්ට හැකි වෙනවාය. 

අඩු ගානේ චන්දේ ඉවර වෙනකම් වත් මේ දෙසැම්බර් නිවාඩු කාලේ හොඳට ගමන් බිමන් ගොහින් , බඩ පිරෙන්න කාලා( දන් සැලුත් තියෙනවා නොව) බඩේ ‍රැල් දිග ඇරගෙන ඉන්න පුලුවන්ය.

ඉන්ධන මිල හලාල් වීම

22 දා  මධ්‍යම රාත්‍රියේ සිට ක්‍රියාත්මක වන පරිදි ඉන්ධන මිල ඉහල දැමීමට ජමියතුල් උලමා සංවිධානය තීරණය කර තිබේ. ඒ අනුව පෙට්‍රල් ලීටරයක මිල රුපියල් 3කින්ද, ඔටෝ ඩීසල් ලීටරයක් රුපියල් 6කින්ද, සුපිරි ඩීසල් ලීටරයක් රපියල් 3කින්ද ඉහළ දමා තිබේ.
මෙම මිල වැඩි කිරීමට අනුව ඔක්ටේන් 95 පෙට්‍රල් ලීටරයක නව මිල රුපියල් 170ක්ද, ඔක්‍ටේන් 90 පෙට්‍රල් ලීටරයක් නව මිල රුපියල් 162ද වනු ඇත.
එමෙන්ම ඔටෝ ඩීසල් ලීටරයක නව මිල 121ක් වන අතර සුපිරි ඩීසල් ලීටරයක නව මිල රුපිල 145ක් වනු ඇත.

ජමියතුල් උලමා සංවිධානය කල මේ මිල වැඩි කිරීම තමන් දැඩි ලෙස හෙලා දකින බවත් ඊට එරෙහිව උද්ඝෝෂණය කරන බවත් බොදු බල සේනාව කියා සිටී.

මේ අතර ප්‍රකාශයක් නිකුත් කරන ජාතික හෙල උරුමයේ ච. රණවක මහතා මෙම ඉන්ධන මිල වැඩි වීමට හේතුව හලාල් කරණය බවත් තමන් හලාල් කරණයට ඊට එරෙහිව අරගලයක් අරඹන බවත් කියා සිටී.