ලොව සියලු ළමුන් වෙනුවෙන්

"පිය තුමනි, එහෙම නෙවෙයි. ආදරය ගැන මම හිතන්නේ වෙනත් විධියකටයි. කුඩා දරුවන් වද හිංසාවට ලක්  කරන, මරණ ක්‍රමයකට මම මැරෙන තුරාවට ආදරය කරන්නේ නැහැ"

ඉහත උද්ධෘතය ඇල්බෙයාර් කැමුගේ මහාමාරිය නව කතාවෙනි. මහාමාරිය වැළඳුනු දරුවෙකු මිය ගිය විට කෝපාවිෂ්ට වූ දොස්තර රියුක්ස්  එසේ පවසන්නේ එම මරණය දෙවියන්ගේ කැමත්ත නිසා එයට විරුද්ධ නොවිය යුතු යැයි කියන  පියතුමන්ටය.

මටද කීමට ඇත්තේ එයයි. මා ලියන්නේ ද ක්‍රියා කරන්නේද  ඒ වෙනුවෙනි.

එනම් මේ ලෝකය කුඩා දරුවන් මරා  නොදමන තැනක් බවට පත් කිරීම උදෙසාය.

 ලදරුවන් කුස ගින්නේ මිය නොයන තැනක් බවට පත් කිරීම උදෙසාය.

ඔවුන්ව දූෂණය නොකරන ලොවක් උදෙසාය.

තම බඩ වියත වෙනුවෙන් කුඩා දරුවන්ට වහල් සේවයේ යෙදෙන්නට නොවන ලොවක් උදෙසාය.

අඟ හිඟ කම් නිසා කුඩා උන් හොරකමට, ගණිකා වෘත්තියට තල්ලු නොකරන ලොවක් උදෙසාය.

කෙටියෙන් කිවහොත් ලෝකයේ සියලු කුඩා දරුවන් සඳහා වඩා යහපත් හෙටක් උදෙසාය.

එහෙත් එය එතරම් පහසු දෙයක් නොවන බව පසු ගිය දින දෙක පුරා අප අන්තර්ජාලයෙන් ඉගෙන ගත් පාඩමයි.